Herriak

Geuria jaio da Basaurin, Hego Uribeko herri komunikabide berria

Geuria aldizkaria 2014 urria

Oraintxe esku artean daukazun GEURIA da Basaurin sortu den Hego Uribe eskualdeko aldizkari berria. Basauriko Euskara Aholku Batzordearen eskutik sortu da, Udalak diruz lagunduta. Hamaika elkartek eta norbanakok parte hartu dute aldizkariaren erredakzio bileretan. Izan ere, herri aldizkaria da. Horietan, edukiak eta emandako trataera erabakitzen dute, bi langile arduradun direlarik.

Hilero 10.000 ale kaleratuko dira eta horiek Basaurin, Arrigorriagan, Galdakaon, Etxebarrin eta Zaratamon banatuko dira. Herri guztietako udaletxeetan eskuragai izango da, baita Basauriko kultur etxe, eskola, euskaltegi eta abarretan ere. Basaurin jaio den arren, helburua honako hau da: gainontzeko herrietako informazioa jorratu, banaketa esparrua zabaldu eta jendearen parte hartzea handitzea. Horretarako, lehen pauso moduan, Hego Uribe eskualdeko euskaldunon datu basea sortzea du helburu GEURIAk, eta izena ematen dutenei etxera bidaliko zaie aldizkaria hilero. Interesatuek izen-abizenak, helbide elektronikoa, etxeko helbidea eta telefono zenbakia bidali beharko dituzte info@geuria.net helbidera.

Hasiera batean, lau atal izango ditu aldizkariak: albisteak jasoko dituen Herriak atala; Iritziak, herritarrek bidalitako gutunak eta kolaboratzaileen idatziak izango dituena; Agenda; eta Aisia. Era berean, erreportajeak eta elkarrizketak ere landuko dira.
Herritarrek parte hartzeko aukera izango dute, bai albisteak edo gutunak bidalita, bai erredakzio bileretara etorrita. Erredakzio bileretan parte hartzeko, helbide elektroniko berdinera idatzi eta bileretan parte hartzeko asmoa agertzearekin nahikoa izango da deialdiak hilero jasotzeko. Komunikabidearen helburua jendearen parte hartzea sustatzea da. Izan ere, askotariko iritzi eta ekarpenekin hedabide aberatsagoa izango dugu eskuartean.

HEGO URIBEN IZANDAKO AURREKARIAK
1987. urtean Basauriko lehenengo aldizkaria plazaratu zen: El Social. Gaztelaniaz idazten zen, baina bederatzi urteren buruan, euskaraz eginiko gehigarria aurkeztu zuen, Berbaz izenekoa. Hiru urteko biziraupena besterik ez zuen izan (1996-1999). Izan ere, sortu zen urte berean Bost Axola aldizkariak argia ikusi zuen. Publikazio honek bi aldi izan zituen: lehenengoa, 1996ko martxotik azarora bitartekoa, eta bigarrena, 1997ko maiatzean hasi eta 1998ko apirilera artekoa.

Euskarazko hedabiderik gabeko bi urteko parentesiaren ondoren, 2000. urteko abenduan, Asier Lejarza El Social-eko arduradunak euskara hutsezko herri aldizkaria kaleratu zuen, bere aurrekarien alde positiboak eta negatiboak kontutan hartuta. 2004ko ekainean, ordea, betiko itxi zen El Social, Basauriko aldizkaria.

2003ko abenduan, Arrigorriaga, Arrankudiaga, Ugao eta Zaratamori buruzko informazioa biltzen zuen Artandape hilabetekaria jaio zen. Arrigorriagako Abarrak Kultur Elkartea zen arduraduna eta 5.000 ale argitaratzen zituzten hilero. 2005eko martxoan, ordea, aldizkaria argitaratzeari utzi zion Abarrakek, uste baino diru gutxiago jaso zutelako erakundeengandik eta zor handia zutelako.

2010eko urrira arte, Basaurik ez zuen berriro euskarazko aldizkaririk izan. Garai hartan, Sustraiak Fundazioak aldizkari berria argitaratu zuen: Berbaz. Bizkaiera erabiltzen zuten euskara batuaren ordez. Hamabi zenbaki kaleratu eta gero, -2012ko urtarrilean, alegia- agur esan zuen. Hortaz, bost izan dira orain arte Hego Uribeko eskualdeak izan dituen euskarazko hedabideak.

Gora