→Basauri

[Udal hauteskundeak 2015] Basauriko hautagaiak

basauri hauteskundeak hautagaiak argazkiak 2015

Maiatzaren 24an udal eta Batzar Nagusietarako hauteskundeak ospatuko dira. Basaurin sei alderdi nagusi aurkeztuko dira: EAJ-PNV, PSE-EE, EH Bildu, PP, Irabazi Basauri eta Basauri Bai. Hona hemen hautagai bakoitzaren profila:

ANDONI BUSQUET – EAJ-PNV 

Adina: 48 urte

Ikasketak: Pedagogian lizentziatua eta Heziketa Sozialean diplomatua

Hizkuntzak: euskara eta gaztelania

Oraingo alkateak aitortu du alkatetzara aurkeztu zen lehen aldian ilusioz beteta bazegoen ere, “une honetan ilusio hori bikoiztu egin da hainbat jarduera estrategiko jarri ditugulako martxan, eta oraindik kudeaketa lan eraginkor eta gardena behar dute eta errealitatez eraikitako politika, egitasmo horiek guztiak garatu ahal izateko“. Lau urte hauetan ere, udalerriko elkarte eta taldeekin etengabeko harremanaren bidez, EAJren udal taldeak herritarren parte hartzea bultzatu izan du etengabe bere gobernuaren jardunean.

SORAYA MORLA – PSE-EE

Adina: 43 urte

Ikasketak: Ikerketa Pribatua ikasten UNED bidez

Hizkuntzak: gaztelania

Kultura zinegotzia Loly de Juanen udal agintean. Egun, Basauriko talde sozialistaren Antolakuntza idazkaria. “Ilusioz eta lan egiteko gogo handiekin” aurkezten da 2015eko udal hauteskundeetara. “Lau urte hauetan Basaurik ez du hobekuntza nabarmenik izan eta kulturan eta aisialdian murrizketak izan ditu”. Horren aurrean, “Herritarren kontratua” martxan jarri nahi du: Basauriko BEZ kulturala %21etik %5era murriztu eta diferentzia bonoekin ordezkatu, doako WiFi sarea eratu eta herritarrentzako bulegoak sortu: ustelkeriaren kontrakoa, funtzionarioen defentsakoa eta desjabetzen aurkakoa.

NATALIA GARDEAZABAL – EH Bildu

Adina: 47 urte

Ikasketak: Ingeles Filologian eta Historian lizentziatua

Hizkuntzak: euskara, ingelera eta gaztelania

Bere lan politikoa emakumeen eskubideen defentsa aktiboarekin eta borroka feministarekin egon da bideratuta. EH Bildu Basauri koalizioaren programak “puntuz puntu” izena hartu du, helburua Basauri puntuz puntu eraldatzea delako. Horretarako, herritarren zein elkarteen eta erakundeen proposamenak hartuko dituzte kontuan.

GABRIEL RODRIGO – PP

Adina: 39 urte

Ikasketak: Zuzenbidean lizentziatua eta Hiri-Zuzenbidean diplomatua

Hizkuntzak: gaztelania

Iurretako Udalean zinegotzia (2003-2007), Arrigorriagako Udalean zinegotzia (2009) eta Trapagako Udalean PPko bozeramailea (2011-2015). “Basauriko PPren helburu nagusia langabezia tasa murriztea izango da, baita herriko merkataritza sustatzea, hirigunea sendotzea, periferiako auzoekin konexioak lantzea eta Pneumatikoak Jasotzeko Programa (2007-2011) berreskuratzea”.

JESUS SACRISTAN – IRABAZI BASAURI

Adina: 41 urte

Ikasketak: Batxillergoa eta Bigarren Mailako Heziketa Profesionala

Hizkuntzak: gaztelania

Herriko hainbat arlotan pertsona aktiboa. 1995etik aurrera Ezker Anitza talde politikoan ekintzailea. Irabazi Basauri alderdiaren punturik nabarmenenak: “Gardentasuna eta herritarren partaidetza, euskararen normalizazioa administrazio publikoan, garraio publikoaren eta bizikletaren erabilera bultzatzea, enplegu egonkorrak lortzea, etxebizitzen alokairua sustatzea eta desjabetzaren kontrako plataformekin harremanak indartzea, besteak beste”.

SERGIO RECIO – BASAURI BAI

Adina: 39 urte

Ikasketak: Kimikaria eta Bide-segurtasun irakaslea

Hizkuntzak: gaztelania

Reciok dioenez, “urteetan zehar ikusi dut nola Basauri pixkanaka-pixkana gainbeheran joan dela, batik bat udal gobernuek eraginda. Horrek alarma egoeran jarri du gizartea”. Horren aurrean, Basauri Bai alderdia gobernatzeko prest agertu da, “gardentasunez, herriko jendearekin eta bizilagunen proposamenak kontuan hartuta, bilkura eta etengabeko debate irekiak antolatuz”.

basauri hauteskundeak hautagaiak 2015

 

Gora

Geuria Laguntzaileak Geuria Laguntzaileak