☉ Basauri
Sara Mediavilla: “Jasotzen dudan soldata bidaiatzeko aprobetxatzen dut”
Familia ingeles batekin eta alokairuan dauden beste bi neskekin bizi da Sara Mediavilla basauriarra Newbury herrian, Erresuma Batuan.
Familia ingeles batekin eta alokairuan dauden beste bi neskekin bizi da Sara Mediavilla basauriarra Newbury herrian, Erresuma Batuan
Ingelesa ikasi nahi dudalako, bizipen berriak nahi ditudalako, etxetik irten nahi dudalako… hauek izan ohi dira atzerrira joan nahi izateko arrazoietariko batzuk. Baina guztiok eduki, ez daukagu kanpora joateko paradarik, dirua dela, harreman-loturak direla… Geure gaurko elkarrizketatuak, ordea, bai. Basauriar gazte honek zortzi hilabete daramatza aupair atzerrian eta hara joatearen arrazoiak eta bizipenaren nondik-norakoak jakin nahi ditugu.
Nora joan zara eta zenbaterako?
Erresuma Batuko hego-mendebaldean dagoen Newbury izeneko herrira etorri naiz. Herri oso lasaia eta polita da, baina garestia ere bai. Diotenaren arabera, arrazoia Londresetik ordu batera eta Oxfordetik ordu erdira egotea da. Ezaguna da duen Racecourse, zaldi lasterketak egiten diren tokia, delakoagatik. Uztailean etorri nintzen, 19an hain zuzen ere, beraz, hamar hilabete daramatzat eta oraindik beste bi falta zaizkit. Baina ikusteke dago zertxobait gehiago geratuko ote naizen.
Zein izan zen atzerrira joan nahi izateko arrazoia?
Gainezka nengoen, aldi berean gauza piloa egiten ari nintzen: gidabaimena ateratzen, ingelesa ikasten, kitarra jotzen ikasten, eskola partikularrak ematen… eta hori gutxi balitz, amarekin arrandegian lanean ere banengoen. Gogoratzen dut magisteritza ikasten nenbilenean norbaitek atzerrira aupair joateari buruz zeozer kontatu zidala. Beraz, hau guztia amaitzean, argi neukan horrelako bizipen bat bizi nahi nuela eta horri ekin nion! Inondik inora espero ez nuena zen ni neu bakarrik joatea, erronka izugarria baitzen! Baina azkenean horrela suertatu zen eta bakarrik egin izanaz harro nago. Uste dut atzerrira joatea edozein hizkuntza ikasteko eta, era berean, pertsona moduan hazteko aukerarik hoberena dela. Bitartean magisteritza oposaketak prestatzen ere banabil.
Zer da atzerrira aupair joatea?
Aupair familia gonbidatzaile batekin bizitzera joatea eta familia horretako seme-alabak zaintzea da, etxeko lan arinak egiten lagunduz. Gehienezko lan-orduak aldatu egiten dira aupair aukeraren arabera eta astean egun bat, gutxienez, libre izaten da. Trukean, aupairra familia hartzailearekin bizi da, familiako kide bat izango balitz bezala, eta astean diru-kopuru txiki bat jasotzen du. Batzuetan, aupairrak hizkuntza-ikastaroak egiten ditu ordu libreetan.
Ni, adibidez, familia ingeles batekin, ama eta bere bi semeekin, eta alokairuan dauden beste bi neskekin bizi naiz. Eta esan beharra daukat zortea izan dudala, denak oso jatorrak direlako eta oso gustura nagoelako! Lanari dagokionez, 30 ordu egiten ditut astean. Aste barruan 13.00etatik aurrera libre daukat eta asteburuak osorik. Jasotzen dudan soldatarekin bidaiatzeko aprobetxatzen dut. Dagoeneko Basingstoke, Reading, Milton King, Thacham, Bath, Shanboroug, Londres, Cambridge eta Lambourn bisitatu ditut. Azken honetan ohikoa da biztanleak kaletik zaldi gainean ikustea. Frantziara ere joana naiz. Hurrengo helburua Oxfordera joatea da. 25 urte baino gutxiago edukitzeagatik trenean bidaiatzeko eskaintzen dituzten bonoak direla medio, hemen bidaiatzea merkeago ateratzen zait.
Zer da handik gehien gustatu zaizuna?
Ingurua, natura. Irakurtzea izugarri gustuko dut eta honekin gozatzeko inguru polit ugari dago. Honen harira, hemendik izarrak primeran ikusi ahal izatea ere bai. Gutxien gustatzen zaidana, arrain falta, eguraldia eskasa eta otorduak dira, hemen oso goiz afaltzen baitute.
Bertakoak, hemengoekin alderatuta, nolakoak dira?
Oso desberdina. Hemengoak oso independenteak dira eta normalean ez dituzte sentimenduak askatasunez adierazten. Maitasun adierazpenak ez dituzte edonon egiten eta haien iritziz musuak gehiegikeria dira. Normalean lagunartean bi musu beharrean, besarkadak ematen dizkiote elkarri.
Nola moldatzen zara ingelesarekin?
Orain hobeto. Dena den, etorri baino lehen desastre hutsa ez nintzenez, orain nahiko ondo moldatzen naizela uste dut. Astean hirutan Toodle Group izeneko mintzasaio batzuetara joaten saiatzen naiz. Bertan pixka bat ordaindu eta tea eta gailetak eskaintzen dizkigute eta umeek bertako txokotxo batean jolasean aritzeko aukera daukate. Ingelesa gehiago praktikatzeko, saiatzen naiz espainiarrekin ez elkartzen; zaila bada ere, asko baitaude. Horrez gain, astean behin irakasle partikular batekin lotzen naiz.
Zer-nolako bizipena izaten ari da?
Berezia eta oso ona, ez nukeen inoiz imajinatuko horrelakoa izango zenik. Alde batetik, zoragarria izaten ari da, askatasun handia dut eta aurreko ikasturtearekin alderatuta, askoz lasaiago nabil. Bestalde, lehenago esan bezala, ingelesa ikasten eta oposaketak prestatzen ari naiz, beraz oporretan ez nago, bete-beharrak ditut. Horrez gain, maite dudan jendea izugarri faltan botatzen dut. Hasieran geure ohiko eremu erosotik hanka bat aterako dugula pentsatzean, joera dugu bertigoa sentitzera eta segurtasun falta itzela izatera. Baina hori guztia poliki-poliki gainditzen da eta posible da atzerrira bakarrik joatea! Hemendik horrelako bizipen bat bizitzera animatzen zaituztet! Ni orain bizi izandakoa kontatzen ari natzaizue, baina zirrarak azalezinak dira. Anima zaitezte! Seguru nago ahaztezina izango zaizuela!
Bi bizilagun etxegabetu dituzte gaur goizean Basaurin. Batu Elkarlaguntza Sareko kideak azken momentura arte negoziatzen saiatu arren, Ertzaintzak gauzatu du 11:00ak aldera etxegabetzea.
Horren aurrean elkarretaratzea deitu du Batu gaur Basaurin, 20:30ean Bentako plazan.
“Etxegabetzea gelditzeko gertu egon gara, baina azkenean ez da gertatu. Hala ere, gaur argi adierazi dugu kapitalismoaren aurpegirik ankerrenari ere antolakuntzaz autodefentsaz erantzungo diogula”, esan dute sare sozialetan Batuko kideek.
☉ Basauri
Argazkiak | Basauriko bi bizilagunen etxegabetzea eta herritarren elkarretaratzea, argazkitan
Gaur eguerdian bi bizilagun etxegabetu dituzte Basaurin, Agirre Lehendakaria kaleko 82. zenbakiko etxebizitza batetik. Higiezina Cerberus putre-funtsarena da eta Batu Elkarlaguntza Saretik adierazi dutenez, “negozioatzeari uko egin diote, alokairua oraintzeko prest baitzeuden bi bizilagunak”.
Etxegabetzea 10:30ean zen betetzekoa, baina dozenaka herritar batu dira “erresistentzia” egiteko 08:30etik aurrera. Goizean goizetik bertan izan da GEURIA, eta hauek egin ditugun argazkiak:
☉ Basauri
Bideoa | Basaurin etxegabetzea gauzatu ostean: “Beste etxebizitza bat hutsik, negozioa egiteko”
Bi bizilagun etxegabetu dituzte. Protestetan hainbat pertsona identifikatu ditu Ertzaintzak
Agirre Lehendakaria kaleko 82. zenbakiko etxegabetzea gauzatu da gaur eguerdian. Bigarren solairuko etxebizitza batean bizi ziren bi pertsona kaleratu ditu Ertzaintzak.
Eurekin batera, Batu Elkarlaguntza Sareko 20 lagun zeuden etxebizitza barruan, eta Ertzaintzak banan-banan kaleratu ditu.
“Etxegabetzea gelditzeko gertu egon gara, baina azkenean ez da gertatu. Zalantzan egon dira epaitegiko bitartekariak eta polizia; hortaz, hurrengo batean lortuko dugu”, esan dio GEURIAri Luis Diaz Batu Elkarlaguntza Sindikatuko kideak.
Diazen arabera, “beste etxebizitza bat hutsik geratuko da, berarekin negozioa egiteko”, eta gogorarazi du etxegabetu dituzten bi herritarrak duela lau-bost urte iritsi zirela etxebizitza hartara, “kontratu faltsu baten bidez”.
“Ordutik, alokairu bat ordaindu nahi izan dute; egungo errealitatera egokitzen den alokairu bat ordaintzeko prest zeuden, baina Cerberusek ez du onartu”, adierazi du Diazek.
Hainbat identifikatu
Ertzaintzak hainbat lagun identifikatu ditu, baina atxiloketarik egon ez dela adierazi diote Batuko ordezkariek GEURIAri.
“Jende asko elkartu gara gaur etxegabetzea geldiarazteko. Eta elkarretaratzea guztiz baketsua izan da”, dio Diazek.
Identifikazioen inguruan, isunak jasotzen badituzte, Batuk kanpaina bat abiaraziko duela adierazi du Diazek, “seinalatzen nortzuek jartzen dituzten isunak eta nortzuek jasotzen dituzten”.
☉ Basauri
Bideoa | Tentsio uneak Basaurin Ertzaintzaren eta etxegabetzea geldiarazteko batu diren herritarren artean
Basauriko bi bizilagunen etxegabetzea geldiarazteko elkarretaratzea deitu du gaur goizean Batu Elkarlaguntza Sareak Urbi kaleko 82.zenbakian. Etxegabetzea, berez, 10:30ean burutzekoa zen.
Sindikatuko kideek lehen orduan adierazitakoaren arabera, etxegabetzea geldiarazteko saiakera egin dute epaitegietan, baina ezin izan dute euren helburua lortu, eta segidizio judiziala bertaratu denean tentsio uneak bizi izan dira bertaratutakoen eta Ertzaintzaren artean.
Eraikin barruan 20 pertsona zeuden zain, eta kontzentrazioan parte hartzen zuten herritarrak hurbiltzen saiatu dira, baina Ertzaintzak bultzaka eta borraz eragotzi du.
☉ Basauri
Bideoa | Etxegabetzea geldiarazteko epaitegietan lanean ari direla jakinarazi dute Basauriko Batu Sindikatutik
Basauriko bi bizilagunen etxegabetzea geldiarazteko elkarretaratzea deitu du gaur goizean Batu Elkarlaguntza Sareak. Etxegabetzea, berez, 10:30ean izango da.
Pablo Oliveros Batuko kidearekin berba egin du GEURIAk, eta epaitegietan etxegabetzea geldiarazteko lanean ari direla nabarmendu du Batuko kideak.
Arazo honen jatorria bost urte atzera kokatu behar da, Batu sindikatuaren arabera: “Bi herritar hauek ezagun baten bitartez heldu ziren etxebizitza horretara. Ahoz-ahoko kontratu bat egin zuten alokairua ordaintzeko, baina ohartu ziren handik bost hilabetera ezagun horrek ez zuela berririk ematen eta desagertu zela. Iruzur egin ziela konturatu ziren”.
“Etxebizitza horren jabea nor zen jakin barik, bertan jarraitu zuten eta duela bi urte inguru epaitegietatik notifikazioa jaso zuten, jabetza hori Cerberusena zela esanez eta prozesu judiziala martxan jarriko zela eurak kaleratzeko”, azaldu zuen Peio Molinuevo, Batuko kideak.
Epaiketa “euren burua defendatu ezinik” egin zela salatu dute Batuko ordezkariek, “ez baitzuten epaiketa horren berririk jaso”.
Batu, bitartekari
Batu Elkarlaguntza Sareak elkarrizketak izan ditu Solvia SL hiziezinen agentziko ordezkariekin: “Ezin izan dugu Cerberuseko ordezkariekin berba egin. Cerberusek kontratatu duen bitartekari-lanerako Solviako kideekin elkartu gara”.
“Eta gure eskakizunak mahaigaineratu dizkiegu: alde batetik, etxegabetzea bertan behera gelditzea, eta bestetik, bi herritar hauek alokairua ordaintzeko prest zeudela esatea”, dio Molinuevok, eta gaineratu du: “Baina, eurekin negoziatzea oso zaila da”.
Baturen helburua alokairu soziala da, eta proposamen hori helarazi diete hiziezinen agentziko kideei: “Hala ere, bi herritar hauek alokairu soziala ez den alokairu bat ordaintzeko prest daude. Hau da, gaur egungo errealitatera egokituago egon daitekeen alokairua ordaintzeko. Baina, euren erantzuna beti ezezkoa izan da, eta euren helburua da etxegabetzea gertatzea, eta horretarako behar den biolentzia erabiliko dutela”, salatu du Molinuevok.
Zentzu horretan, “erresistentzia” egiteko deialdia luzatuko dute Batuko kideek: azaroaren 13an, 08:30ean, Agirre Lehendakaria kaleko 82. zenbakian.
“Ez dugu onartuko gure eskualdean, gure herrietan eta gure auzoetan etxegabetzerik, eta are gutxiago, horrelako putre-funts espekulatzaileekin ari garenean”, adierazi du Molinuevok.
Korrika 2026 | Martxoaren 19tik 29ra izango da 24. Korrika, Atharratzetik Bilbora
Bideoa | El Kangri: «Egiten dudan rap-ak nire bizitza du oinarri, inor kaltetzeko asmorik gabe»
Basauriko gaurko etxegabetzea salatzeko kontzentrazioa deitu du Batuk
Argazkiak | Basauriko bi bizilagunen etxegabetzea eta herritarren elkarretaratzea, argazkitan
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
Bideoa | El Kangri: «Egiten dudan rap-ak nire bizitza du oinarri, inor kaltetzeko asmorik gabe»
Bideoa | Basaurin etxegabetzea gauzatu ostean: “Beste etxebizitza bat hutsik, negozioa egiteko”