Sareak

☉ Hego Uribe

Mugimendu Feminista: “Greba deitzen dugu emakumeak zapaltzen gaituztelako toki askotan”

Greba feminista deitu dute nazioartean martxoaren 8an, baita Hego Uribe eskualdean ere. Basaurin eta Galdakaon manifestazioak izango dira.

|

basauri m8 greba feminista 2018 biki pozo eta iraia biteri elkarrizketa
Biki Pozo Gonzalez eta Iraia Biteri Ugarriza Marieneako asanblada batean // Maider Ibañez Espinosa

Greba feminista deitu dute nazioartean martxoaren 8an, baita Hego Uribe eskualdean ere. Basaurin eta Galdakaon manifestazioak izango dira

Emakumeok* Planto lemapean, nazioarteko greba egingo da martxoaren 8an, eta herriz herri antolatutako ekintzekin osatuko dituzte deialdi nagusiak. Lau esparrutan jarriko dute fokua aurtengo greban: zaintza greba, lan greba, kontsumo greba eta ikasle greba. Egun osoko greba izango da batzuentzat eta beste batzuentzat bi lanuzte iragarri dituzte, bata goizean (11:00etatik 15:00etara) eta bestea arratsaldean (18:00etatik 22:00etara). Grebari babesa erakusteko tresna gisa, besoko morea jantzi eta amantalak balkoi edo leihoetan zintzilikatzeko eskatu du Euskal Herriko Mugimendu Feministak. Egun horretan ez kontsumitzeko deia ere egin dute, “bereziki enpresa eta saltoki handietan”.

Biki Pozo Gonzalez (Donostia, 1980) eta Iraia Biteri Ugarriza (Basauri, 1977) Basauriko Mugimendu Feministako kideak dira eta martxoaren 8ko greba feministaren inguruan aritu dira Geurian.

Bihar martxoaren 8a. Zer egingo da Hego Uribe eskualdean egun horren harira?
Bilbon zerbait antolatu dute eta guk ere zerbait egin nahi izan dugu eskualdean. Zentzu horretan, manifestazioa egingo da Basaurin 11:30ean eta Galdakaon 12:00etan. Basauriko ibilbidea izango da: Eskarabilera estatua, Begoñako Andra Mari (estatua), anbulatorioa, Lanbide, Benta, La Plaza merkatua, Astoak, Gizarte Segurantzaren bulegoa, udaletxea eta Marienea. Begoñako Andra Mari oinezkoentzako kalean dagoen estatua puntu hori bihurtu nahi dugu gure. Dagoeneko, azaroaren 25eko ekitaldi sinbolikoa bertan egin genuen, eta emakumeoi eragiten digun zerbait gertatzen denean, bertan elkartzea erabaki dugu. Kalean gure presentzia bermatu nahi dugu.

M8ko egitarauak prestatzeko eskualdean asanblada irekiak deitu dituzue.
Basauriren kasuan, hiru asanblada ireki egin dira otsailean eta, egia esanda, nahiko arrakastatsuak izan dira hirurak. Lehenengoan (otsailaren 1ean) eskualdeko 50 emakume inguru batu ginen, eta beste hainbeste bigarrengoan (otsailaren 15ean). Batez ere, jendea testuinguruan kokatzea izan da asanbladen helburua. Zehazki, M8ko Greba Feminista zertan datzan eta eskualde bezala zer ekintza egin zitezkeen mahai inguruan jarri. Euskal Herri mailako planteamendua izan da indarra duten herrietan eta hirietan zerbait egitea 12:00etan.

Zein erantzun jaso duzue asanbladetan?
Asanblada deitu genuenean pentsatu genuen Basauriko herritarrak baino ez zirela etorriko, baina eskualdeko ordezkapena ere egon zen: Etxebarri, Ugao, Galdakao, Aperribai, Usansolo edota Orduñatik, Orozkotik eta Laudiotik ere etorri ziren. Arrakasta handia izan dute asanbladek. Betidanik harremana izan dugun talde eta elkarteak deitu genituen asanbladetara etor zitezen, baita Marieneatik egunero pasatzen diren norbanakoak ere. Aipatzekoa da Marieneatik erabiltzaile asko pasatzen dela, ez bakarrik Basaurikoak baizik eta baita ingurukoak ere. Eskualdean indar handia dago eta ekitaldi potenteak bultzatuko ditugu emakumeok Hego Uriben, Euskal Herrian zein Estatuan.

Alegia, indarrak batzea funtsezkoa dela.
Garrantzitsua da emakumeon artean indarrak batzea. Mobilizazio nagusienak Euskal Herriko hiriburuetan izango dira eta denak izango gara hara begira, baina inportantea ere bada zure auzo, herri, eskualdean mugitzea.

Eskualdeko beste herrietan ere manifestazioak deitu dituzte?
Eskualdeko beste herri batzuek, Basaurin bezala, asanblada irekiak antolatu dituzte -esaterako, Galdakaon-, eta bertako elkarteek edo norbanakoek erabaki dute herri bakoitzean beste ekitaldi batzuk antolatu edo Basaurira etorri goizeko manifestaziora. Galdakaon, adibidez, manifestazioa ere egingo dute 12:00etatik aurrera udaletxeko plazatik abiatuta.

Aurreko urteetan Bilbora manifestaziora joan ordez, eskualdeko herri bakoitzean egin izan dituzte ekitaldi sinbolikoak. Era berean, Ugaokoek esan ziguten kotxe karabana egingo zutela martxoaren 8a baino lehen, mobilizazioen aurrekari moduan eta zarata egiteko, eta hala egin dute.

Pare bat egunetan mahai informatiboak jarri ditugu Basaurin eta badakigu eskualdean ere ipini dituztela, adibidez, Galdakaon. Greba Feminista zertan datzan azaltzeko jarri ditugu mahai informatiboak. Batez ere, azaltzeko zergatik emakumeak bakarrik deituta gauden greba egitera.

Iaz martxoaren 8an Basaurin antolatu zuten kontzentrazioa // Geuria

Grebak lau zutabe ditu: lan, zaintza, kontsumo eta ikasle greba. Zein da esparru bakoitzaren aldarrikapena?
Ikasleek euren aldetik asanblada propioak dituzte eskoletan zein unibertsitateetan, eta orokorrean emakumea, gaztea eta eurek daukaten etorkizun ilun horren harira mobilizatuko dira. Kontsumorako grebari dagokionez, kontsumo masifikatua izango da ardatza: zer motatako kontsumoa egiten dugun, zer kontsumitzen dugun, kontsumitzen dugunaren produkzioren atzetik zein zapalkuntza eta esplotazio lan dauden, batez ere emakumeen lana dena. Emakume langileen grebak argi dago zer aldarrikatzen duen: adibide batzuk ematearren, oraindik ere gizonezko baten lanpostu berean egonda %35 gutxiago kobratzen dugu emakumeok zenbait kasutan, edo lan egiterako orduan produkzioarekin edo zaintzarekin zerikusia duten lanak egokitzen zaizkigu.

Emakume errefuxiatuekin eta emakume etorkinekin egiten ari den basakeria ere salatu nahi dugu. Mila arrazoi daude greba feminista hau egiteko, eta asko oso larriak dira.

Mobilizatu ezin diren emakumeak ere atxiki daitezke grebara.
Hala da. Paroa egin ezin duten emakumeak (esaterako, zaintza-lanak egiten dituzten emakumeak edo lan prekarioetan daudenak) ere atxiki daitezke manifestazio deialdira, egun osoan zehar besoko more bat jantziz. Greba egingo dugunok ere hura jantziko dugu euren alde solidaritatea adieraziz. Era berean, balkoietan edo leihoetan amantalak eskegitzeko deia egiten dugu, etxeko lana ere lana dela adierazteko. Izan ere, oraindik ere batzuek ez dute hori lan bezala kontsideratzen. Txapak ere egingo ditugu.

Gizonek zer egin dezakete mobilizazioarekin bat egiteko?
Euskal Herriko Mugimendu Feministak dokumentu txiki bat argitaratu du greba feministan gizonek zer egin dezaketen zehaztuz. Batik bat greba emakumeena izango da. Dena dela, badaude moduak gizonek ekarpenak egiteko eta greba arrakastatsua izateko. Esate baterako, aita bazara, seme-alabak zaindu; laguna bazara, zure burua eskaini emakume baten seme-alabak zaintzeko; lanean erantzukizunak badituzu, ez jarri oztoporik greba egiteko eta ez jarri zigorrik grebalariei; ikaskidea bazara, erakutsi babesa deialdiari; edota irakaslea bazara, ez irakurri zerrenda.

Ildo horretan, Bilboko asanbladara ikasleak etorri ziren eta esan zuten pira kolektiboa egingo dutela martxoaren 8an, eta noski, mutilek ere parte hartu nahi dutela. Neskei protagonismorik kendu gabe, badakite greba norena den eta zein xede dituen.

“Mundua geldituko dugu mundua mugitzeko” dio lemak.
Hala da. Emakumeon aldetik sistema kapitalista guztia geldiarazi egingo dugu greba feministaren bitartez. Emakumeok jasaten dugun zapalkuntzarik handiena da kapitalismoa eta horri aurre egitea dagokigu, emakumeon indar guztiekin. Emakume askok sentitzen dute bere burua justifikatzeko beharra momentu zehatz batzuetan eta hori patriarkatuaren beste eragin bat da. Greba honekin azaleratu nahi duguna da emakumeak zapalduak garela esparru askotan, zokoratu egiten gaituztela hainbat lan prekariotan edota hil egiten gaituztela.

Zapalkuntza horren aurrean, zer egin?
Emakume bezala egoera prekarioak salatzen jarraituko dugu. Nik neuk leku pribilegiatu batetik hitz egiten dut: zuria naiz, lanpostu duina eta soldata duina ditut… Nik uste dut gizonek ere hasi behar dutela ikusten euren burua arazoaren parte bezala. Berdintasunerantz egiteko erantzukizuna ez da bakarrik emakumeona, gizonek ere esku hartu behar dute. Hala ere, emakumeon aldeko borrokan sarea gero eta handiagoa da.

Mugimendu feministak indar handia du eta momentu oso polit batean dago. Zilegitasuna daukagu, errealitatetik hitz egiten dugulako eta ez hipotesietatik.

Eta zilegitasun horretan Marienea dago.
Baina Marienea sortu aurreko egoera ere oso garrantzitsua izan zen, baita Basaurin ere. Gaur egun Marienea emakumeon elkargunea da, eskualdeko emakumeon bilgunea. Irekia eta guztiz irisgarria da. Azken finean, emakumeon etxea da, gure etxea. Gurea da, denona da, emakume guztiek sentitu beharko lukete berea, halaxe delako eta halaxe sentitzen dugulako bertan gaudenok.

Eta grebaren ostean, zer?
Lehendabiziko greba feminista hau hazi bat izango da. Ea zein erantzun duen eta zein inpaktu izan duen gizartean eta Hego Uribe eskualdean. Argi geneukan ez genuela Martxoak 8a Basaurira mugatu nahi eta horregatik zabaldu genuen deia eskualdean, jakinda eskualdeko herri batzuetan ere gauzak antolatzen dituztela egun horren harira. Esate baterako, Etxebarriko neska gazte batzuk Marieneara etorri ziren asanblada batera eta esan ziguten Basaurira etorriko zirela mobilizazioetara.

☉ Hego Uribe

🔴 Zuzenean / 23. Korrika eta Hego Uribeko streaminga, GEURIAn

|

Hego Uribeko AEKko irakasleak 22. Korrikan // Geuria

Heldu da eguna! 23. Korrikari hasiera emango diote gaur Irunen eta hamar egun ondoren, martxoaren 24an bukatuko da Baionan.

Apirilaren 14ko hasiera ekitaldia Irundik zuzenean GEURIAn jarraitzeko aukera egongo da.

Hasiera ekitaldiko emisioa 15:00etan hasiko da eta behin mezua lekuko barruan sartuta, 16:00etan abiatuko da Korrika.

Era berean, ibilbide osoko kilometro guztiak ere ikusteko aukera egongo da GEURIAn, EITBren seinalearen bitartez.

Korrika Hego Uribetik

Martxoaren 21ean eta 22an igaroko da euskararen aldeko ekimena Hego Uribe eskualdetik: ostegunean Usansolon, Galdakaon, Etxebarrin, Basaurin eta Arrigorriagan, eta ostiralean, Ugaon eta Zeberion.

Beste urte batez, Zaratamotik bertatik ez da pasako Korrika, baina bertako herritarrek eta erakundeek bat egingo dute ekimenarekin beti bezala.

Aurten Hego Uribe eskualdean egun argiz disfrutatu ahal izango dugu Korrikaz. Izan ere, martxoaren 21ean 12:00etatik 15:00etara bitartean igaroko da ekimena eta martxoaren 22an 13:00etatik 14:30era.

GEURIAtik jarraipen berezia emango diogu Korrikari, Hego Uribeko Korrika Kulturalari, eta bideoak eta argazkiak argitaratuko ditugu.

Hego Uribe eskualdean 23. Korrikak egingo duen ibilbidea, mapak eta ordutegiak HEMEN.

Osorik irakurri

☉ Hego Uribe

Zolloko taberna-jatetxea berriz zabalduko dute larunbatean

|

Zolloko Elexalde auzoan dago taberna / Arrankudiaga-Zolloko Udala

Arrankudiaga-Zolloko Udalak lehiaketa publikora atera zuen Zolloko Elexalde auzoan dagoen taberna-jatetxearen errentamendua. Udal ordezkariek azaldu zutenaren arabera tabernak “ostalaritzaz harago doan balioa dauka”, auzotarrentzat “eguneroko elkargune bat” den heinean. Nabarmentzekoa da XIX. mendetik zerbitzua eman duen taberna dela, eta azken bi hamarkadetan errentari berbera izan duela. Horrek erakusten du, Arrankudiaga-Zolloko Udalaren arabera, negozio “egonkorra” dela.

Udalak lokala txukuntzeko lanak hartu zituen,  eta behin lanak eta esleipena bukatuta, larunbatean zabalduko ditu berriz bere atea jatetxeak. Kontratuak bost urteko epea izango du eta beste hiru urtez luzatzeko aukera egongo da. Kontutan hartu dituzten beste hainbat aldagai ere badaude: alde batetik, taberna gutxienez bost egunez egon beharko da zabalik, eta asteburuetan 10:00etatik 00:00etara doan ordutegia izan beharko du. Kasu honetan ere, interesdunek hobekuntzak proposatu ditzazkete.

Bestetik, sortuko den lanpostu kopurua, zerbitzarien euskara maila edota tokiko produktuak baliatzea ere kontutan hartu diren aldagaiak izan dira.

Osorik irakurri

☉ Hego Uribe

Agenda / Badator Korrika Hego Uribe eskualdera!

|

Korrika 2022an Usansolotik igaro zeneko momentu bat // Geuria

Martxoaren 21ean eta 22an igaroko da 23. Korrika Hego Uribe eskualdetik: ostegunean Usansolon, Galdakaon, Etxebarrin, Basaurin eta Arrigorriagan, eta ostiralean, Ugaon eta Zeberion. Ibilbidea, mapak eta ordutegiak HEMEN.

Aurten Hego Uribe eskualdean egun argiz disfrutatu ahal izango dugu Korrikaz. Izan ere, martxoaren 21ean 12:00etatik 15:00etara bitartean igaroko da ekimena eta martxoaren 22an 13:00etatik 14:30era.

23. Korrika gurera iritsi bitartean hamaika jarduera antolatu ditu Hego Uribeko AEKk. Era berean, martxoaren 21ean eta 22an bertan ere ekintzak izango dira egun osoan zehar eskualdean, eta ondorengo egunetan ere.

Martxoaren 24an Baionan bukatu da euskararen aldeko lasterketa erraldoia eta Hego Uribetik autobusak antolatu ditu eskualdeko AEKk.

Agenda / Korrika Kulturala 2024

ARRIGORRIAGA
MAR 17 / IGANDEA
PILOTA PARTIDUAK
10:30 Anbulategiko frontoia

KORRIKA ARROPA ETA PETOAK SALGAI, TALOAK, HERRI KIROLAK, MUSIKA, DANTZALDIA
12:00 Argala plaza

EH-KO PRODUKTUEN ZOZKETA ETA AGUR BERTSOA
15:00 Argala plaza

MAR 21 / OSTEGUNA
IZOZKIAK ETA DISKOFESTA TXIKIENTZAT
17:00 Argala plaza

BERTSO POTEOA: IKER GARITAGOITIA, MIREN AMURIZA, ONINTZA ENBEITA, PEIO MOLINUEVO
19:00 Argala plaza

 

BASAURI
MAR 10 / IGANDEA
KORRIKA POTEOA: ORKRESTA ELEKTROTXARANGA
12:00 Thomas tabernatik

SAN MIGEL KANTARI
13:00 Lorien tabernatik

MAR 17 / IGANDEA
HALTEROFILIA ERAKUSTALDIA
11:00 Solobarria

AGINTZARI DANTZA TALDEAREN EMANALDIA
12:00 Solobarria

PAELLA TXAPELKETA: PAELLAK AURKEZTEA
14:00 Solobarria

BAZKARIA ETA ZOZKETA
14:30 Solobarria

BASAJAUN ERROMERIA
17:00 Solobarria

MAR 18 / ASTELEHENA
KORRIKA TXIKIA ETA HAURRENTZAKO JAIALDIA
15:30 Solobarria plazatik

MAR 21 / OSTEGUNA
HAUR BERBENA
15:00 Sofia Taramona ikastetxea

MAR 22 / OSTIRALA
BOZGOIRAILU-POTEOA GAZTEEN ESKUTIK
19:00 Elexalde tabernatik

BADON OPERA POSTDRAMATIKOA
20:00 Social Antzokia

 

ETXEBARRI
MAR 16 / LARUNBATA
FAMILIAN EUSKARAZ: ESKULANAK
11:00 Elkartegunea (Bekosolo parkea)
Izen-emateak: etxebarrikoarpela@gmail.com

MAR 22 / OSTIRALA
KORRIKA TXIKIA (GOIZEZ)

KORRIKA JAIA
Udaletxeko plaza
18:00 Burbuila erraldoiak
19:00 Txokolatada
19:30 Basajaun erromeria

 

GALDAKAO
MAR 14 / OSTEGUNA
BIZKARSORO FILMAREN EMANALDIA
10:00 Musika Eskolako zinema aretoa

MAR 15 / OSTIRALA
KORRIKA TXIKIA
10:00 Urreta ikastetxetik: Bizkai kalea, Juan Bautista Uriarte, Pontzi Zabala, Gipuzkoa, Juan Bautista Uriarte, Zamakoa, Urki, Iturrondo

UMEENTZAKO IKUSKIZUNA
10:30 Iturrondo. Euria bada, fronoian

BARIKU-PASA
16:30 Bengoetxeko Jubilatuen etxean

PINTXO-POTEA EUSKARAZ
19:30 Baztartxue, Lorea, Osterri, Wagon eta Mega Dinamic

FLASHMOB: TAUPADAK DANTZA ESKOLA
19:00 Iturrondo plazan

GALDAKAO KANTARI
20:00 El Ingles tabernatik

GOTX ELEKTROTXARANGA
20:30 Zehazte

MOZOILO IRRATIA DJ
21:00 Urreta parkean

MAR 16 / LARUNBATA
MENDI IBILBIDEA (6 KILOMETRO)
10:00-12:00 Lau irteera: Aperribai, Bengoetxe, Urreta eta Kurtzea

PUZGARRIAK
11:00-14:00 Kurtzeko plaza. Euria bada, Gandasegiko arkupeetan

PILOTA PARTIDA MISTOA ETA TXISTORRA-JANA
12:00 Kurtzeako frontoia

ANDRA MARIKO MUSIKARIEN KALE ANIMAZIOA
13:00 Kurtzeko plaza

HERRI BAZKARIA
15:00 Gandasegiko arkupeak. Tiketak salgai AEKn, Herriko Bentan eta Baserri tabernan

KONTZERTUA: GAUALDEKO HASPERENA
17:00 Gandasegiko arkupean

OIHAN VEGA DJ
22:00 Kurtzeko plaza

MAR 17 / IGANDEA
BIZKARSORO FILMAREN EMANALDIA
19:00 Musika Eskolako zinema aretoa

MAR 21 / OSTEGUNA
MOZOILO IRRATIKO DJ
11:00 Aperribaiko eskolako patioan

 

UGAO
MAR 22 / OSTIRALA
11:00 KORRIKA TXIKIA

17:00 BURUHANDIEN KALEJIRA

UMEENTZAKO HERRI KIROLA: ARTZAINA
18:00 Plaza

ERROMERIA: GAUTEGUN
20:30 Plaza

 

USANSOLO
MAR 15 / OSTIRALA
PUZGARRIAK ETA GIZA-ANTZAR JOKOA
17:00 Unkina plaza. Euria bada, Unkina plazako frontoian

GAITEROEN ETA BURUHANDIEN KALEJIRA
19:00 Unkina plazatik

MAR 16 / LARUNBATA
PILOTA PARTIDUAK
11:00 Unkina plazako frontoia

TXISTORRA-JANA, UME BERTSOLARIAK ETA UMEENTZAKO HERRI KIROLAK
13:30 Unkina plaza. Euria bada, frontoian

INUDEA ETA ARTZAIN KALEJIRA
18:00 Herrian zehar

FANFARRE BETIJAI TXARANDA
18:30 Unkina plazatik

TXOKOLATADA
19:30 Unkina plaza

DJ PEREZ
21:00 Unkina plaza

MAR 17 / IGANDEA
MENDI IRTEERA
09:30 Unkina plazatik

MAR 21 / OSTEGUNA
DJ ALAI UMEEN IKUSKIZUNA
15:00 Unkina ikastetxea

 

ZARATAMO
MAR 16 / LARUNBATA
POTEO MUSIKATUA, UMEENTZAKO JOLASAK ETA LEKUKOAREN ZOZKETA
12:30 Elexaldeko plaza

BIRKARSORO PELIKULA ETA EGILEEKIN SOLASALDIA
18:30 Elexaldeko Kultur Etxea

MAR 17 / IGANDEA
E-MC-UMEAK: MARIA RIVERO ETA ITXASO PAYA
18:00 Elexaldeko Kultur Etxea

 

ZEBERIO
MAR 22 / OSTIRALA
15:00 BERTSOAK: ESKOLAKO UMEAK

15:30 BAZKARI HERRIKOIA: NORBERAK DAKARRENA

16:30 KARAOKEA

17:00 TXOSNAREN IREKIERA

19:00 ORKRESTA ELEKTROTXARANGA

19:30 TXISTORRADA

 

HEGO URIBE
MAR 21 / OSTEGUNA
KORRIKA HEGO URIBEN: IBILBIDEA ETA ORDUTEGIA HEMEN!

MAR 24 / IGANDEA
BAIONARA AUTOBUSA BASAURITIK, GALDAKAOTIK ETA USANSOLOTIK (15 EURO)
08:00 Basauri (San Jose ikastetxeko autobus geltokia)
08:15 Galdakao (Ardanza parkea)
08:30 Usansolo (Laminarrietako autobus geltokia)
19:30 Itzulera

BAIONARA AUTOBUSA ARRIGORRIAGATIK ETA ZARATAMOTIK
Info gehiago: 666 193 859

Osorik irakurri

☉ Hego Uribe

Athleticen Kopako finala ikusteko pantailak jarriko dituzte Hego Uribe eskualdean

|

Apirilaren 6ko finalean pantailak jarriko dituzte Arrigorriagan, Abusun, Basaurin, Etxebarrin, Galdakaon eta Zeberion, eta asmoa dute Ugaon ere jartzeko // Athletic Club

Apirilaren 6an jokatuko du Athleticek Kopako finala Mallorcaren aurka Sevillan, La Cartujan. Hego Uribetik autobusak antolatu dituzte Sevillara joateko eta jaiaz bertatik bertara gozatzeko.

Hala ere, eskualdean bertan geratuko den jende asko ere egongo da. Horientzat pantaila handiak jarriko dituzte Arrigorriagan, Abusun, Basaurin, Etxebarrin, Galdakaon eta Zeberion. Era berean, Ugaon ere asmoa dutela jakin ahal izan du GEURIAk.

Pantailen kokapenak zein tokitan jarriko dituzten zehazteke dute Udalek. Aurrerago emango dute kokapenen berri.

Osorik irakurri

☉ Hego Uribe

ZOZKETA / Nafar hegoaldeko produktu ekologikoekin bi saski, Errigora eta Geuriaren eskutik

|

Errigorak 10 urteotan zehar ekoizlearen jatorrizko prezioan, euskaraz etiketatuta eta auzolanean lan egin du // Errigora

ZOZKETA EGINDA / Otsailaren 25ean eman zioten hasiera Errigoraren kanpaina berriari: Nafar hegoaldeko uzta eskutik eskura, eta Eutsi gureari lemapean. “Eusteko, zeri eta gureari. Baina ez da dei bat lortutakoari, galtzeko beldurrez, atxikita gelditzeko deia da. Bada dei bat, baina egindako bideari begiratu, oinak gaurko lurrean sentitu eta aurrerako pausuak emateko deia”, adierazi dute Errigorako lagunek.

“Errigoraren Nafar hegoaldeko uzta eskutik eskura kanpaina bestela kontsumitzeko bide bat da, elikadura burujabetzara bidean pausoak emateko aukera bat.

GEURIAn bi saski zozketatuko ditugu, Errigoraren eskutik. Saskiek nafar hegoaldeko produktu ekologikoak dituzte.

Hau da parte hartzeko dinamika:

1️⃣ GEURIA Instagram, Facebook edo Twitter orrialdeko jarraitzaile izan.
2️⃣ Zein lagunekin egingo zenuke otordu eder bat? Zozketaren argitalpenean zure lagun bat etiketatu.
3️⃣ Elkarbanatu posta zure story-etan eta Geuria aipatu. Horrela aukera gehiago saskia irabazteko!

Zozketan parte hartzeko epea zabalik dago martxoaren 13ra arte (12:00). Behin zozketan parte hartzeko epea itxita, hurrengo egunetan egingo dugu zozketa eta irabazleekin Instagram, Facebook edo Twitter bidezko mezu pribatu bidez jarriko gara harremanetan. Zorte on guztioi!

Irabazleak:

– Kutxa 1: oihaneco
– Kutxa 2: imemenza

“Elikagaien merkatuaren egoera oso gora-beheratsua izan da azken aldian, eta horrek guztioi harrapatu gaitu. Errigoraren ibilbide luze-laburrak irakutsi digu bestelako bideei ekiteko gaitasuna dugula. 10 urte horietan zehar ekoizlearen jatorrizko prezioan, euskaraz etiketatuta eta auzolanean ehundaka herritan gauzatu eta haziz joan den bestelako ekoizle-kontsumitzaile hartu-emana da erakusle argia”, diote Errigoratik, eta gaineratu dute: “Ametsak egi bihurtzea posible dela erakutsi dugulako, eutsi diezaiogun gureari!”.

Eskaerak martxoaren 13a baino lehen egin behar dira esteka honetan. Eskaera egiterakoan aukeratu behar duzu produktuak jasotzeko puntua eta bertan zehaztutako egun eta ordutegian pasa beharko duzu jasotzera. Hego Uribe eskualdeko hainbat puntutan ere eros daitezke kutxak. 

Osorik irakurri