→Basauri

Arkaitz Serrano: “Futbolari edo modelo? Etorkizunean modelo izan nahiko nuke”

basauri arkaitz serrano 2018 futbolari modelo

Elite Model Look ekitaldiko finalaurrekoetan parte hartuko du Arkaitz Serrano basauriarrak Bartzelonan. Finalerako txartela lortzekotan Milanera joan beharko luke.

Arkaitz Serrano San Migelen, bere auzoan // Geuria

Elite Model Look ekitaldiko finalaurrekoetan parte hartuko du Arkaitz Serrano basauriarrak Bartzelonan. Finalerako txartela lortzekotan Milanera joango da

Arkaitz Serrano (Basauri, 2001) sanmigeldarrak ez ditu oraindik hogei urte bete, baina bere etorkizuna argi du. Futbolaria da Usansoloko Umore Onan, baina modelo izan nahi du. Ekainaren 29an Elite Model Look ekitaldiko finalaurrekoan parte hartuko du Bartzelonan. Fase hori gainditzen badu, Milanen (Italia) uztailean ospatuko den finalerako txartela lortuko luke.

Futbolaria zara, baina modelo izateko bidean zaude.
Txikitan hasi nintzen futbolean: hasieran San Migeleko futbol taldean, gero Etorkizuna (Arrigorriaga), Ariz eta Indartsu taldeetan egon naiz. Egun, Usansoloko Umore Onan nabil, gazte mailako bigarren urtean. Baina, bai, gaur egun nire benetako pasioa modelo izatea da. 

Noiztik datorkizu zaletasun hori?
Bi urte inguru daramatzat modelo izateko lan egiten. Egia esan, ezustean etorri zitzaidan zaletasun hau. Instagram sare sozialaren bitartez mezu bat jaso nuen ea nahiko nukeen Bartzelonara joan argazki-saio bat egitera. Nire gurasoei komentatu nien eta aurrera egitea erabaki nuen. Momentu hori iritsi arte ez nekien ezta zer zen pasarela bat ere! (kar, kar, kar)

Elite Model Look, nazioarteko lehiaketaren webgunea / elitemodellook.com

Mezu hori jasotzea harrigarria egingo zitzaizun…
Erabat. Harrituta geratu nintzen, shockean. Sorpresa handia izan zen. Gurasoekin batera hartu nuen erabakia. Hasieran zaletasun bezala ikusten nuen, mundu honek nola funtzionatzen duen ikasteko, baina Bartzelonan egin zidaten argazki-saioa asko gustatu zitzaidan eta danok erabaki genuen etorkizunerako bide bat izan zitekeela.

Zein lan egin dituzu modelo bezala?
Batik bat moda desfileetan eta argazki-saioetan parte hartu dut. Esate baterako, Donostiako San Telmo Museoan Afrikatik arropa markako desfilean parte hartu berri dut hilabete hasieran. Lehen aipatu bezala, ikasketa-prozesu bat bezala ikusten dut hau. Donostiako First Model agentziarekin ari naiz lanean.

Ildo horretan, Elite Model Look ekitaldian parte hartuko duzu laster.
Ekainaren 29an ospatuko dira Elite Model Look ekitaldiko finalaurrekoak eta bertan parte hartuko dut. Argazki-saioak eta elkarrizketak egingo dizkigute parte-hartzaile guztioi. Ekitaldiko antolatzaileek guri buruz dena jakin nahi dute: gure modelorik gogokoena, zergatik, ikasketak, hizkuntzak edota kirolen bat praktikatzen dugun, besteak beste. Gero epaimahaiak hurrengo fasera igaroko direnak hautatuko ditu. Beste fase hori egunean bertan izango da eta partaideek bainujantzian desfilatuko dute. Ondoren, finalerako hautaketa egingo dute.

Nola ikusten duzu zure burua finalaurrekoetan?
Ba egia esan ez dut horretan asko pentsatu. Ondo pasatzera noa Bartzelonara, irakatsi didatena praktikan jartzera eta momentua bizitzera. Finalaurrekoetan aurrera egiten badut eta finalera banoa, ezin hobeto, baina ez badut fase hau gainditzen, ez da ezer pasatzen. First Models agentziarekin jarraituko dut eta orain arte egin dudan lana egiten jarraituko dut.

Noiz ospatuko da Elite Model Look ekitaldiko finala?
Finala uztailaren 13an izango da Milanen, Italian. Elite Model Look ekitaldiko modelorik onenak bilduko dira bertan, emakumezkoak zein gizonezkoak. Normalean, gizonak baino emakume gehiago daude finalean.

Eta genero berdintasunik ba al dago modeloen munduan?
Betidanik egon da emakume gehiago mundu honetan eta gaur egungo egoera antzekoa da. Egia da gero eta gizon gehiago animatzen direla pasarelen munduan lan egitera. Berdintasuna arlo guztietan sustatu behar dela deritzot, adibidez, moda-merkatuan salgai jartzen diren produktuen gehiengoa emakumeei zuzendutakoak dira, merkatu handia dago bertan, eta produktu horiek guztiak saltzeko emakumeak kontratatzea dira, eta ederto. Orain ari dira apurka-apurka gizonentzako produktu gehiago merkaturatzen eta horiek saltzeko gizonok egin beharko dugu lan. Merkatu berri bat irekitzen ari da, baina motel dabil. Soldatari dagokionez, emakumeek orokorrean gizonek baino gehiago irabazten dute, eta ondo deritzot, gehiago lan egiten dutelako eta urte asko daramatzatelako mundu honekin borrokan.

Futbola ala modelajea aukeratzeko esango banizu…
Momentuz biak aukeratzen ditut. Bi adarrak ditut gustuko, eta biak batera aldi berean egin ditzakedan bitartean, biak egingo ditut. Ez dut zalantzarik momentuz. Gero etorriko dira hartu beharreko erabakiak.

Eta momentu hori iritsiko denean, zer?
Uste dut modelajeari helduko diodala. Futbolari edo modelo izateko aukeratu behar badut, etorkizunean modelo izan nahiko nuke. Mundu berri bat deskubritu dut eta oso gustora nabil.

Gora

Geuria Laguntzaileak Geuria Laguntzaileak