☉ Galdakao
Mairi elkarte feminista berria eratu dute Galdakaon, “emakumeen artean aliantzak eraikitzeko”
Galdakaok elkarte feminista berri bat izango du aurrerantzean: Mairi emakume feminista batza. Ahalduntzeari buruz hausnartzeko eta, “emakumeen arteko aliantzak eraikitzeko” gunea izateko asmoz eratu dute elkartea.
Galdakaok elkarte feminista berri bat izango du aurrerantzean: Mairi emakume feminista batza. Ahalduntzeari buruz hausnartzeko eta, “emakumeen arteko aliantzak eraikitzeko” gunea izateko asmoz eratu dute elkartea. Batza honen helburuak izango dira emakumeen aurkako indarkeria salatzea, biktimei laguntza eta orientazioa eskaintzea, eta genero indarkeriaren inguruko jarrerak, mitoak eta estereotipoak desagerraraztea.
“Mugimendu feminista sustatuko dugu Galdakaon, emakumeen aurkako indarkeria salatuz; genero-indarkeriaren biktima diren emakumeentzat eskuragarri dauden baliabideei buruz lagunduko eta orientatuko dugu; eta, genero-indarkeriaren inguruko jarrerak, mitoak eta estereotipoak ere desagerraraziko ditugu”, dio Ane Valencia Laso Mairi elkarteko presidenteak. Begoña Ormaetxe -aurreko legegintzaldian Berdintasun zinegoztia izan zen- Mairiko presidenteordea izango da.
Izaskun Landaida Emakundeko zuzendaria eta Galdakaoko zenbait zinegotzia izan dira Mairi elkartearen aurkezpenean // Argazkia: Mairi
Gaur, azaroak 14, aurkeztu dute publikoki Mairi elkartea Gandasegiko areto nagusian. Bertan izan dira, besteak beste, Mairi emakume feminista batzako kideak, arlo sozial, kultural eta politikoko zenbait lagun eta Izaskun Landaida Emakundeko zuzendaria. “Emakumeen elkarteak funtsezko tresna eta tresna estrategikoa izan dira eta badira emakumeen eraldaketa eta ahalduntze prozesuetan”, dio Landaidak: “Emakumeen elkarteak espazio kolektiboak baino askoz gehiago dira, emakumeen bizitzak eraldatzen eta aldatzen laguntzen duten prozesuak ahalbidetzen dituzte. Beraz, emakumeen elkarte-mugimenduak norbanakoaren aldaketa prozesuetan eta, ondorioz, emakumeen eta gizonen arteko berdintasun erreal eta eraginkorraren eraikuntzan duen garrantzia nabarmendu eta ikusarazi behar dugu”.
Gaur egun Galdakaon talde feminista hauek daude indarrean: Momoak Talde Feminista, Usansoloko Talde Feminista eta Erabide Emakumeen Elkartea, besteak beste.
☉ Galdakao
Bigarren eskuko merkatu solidarioa antolatu dute Galdakaoko institutuek Kurtzeko plazan
Maiatzaren 17an izango da merkatua Kurtzeko plazan. Bilduko duten dirua GBGE elkarteari emango diote Galdakaoko institutuek
Bigarren eskuko merkatu solidarioa antolatu dute Galdakaoko institutuek Kurtzeko plazan maiatzaren 17an, ostiralez, 09:30etik 13:30era.
“Herriko institutuetan arropa, liburuak, jostailuak eta bitxiak biltzen ari gara merkatuan saltzeko eta lortuko dugun dirua GBGEri emango diogu”, adierazi diote GEURIAri proiektuko arduradunek: “Erakunde honek hainbat proiektu sortzen eta gauzatzen ditu gizarte-egoera ahulean dauden pertsonekin lankidetzan arituz”.
Merkatuak bat egingo du Birziklapenaren Nazioarteko Egunarekin (maiatzak 17): “Agenda 30 proiektuaren testuinguruan, iaz hasi ginen pentsatzen bigarren eskuko merkatu solidarioa antolatzea, eta aurten antolatuko dugu lehen aldiz ekintza eraldatzaile hau. Animatu zaitezte proiektu solidario honetan parte hartzera!”, diote.
☉ Galdakao
Burdin Hesitik ibilaldi gidatua antolatu dute Galdakaon, bonbardeketen 87. urteurrenean
Ibilbide gidatuaz gain, maiatzaren 19an bertan ekitaldi nagusia antolatu dute Plazakoetxen. Gainera, maiatzaren 15ean Gurseko errefuxiatuen kanpamenduaren inguruko hitzaldia emango du Jabi Bilbaok
Maiatzaren 19an 87 urte beteko dira faxistek Galdakao bonbardatu zutenetik, eta urtero bezala, ekitaldia antolatu dute Galdakaoko Udalak eta Galdakao Gogora elkarteak.
Ekitaldi nagusia Plazakoetxen izango da 13:00etan. Ohi bezala sirena hotsak entzungo dira eta lore-sortak utziko dituzte bonbardaketen memorialean.
Aurretik, 09:00etan ibilbide giudatua izango da Burdin Hesitik. Galdakao Gogora talde memorialistako kideen gidaritzapean, zazpi kilometro inguruko ibilbidea egingo da basotik, bertako lubaki, babesleku eta metrailadoreen habiak ikusiz eta horien inguruko azalpenak entzunaz.
Bestetik, maiatzak 15ean ‘Gurs: camp des basques’ hitzaldia eskainiko du Jabi Bilbao irakasle eta adituak. Hitzaldia 19:00etan izango da Torrezabalen.
Egitaraua / Galdakaoko bonbardaketak – 87 urte
Maiatzak 15, asteazkena
Hitzaldia: ‘Gurs: camp des basques’, Jabi Bilbao
19:00 Torrezabaleko erakusketa gela
Maiatzak 19, igandea
Burdin Hesitik ibilaldi gidatua: 7 kilometroko ibilbidea basotik
09:00 Kurtzeko plazatik
Oroimen ekitaldia
13:00 Plazakoetxe
Hainbat erle erlauntza bat egiten agertu dira Galdakaon. Inocencio Goikuria Iturriotz galdakoztarrak Lapurdi eta Juan Bautista Uriarte kaleen arteko zuhaitz batean erlauntza egiten zeuden momentuko irudiak publikatu ditu bere sare sozialetan.
Bideoarekin batera honakoa publikatu du Goikuriak: “Udaberriaren amaieran eta udan, erleen koloniak banatu egiten dira erlauntza berriak sortzeko. Jatorrizko erlauntza erle erregina gazte baten ardurapean geratuko da, eta kolonia berriro jendeztatu beharko du. Erle erregina zaharrena, berriz, erle langileen laguntzarekin leku berri baten bila aterako da. Erle erreginak, erle langileek eta zenbait zantarrek osatzen duten talde migratzaile honi erlauntza deitzen diogu”.
☉ Galdakao
Udaberriko Sormenek Amets Arzallus, La Basu, Aiko, Itxaso Paya eta Maria Rivero ekarriko ditu Galdakaora
Maiatzaren 16tik 19ra bitartean izango da Udaberriko Sormene Galdakaon, ‘Sortuz ahaldundu! Zazpi jauzi’ lemapean.
Booktuber ekitaldia, ikastetxeetako eta euskategietako ikasleen irakurtaldi jarraitua, hitzaldiak, mahai-inguruak, tailerrak, musika eta antzerkia antolatu dituzte.
Gaur aurkeztu dute Udaberriko Sormeneren egitaraua // Argazkia: Galdakaoko Udala
Gainera, Sormene abestiaren aurkezpena ere egingo dute. Hain zuzen ere, apirilean egitasmoari doinu propioa jartzeko lehiaketa abiarazi zuten eta maiatzaren 17an aurkeztuko dute Basoa tabernan.
Egitaraua / Udaberriko Sormene 2024
Maiatzak 16, osteguna
Booktuber ekitaldia
10:00 Maximo Moreno Musika Eskola
Maiatzak 17, ostirala
Ikastetxeen eta euskaltegien irakurtaldi jarraitua: ‘Miñan’ (Amets Arzallus eta Ibrahima Balde)
10:00 Torrezabal Kultur Etxea
Hitzaldia eta mahai-ingurua: ‘Bidasoa 2018-2023’ Fermin Muguruzaren dokumentala. Alaine Aranburu eta Amets Arzallus
10:00 Torrezabal Kultur Etxea
Kontzertua: La Basu + Sormene abestiaren aurkezpena
21:00 Basoa taberna
Maiatzak 18, larunbata
Marta Velascoren instalazioa: Hitzen euria
+ Musika zuzenean: Carmen Santamaria (pianoa) + Natalia Sanchez (flauta)
12:00 Muguru parkea
Helduentzako tailerra eta erromeria: Aiko dantza taldea
18:00 Kurtzeko plaza
Maiatzak 19, igandea
Antzerki musikala: ‘eMcumeak’ (Itxaso Paya eta Maria Rivero)
19:00 Torrezabal Kultur Etxea
☉ Galdakao
Galdakaoko Gazte Egunean gertatutako eraso matxista salatzeko elkarretaratzea deitu dute gaur
Maiatzaren 4an, larunbatez, Galdakaoko XII. Gazte Eguna izan zen, eta antolatzaileek salatu dutenez eraso matxista bat gertatu zen.
Horren aurrean, Udalak protokoloa aktibatu eta Momoak, Erabide, Erlantza, Ninaiz, Mairi eta Basandere talde feministek elkarretaratzea deitu dute gaur, maiatzak 9, 20:00etan Santi Brouard plazan.
“Zuen biolentziaz nazkatuta gaude! Berriz ere kaleak hartzeko momentua da!”, diote.
Galdakaoko Udalak erasoa “irmoki” salatu du eta adierazpen instituzionala publikatu dute udaltalde politiko guztien adostasunarekin. “Udalak babes eta laguntasun osoa adierazi nahi die erasoa jasan duen pertsonari eta haren hurrekoei”, diote.
Era berean, alderdi jeltzaleak gehitu duenez, “erasotzailea jaian parte hartzen zuten gizabanako batzuek babestu zuten, identifikaziorik izan ez zezan, Udaltzaingoaren lana larriki oztopatuz”.
Arrigorriagatik Martiarturainoko herriguneko bidegorri zatia urte amaiera baino lehen konponduko dute
Okindegi baten lantegia erre da Ugaoko Usila industrialgunean
Emakumeen Champions Leagueko kopa Basauriko Artunduaga kiroldegian dago gaur eta bihar
Argazkiak / Clown eta Pailazoen Nazioarteko jaialdiaren bigarren egunak algara eta hausnarketa uztartu ditu
Argazkiak / Abarka Eguneko bazkariak 900 lagun batu ditu Bentako jaien hasieran
Argazkiak / Mischa Bredewoldek irabazi du Itzulia Womeneko bigarren etapa Basaurin
Bideoa / Erlauntza handi bat agertu da Galdakaoko herrigunean
Bideoa / Etxebarriko Euskarazko Liburu eta Disko Azokak ateak zabaldu ditu bere 20. edizioan
