☉ Galdakao
Bea de Francisco: “Operatzea bezain inportantea da umeei eskuetatik heltzea edo malkoak garbitzea”
Lurrikara batek Nepal astindu zuen urtean, 2015ean, Samsara Nepal elkartea sortu zuen Beatriz de Franciscok herriko enpresek eta norbanakoek dohaintzan emandakoari esker. Nepalekin zuen lotura, ordea, aurretikoa zen
Lurrikara batek Nepal astindu zuen urtean, 2015ean, Samsara Nepal elkartea sortu zuen Beatriz de Franciscok herriko enpresek eta norbanakoek dohaintzan emandakoari esker. Nepalekin zuen lotura, ordea, aurretikoa zen
Beak (Galdakao, 1964) kontatu digun istorioa zirraragarria da. Pema izeneko mutikoarekin hasi eta Milan Maharjan zirujauarekin jarraitu zuen. Harrezkeroztik poztasunak eta tristurak bizi izan ditu, baina Nepal herriari laguntzeko nahiak zutik mantendu du. Otsailean bertara abiatu da berriro ere eta etxeko lanak eginda eraman ditu. Orain arte lortutakoa ikaragarria da, baina horrekin konformatu ez, eta apartekoak dira erakundeak esku artean dituen proiektu eta helburu berriak.
Zergatik Nepal? Zein da lotura?
Beti gertatu izan zait deigarri budismoa, eta duela 10 bat urte haur bat babesean hartzea erabaki nuen. Ume hura 20 urteko gaztetxoa da gaur egun, Pema du izena eta bera da istorio honen ‘errudun’ nagusia. Babesean hartu eta hiru urtera ezagutzera joan ginen eta behar bezala entzuteko arazoak zituela jabetu ginen. Galdakaora bueltatu ginenean Katmandu inguruko hainbat otorrinori idatzi nien eta, erantzunik jasoko ez nuela pentsatzen hasia nintzenean, Milan Maharjan zirujauarena heldu zitzaidan. Pemari azterketa medikoa egiteko prest agertu eta mutikoa bizi zen monasteriora gerturatu zen. “Bea, ebakuntza lehenbailehen egin behar diogu, bestela, ez du bizirauteko itxaropenik“, esan zidan. Bere belarrietan zornea zen nagusi eta burmuinera ere hurbiltzen hasia zen.
Urte bereko abenduan operatu zuten; belarri bateko entzumena galdu zuen eta bestean %30a baino ez du, baina bizirik dago. Hurrengo urteko apirilean Nepalera joan ginen berriro ere alaba eta biok, Pema ikusteko eta Milani ebakuntzaren gastuak zor nizkiolako, baina ez zidan ezer kobratu gura izan. Gure arteko konplizitatea eta adiskidetasuna ia berehalakoa izan zen eta handik gutxira ospitalean zuen lanari agur esatea erabaki zuen Milanek. Ear Care Nepal sortu zuen, umeek entzumena berreskuratzea helburu duen erakundea.
Milan Maharjan zirujaua umeak artatzen // Samsara Nepal
Noiz eta zertarako jaio zen Samsara Nepal?
2015. urteko apirilean, lurrikara batek Nepal astindu zuenean, erakundea sortzea beharrezkotzat jo genuen, ezinezko suertatu zitzaigulako bildutako diru mordoa eta materiala bertara bidaltzea. Galdakoztarren laguntza ikusgarria izan zen eta elkartasun horri esker jaio zen Samsara Nepal. Milanekin berba egin nuen eta dirua banku batean ez sartzeko gomendatu zidan, horrelako katastrofeak gertatzen direnean ateak itxi eta gobernuak jaso ohi duelako. Fiskalki babestuta egoteko aukera bakarra, GKE (gobernuz kanpoko erakunde) sortzea izan zen. Une hartan jaio zen, Milanen eta bion arteko bateratzearekin batera. Samsarak Ear Care Nepalekin egin zuen bat.
Zeintzuk dira zuen burua ezagutzera emateko eta dirua biltzeko egiten dituzuen ekintzak edo jarduerak?
Egutegi solidarioekin hasi ginen eta eskumuturrekoak, giltzatakoak eta libretak ere egiten ditugu. Aurten, estreinakoz, loteria izan dugu. Dena Galdakaoko Zurrut tabernan dago salgai eta, gainera, hasi gara azoka txikiren bat antolatzen. Herriko hainbat enpresak ere asko lagundu digute.
Biltzen dugun diruarekin, batez ere, haurren erdiko belarriko operazioak finantzatzen ditugu. Eskola helezinetan dauden umeak bisitatzeko trekkingak antolatzen dira, azterketa medikoa egiteko eremua ondo prestatzen da eta, behin ume guztiak artatuta, ebakuntza nortzuk behar duten erabakitzen da. Gurasoekin hitz egiten dugu eta, baiezkoa ematekotan, 25 euroren truke, operatu egiten ditugu. Zergatik kobratzen diegu? Doakoa denak balioa galtzen duelako eta guk arazoari benetan merezi duen garrantzia ematea nahi dugulako. Azpimarratzekoa da Milanek egiten duen operazio bat 200 eta 500 euro artekoa izan daitekeela.
Egiten ditugun eskaeren artean, bestalde, eskola materiala, sendagaiak eta jostailuak daude.
Konta iezazkiguzu eskuartean dituzuen proiektuen nondik norakoak.
Egun bost proiektutan gaude buru-belarri. Aurrenekoa, lehen aipatu dudan bezala, haurren erdiko belarriko ebakuntzena da. Bigarrenak, Mero Gaon izenekoak, lurrikararen ondorioz erraustuta geratu zen Kulay herria berreraikitzea izan du helburu, baina ia bukatutzat ematen dugu, martxorako eraikitako 55 etxebizitzak prest egongo baitira. Ali proiektua zazpi bat ume itsuk osatzen dute. Disabled Service Association eskola publikoan daude eta eurentzako irakaslea kontratatu dugu. Helburua ez da bakarrik idazten edota ingelesa irakastea; egunerokotasuneko gauza txikietan ere, norberaren garbitasunean adibidez, lan bikaina egiten ari da.
Kushi proiektua guk erditutakoa da eta xedea umeen irribarreak sortaraztea baino ez da. Asteburuetan boluntarioak behar ditugu eurekin egoteko eta jolasteko. Poltsa birziklatuak egiten zituen emakumeen artisau-enpresa ere sortu genuen, baina arduradunak Txinara joan behar izan du eta bera bueltatu arte proiektua bertan behera uztea erabaki dugu.
Nola heltzen da laguntza Nepalera?
Eraman beharreko guztia, dirua, materiala eta abar, gure maletetan sartzen dugu. Lagungarria eta eskertzekoa da Nepalera boluntario joaten direnek ere materiala eroatea.
Nepalera eramandakao materiala // Samsara Nepal
Eta Nepaleko jendearen erantzuna?
Esker onekoak dira nepaldarrak. Kostata lortzen dituzte ebakuntzarako 25 euro horiek, baina benetako balioa zein den badakitenez, eskuratzen ahalegintzen dira eta semea edo alaba operatu eta gero opariren batekin etortzen zaizkigu. Umeen erantzuna poztasunekoa da beti, baita eskumuturreko sinple batekin ere. Hori bai, euren pentsamoldea ezberdina da, gaileta bat eman eta ingurukoekin partekatzen dute.
Nolakoak dira, gurekin alderatuta?
Lehen munduan gauza asko egin ditugu gaizki, baina bat nabarmenduko nuke: ez gara fio. Nepaleko umeek ur berorik ez dute, ezta beroki eder edo hiru pare zapatila ere, baina pozik bizi dira. Ezer gutxi dutenez lasai oheratzen dira, beldur barik. Guk gehiegi hartu nahi izan dugu gure gain eta daukagun guztia galtzearen beldur gara, etengabe.
Hango gobernuak trabarik jartzen ote dizue?
Milanen ardura da gobernu-kontuak kudeatzea eta ez da batere erraza. Nepalen, hemen ere gertatzen den moduan, diru beltzarekin konpontzen dira hainbat kontu baina Milanek ez du horrelakorik egin nahi, oso argi dauka. Pazientzia eta irmotasun handiko emakumea da eta begitan hartzen duen guztia erdietsi ohi du. Seme-alabak izateari uko egin eta besteei laguntzeari ekin dio.
Zenbatek osatzen dute Samsara Nepal?
Asko gara, bakoitzak bere harri koskorra ekartzen baitu. Kuotarik ez dago, ekonomikoki ez baina gutunak idazten edota botikak ordenatzen lagundu daitekeelako. Lehenengoa bezain zilegia da bigarren aukera. Ni neu naiz presidentea eta nire alaba presidenteordea, etorkizunean berak hartuko baitu Samsara proiektuaren lekukoa. Nire bikotea da arlo ekonomikoaren arduraduna eta Esti idazkaria. Eli dago batzordekide gisa eta Eneko bere senarra da webgunea egiten lagundu diguna. Hasieratik nire ondoan egon diren konfiantzazko pertsonak dira.
Hilabete honetan (otsailean) Nepalera joango zarete berriro ere. Zein da helburua oraingoan?
Nire bikotearekin joango naiz, hilabete eta erdi. Orain arte egindako guztia Ali proiektuko irakaslearekin batera egiaztatu nahi dugu, Kushi proiektuari buelta bat eman eta ahal den heinean handiagotu, eman dizkiguten material, medikamentu eta jostailuak ondo antolatu eta, batez ere, Humlako 32 umeak Pokharara eramateko ditugun aukerak ondo aztertu. Azken hori da gure bidaiaren helburu nagusia. Oinez hamar eguneko ibilbidea dago Humlatik Pokhararino (gertuen dagoen ospitalea) eta pentsaezina da operatu berri dauden umeek halako distantzia bat egitea. Abioneta bat alokatzea gustatuko litzaiguke, baina dena ondo analizatu beharra dago.
Proiektu berriren bat?
Bai, potoloa da esku artean daukagun proiektu berria: erreferentziazko ospitale gunea izan nahi dugu, umeak operatzen ditugun ospitalean bertan. Geure kirofanoa nahi dugu eta lauzpabost logela, gaur egun ebakuntza egin eta lau ordutara libre utz behar ditugu eta. Operazioaren ondorengo hiru egunetan umeek behaketan egon beharko lukete, eta gaur egun ezartzen diguten ordutegiarekin ezinezkoa da. Bost urtetarako aurrekontua zein izango litzatekeen kalkulatu dugu eta hiru urteko epean gure ametsa errealitate bihurtzea espero dugu. Laguntza edonon eskatuko dugu baina badakit oso zaila izango dela.
Gaur egun ebakuntza egin eta lau ordutara ospitalea utzi behar dute umeek // Samsara Nepal
Kostata animatzen al da jendea halako proiektu batean parte hartzera? Krisiak eraginik izan ote du?
Ez, zorte onekoak gara. Erakundeak ez bezala, Galdakaoko herria inoiz ezagutu dudan solidarioena da. Eta ez naiz bakarrik arazo ekonomikorik ez dutenei buruz ari, gazteen eta agureen ekarpena ere ezinbestekoa da.
Zer esango zenioke boluntario gisa joan nahi duenari?
Garrantzitsuena da barneratuta izatea ez garela kolonizatzaileak, hori argi eta garbi izan behar da. Adinak berdin dio. Helburua ez da laguntzea, partekatzea baizik. Ez gara inor baino gehiago eta, beraz, inposizioek lekurik ez dute. Guri dagokigu moldatzea, eta ez aldrebes. Boluntario izatea ez da bakarrik eraikin bat egiten laguntzea; umeen irribarreak sorraraztea ere bada. Egia da guk, batik bat, otorrinoak beharko genituzkeela, baina operatzen jakitea bezain garrantzitsua da umeei eskuetatik heltzea edota malkoak garbitzea. Aurreiritziak atzean utzi eta boluntario izatera animatuko nuke bere kabuz alde batetik bestera mugitzeko gai den edonor.
Hasieran Milanen senideen etxeetan geratzen ziren Samsararekin boluntariotza egitera joaten zirenak, baina horri irtenbideren bat eman nahi izan genion eta gure boluntarioentzako etxea eraiki dugu, Patan hirian, ospitaletik oso gertu. Iaz inauguratu genuen, oasi txiki bat da.
Nola lagun dezaket?
Modu asko daude Samsara Nepal elkartearekin eta burutzen dituen proiektuekin parte hartzeko:
- Denbora. Norberaren denbora eskaini, horrela ere lagun daiteke elkartearen proiektuetan.
- Materiala. Materiala eman Nepaleko umeei eramateko. Adibidez, jostailuak, eskola-materiala, botikak…
- Erosi. Samsara Nepal elkarteak Galdakaoko Zurrut Tabernan salgai dituenak erosiz ere lagun daiteke.
- Dirua. Modu zuzenean, dirua emanez. Horretarako honako kontu korronte zenbakia du elkarteak: ES 89 2100 3910 1001 0042 4771 (Caixabank)
Athleticek jakinarazi duenez, Jose Mari Argoitia futbolari ohia hil da gaur 85 urterekin. Jaiotzez Galdakaokoa, Arkotxarekin lotura handia izan zuen, familia bertakoa baita.
Basauriko CD Basconian jokatu ostean, hirurogeiko hamarkadan fitxatu zuen Athleticek eta 1972an taldea utzi zuen: hamabi denboralditan 308 partida jokatu zituen eta 69 gol sartu zituen. Besteak beste, Piru Gainza basauriarra bere entrenatzaile izan zen.
1969ko Kopa irabazi zuen, eta Argoitiak Anton Arietari asistentzia eman zion titulua lortzeko erabakigarria izan zen golean.
“Athleticekiko leialtasun handia izan zuen. Bere familiak bere oparia jaso zuen atzo, hil bezperan, elkarteko bazkide gisa 75 urte baino gehiago betetzeagatik. Lezamako beheko mailetan entrenatu zuen, filialeko bigarren entrenatzailea izan zen eta Jose Luis Mendilibarren laguntzailea ere bere lehen taldean egin zuen denboraldi bakarrean. Klubari laguntzeko beti prest, bikote paregabea osatu zuen Koldo Aguirre peñen enbaxadore zela”, adierazi dute klub bizkaitarretik.
Athleticek besoko beltza jantziko du urriaren 25ean Getaferen aurka jokatuko duen partidan.
☉ Galdakao
Galdakaoko aparkalekuen okupazioa denbora errealean kontsultatzeko aukera dute orain herritarrek
Galdakao app-a eguneratu du Udalak. Herriko aparkalekuen okupazioaz gain, garraio publikoari buruzko informazio zehatza ezagutu dezakete galdakoztarrek
‘Galdakao’ sakeleko telefonoko aplikazioa eguneratu du Udalak. Eta eguneraketa horri esker, herritarrek anbulatorioko, Lapurdiko eta udaletxe ondoko aparkalekuen okupazioa denbora errealean kontsultatu ahal izango dute.
“Mapa interaktibo baten bidez, erabiltzaileek bakoitzean zenbat aparkaleku libre dauden ikus dezakete, baita hautatutako parkingera iristeko jarraibide zehatzak jaso ere”, diote udal ordezkariek.
Era berean, garraio publikoari buruzko informazio zehatza jaso ahalko dute herritarrek eguneraketari esker: Euskotreneko trenetarako itxaron denbora kontsultatzea eta Galdabusaren bi lineei buruzko informazioa ezagutzea, hain zuzen.
“Zuhatzu-Galdakao tren geltokitik igarotzen diren trenetarako itxaron denbora kontsultatu daiteke, bai Bilboko noranzkoan, baita Bermeo, Eibar eta Donostiako noranzkoetan ere. Horrela, herritarrek euren joan-etorriak modu eraginkorragoan antolatu ahal izango dituzte, alferrikako itxaronaldiak saihestuz”, diote.
Galdabusari buruzko informaziori dagokionez, erabiltzaileek mapa interaktiboan ikus dezakete geltoki guztien kokapen zehatza, baita ibilbide bakoitzaren eguneratutako ordutegiak ere.
Zerbitzu horiek eskaintzeaz gain, ‘Galdakao’ app-ak honako funtzionalitateak ditu: azken berriak ezagutzea; agenda kontsultatzea eta sarrerak eraostea; Bizkaibus lineei buruzko informazioa; botika eta guardiako farmazien kontaktuak; liburutegien eta kiroldegien informazioa eta horietan tramiteak egiteko aukera; ESAN Herritarren Arretarako Bulegoarekin zuzenean harremanetan jartzeko aukera; abisuak eta iradokizunak bidaltzea; edota Udalean egin daitezkeen administrazio tramite guztiei buruzko informazio zehatza kontsultatzea.
“Udalaren aplikazioaren bidez, eta horren azken eguneratzearekin, Udalak digitalizazioarekiko eta zerbitzu publikoak hobetzeko duen konpromisoa berresten du, herritarren egunerokoan erabilgarriak diren tresnak guztien eskura jarriz. Hortaz, aplikazioa sakelako telefonoan jartzeko gonbita egiten die Udalak herritarrei, informazioa uneoro eskura izan dezaten”, diote. App-a Android zein Apple gailuetan deskargatu dezakete herritarrek.
☉ Galdakao
Galdakaoko Batzokiak 120 urte bete ditu eta hori ospatzeko ekitaldia antolatu dute urriaren 26an
Ikurrin igoera, ekitaldi politikoa, luntxa eta argazki erakusketa antolatu dituzte igandean Galdakaoko Batzokiaren 120. urteurrena ospatzeko
Galdakaoko Batzokiak 120 urte bete ditu eta urteurrena ospatzeko ekitaldia antolatu du EAJk urriaren 26an, igandez.
Iturrondo plazan izango da ospakizun ekitaldia 12:00etan: ikurrin igoera, ekitaldi politikoa, luntxa eta argazki erakusketa antolatu dituzte.
Iñigo Ansola Bizkai Buru Batzarreko (BBB) presidentea izango da ekitaldian; berak emango du hitzaldia ekitaldi politikoan.
☉ Galdakao
Torrezabaleko liburutegia itxita dago ostiralera arte Galdakaon, eraikinaren estalkiko lanak direla eta
Torrezabal Kultur Etxeko estalkia berritu du Udalak eta orain karga proba bat egin behar dute. Proba hori egiten duten bitartean hirugarren solairua itxita egongo da
Torrezabal Kultur Etxeko estalkia berritu du Galdakaoko Udalak. Orain, eraikinaren estalkian karga proba egin behar dute.
Proba hori egiten duten bitartean, eraikinaren hirugarren solairua itxita egongo da urriaren 22tik 24ra arte. “Bertan kokatzen da liburutegia eta, beraz, zerbitzu hori erabiltzaileentzat itxita egongo da ostiral eguerdira arte”, diote udal ordezkariek.
Auzokide, ikasle eta liburutegiko erabiltzaile guztien lankidetza eskertu du Udalak eta lan hauengatik sor daitezkeen eragozpenenak sentitzen dituela jakinarazten du. Eskuhartzearen eragina ahalik eta gehien murrizteko lanean ari da.
Era berean, makina gela handituko du Galdakaoko Udalak, “etorkizunari begira makineria berria jartzea aurreikusten baitugu”, diote.
☉ Galdakao
Finlandiako hezkuntza sistema nolakoa den ezagutu dute Galdakaoko Elexalde Institutuko irakasleek
Finlandiako hezkuntza sistemaren “malgutasuna” eta ikasleei ematen dieten “autonomia” nabarmendu dute Gemma Gutierrez eta Edurne Ruiz irakasleek
Eramus+ programaren barruan, Galdakaoko Elexalde Institutuko Gemma Gutierrez eta Edurne Ruiz irakasleek job shadowing egonaldia egin zuten irailaren 29tik urriaren 2ra bitartean Helsinkiko Märsky Athletics and Education ikastetxean, Finlandiako kirol-ikastetxerik handienean.
Zehazki, Finlandiako hezkuntza sistema bertatik bertara ezagutu zuten: “Esperientzia horrek aukera eman zigun lehen eskutik ikusteko Finlandiako hezkuntza sistemaren malgutasuna eta ikasleei ematen zaien autonomia, beren ikaskuntza modu autonomoagoan antolatzeko”, esan dute.
“Märsky-n, ikasturte akademikoa bost alditan banatzen da, eta horietako bakoitza gutxi gorabehera bi hilabetekoa da. Horri esker, ikasleek beren curriculum-a planifikatu eta ikasketak beren beharretara eta gaitasunetara egokitu ditzakete. Ikasleek aukeratu ditzakete ikasgaiak, ikastaroak aldatu edota irakasleak hautatu, betiere zuzendaritzak gainbegiratuta. Egituraren malgutasun horrek erantzukizuna, motibazioa eta autoantolaketa sustatzen ditu, ikaskuntza iraunkorrerako funtsezko trebetasunak”, diote.
Finlandiako hezkuntza sistema guztiz doakoa dela nabarmendu dute: “Lehen hezkuntza, bigarren hezkuntza, goi mailako bigarren hezkuntza, eta baita unibertsitatea ere. Ia guztiz publikoa da, eta ikastetxe pribatuen kopurua oso txikia da”, diote.
Digitalizazioaren garrantzia
Märsky ikastetxean digitalizazioari garrantzia handia ematen diotela ere nabarmendu dute Elexaldeko irakasleek: “Ikasle guztiek liburu digitalak eta plataforma interaktiboak erabiltzen dituzte ia ikasgai guztietan; gainera, azterketa guztiak –unibertsitaterako sarbide-probak (Ylioppilastutkinto) ere– ingurune digitaletan egiten dira. Horri esker, ikasleek modu autonomoan lan egin dezakete, baita klaseetara huts egiten dutenean ere”, diote.
Märsky Athletics and Education ikastetxeko ikasleak // Argazkia: Elexalde BHI
“Gure egonaldian Ingeles, Gaztelania, Idazketa eta Ahozko trebetasun tailerretako eskoletan parte hartu genuen, eta orientatzailearekin zein zuzendariordearekin elkartu ginen, ikastetxearen eta Finlandiako hezkuntza-sistemaren funtzionamendua lehen eskutik azal ziezaguten. Irakasleekin digitalizazioari buruzko iritziak partekatu genituen, eta nazioarteko ikasleek beren Erasmus esperientziak aurkeztu zizkiguten, ikastetxearen aurkezpena egiteaz gain”, diote.
Halaber, honakoa gaineratu dute: “Ikastetxeko instalazio bikainetan zehar bisita egin genuen eta online ikastaroen funtzionamendua ezagutu genuen, bereziki ikasle kopuru txikia duten ikasgaietan. Ikasleek modu kolaboratibo eta autonomoan lan egiten dutela ikusi genuen, liburu digitalak eta jarduera interaktiboak erabiliz”.
Ylioppilastutkinto azterketa
Finlandian goi-mailako bigarren hezkuntza (Lukio) amaitzean egiten den azterketa da Ylioppilastutkinto, eta batxiler-kalifikazioa ematen du. Eta horri esker, unibertsitatera sar daitezke Finlandiako ikasleak.
“Azterketa nazionala goi-mailako ikasketak egiteko irizpide nagusia da, eta ebaluazioa ikasturtearen amaierako notan baino gehiago funtsezko gaitasunetan eta ezagutzetan oinarritzen den ideia indartzen du”, diote.
Märskyko jardunaldiak prestakuntza akademikoa eta kirol-prestakuntza uztartzen ditu: “Ikasleek goizero beren diziplinetan entrenatzeko aukera dute, eta, aldi berean, ikasgai orokorren eta hautazkoen ikastaroak egiten dituzte. Irakasleek gela bakoitzaren erregistro zehatza dute, eta, horri esker, bertaratzen ez diren ikasleak modu autonomoan eguneratu daitezke. Eskolak errefortzuko eta banakako laguntzako eskolak ere eskaintzen ditu arreta gehigarria behar duten ikasleentzat, inor atzean geratzen ez dela ziurtatuz”.
“Märsky hezkuntza integralarekin eta eliteko kirolarekin duen konpromisoagatik nabarmentzen da. Atleta profesional asko igaro dira beraien ikasgeletatik, eta ikastetxeak loturak ditu Urhea National Training Centerrekin. Bertan, urtero, 10.000 atleta inguruk entrenatzen eta ikasten dute”, diote.
Finlandiako ereduak malgutasuna, autonomia, integrazio digitala eta gaitasunetan oinarritutako ebaluazioa uztartzen dituela berretsi dute Elexaldeko irakasleek, “gazteak unibertsitaterako zein bizitza aktiborako eta kirolerako prestatuz”, esan dute: “Beraz, Märsky adibide bat da hezkuntza nola egokitu daitekeen ikasle bakoitzaren talentu eta beharretara, arrakasta pertsonala eta kolektiboa sustatuz”.
Arrigorriagako Mendi Asteak emakumeen ahotsak ekarriko ditu Lamiaena eta Lonbo aretora
Otso baten antza duen txakur bat bilatzen ari dira Zeberion
Kuantika ardatz izango du aurten Etxebarriko Zientzia Asteak bere hamargarren urteurrenean
Argazkiak | Ehun arrigorriagar baino gehiagok Heidelberg enpresan gertatutako heriotza-istripua salatu dute herriko plazan
Argazkiak | Aldatxa eta Urbiko Lagunak, Basauriko jaietako buruhandienak!
Argazkiak | Jaietan etenaldia egin dute ehunka basauriarrek Palestinari elkartasun keinu bat egiteko
Bideoa | Dozenaka pertsona elkartu dira Arrigorriagan Heidelberg enpresan gertatutako lan-heriotza salatzeko
Bideoa | Berbalagun egitasmoa martxan da Basaurin eta Galdakaon, nobedade askorekin
