☉ Hego Uribe
Herritarren berbak (V): “Jaietan Geuriak argitaratutako bideo hura ahaztezina da niretzat”
Geuriak 5 urte bete ditu aurten. Horren harira, Hego Uribeko herritarren berbak bildu ditugu: Igor Zaballa, Esti Larrabide eta Unai Zubillaga.
Geuriak 5 urte: https://labur.eus/Geuriak5urte
Hego Uribeko herritarren berbak:
Galderak:
1. Geuriak 5 urte bete ditu. Geuria aipatzen dizutenean, zer da burura datorkizun lehen gauza?
2. Zer da gehien gustatzen zaizuna Geuria komunikazio proiektuan?
3. Garrantzitsua al da zuretzat toiko kazetaritza?
4. Zertan laguntzen du Geuriak gizartean?
5. Zer hobetu, aldatu edo gehituko zenuke Geurian?
6. Zergatik gomendatuko zenioke lagun bati Geurian informatzea?
Izena: Igor Zaballa Hortala
Adina: 51 urte
Herria: Arrigorriaga
Lanbidea: Euskara irakaslea
1. Artandape aldizkaria aspaldian desagertu ondoren, Hego Uribeko euskaldunok tokiko eta euskarazko komunikabideen aldetik gabezia handia genuen, eta, zorionez, GEURIAk ezin hobeto bete du hutsune hori. Oso hedabide profesionala da. Gure etxean hasiera-hasieratik hasi ginen jasotzen, eta egun ezinbesteko irakurgai bihurtu zaigu.
2. Iruditzen zait GEURIAk bete-betean islatzen dituela euskarazko komunikabide batek bete behar dituen ezaugarriak: lehenik, kalitatezko produktua da; bigarrenik, euskararen normalizazioarekin konpromisoa du; hirugarrenik, informazio zehatz eta askotarikoa ematen du; laugarrenik, iritzi-aniztasuna eskaintzen du; bosgarrenik, hurbila, erakargarria eta modernoa da; eta, azkenik, musu truk iristen da postontzira (hau pagotxa, hau!).
3. Bereziko garrantzia du, GEURIA baita Hego Uribeko herrien gaineko informazioa euskaraz eta euskal ikuspegitik ematen duen bakarra.
4. GEURIAk funtzio garrantzitsu bi betetzen ditu: batetik, ohiko komunikabideen gisara, herritarrak informatzen ditu, euskaraz, gainera, eta, bestetik, ezinbesteko tresna bihurtu da Hego Uriben euskara normalizatzeko, euskal hizkuntzan irakurtzeko aukera paregabea baita.
5. Gure eskualdean euskarak normalizazio-prozesuan pauso sendoak emango baditu, euskaraz bizitzeko aukera gehiago eskaini behar zaie hiztunei. Beraz, nik konpromiso handiagoa eskatuko nieke Hego Uribeko udalei GEURIA komunikabidea sendotu dezaten, egunkariaz eta sareko informazioaz haragoko erronkei heltzeko: GEURIA Telebista eta Irratia.
6. GEURIA delako gure herriei buruzko albisteak profesionaltasunez, euskaraz eta euskal ikuspegiz ematen dituen bakarra.
Izena: Esti Larrabide Sagastizabal
Adina: 26 urte
Herria: Basauri
Lanbidea: Bankaria
1. Orain dela bi urte, Basauriko jaietako San Fausto egunean, Geuriak sare sozialetara bideo bat igo zuen: egun hartan, euria zela eta, ez zen ospatu sokatira txapelketa, baina, hala ere, lagun batzuekin batera euripean hasi ginen dantzatzen. Geuriako kazetariak momentu hura grabatu eta bideo alai bat egin zuen. Momentu benetan barregarria eta ahaztezina izan zen hura eta horregatik datorkit burura Geuria aldizkaria aipatzen denean.
2. Geuriak bi ezberdintasun garrantzitsu ditu bestelako hedabideekin alderatuta. Alde batetik, hurbileko komunikabidea da, hots, Hego Uribeko gertakizunak soilik jorratzen ditu. Gainera, herritarrok albisteen parte gara eta bertako kazetariak eskualdeko gazte ezagunak dira. Beste aldetik, euskarazko eskaintza egiten duela, eta hori bereizgarri garrantzitsua da; izan ere, Hego Uribe eskualdean ez dago euskarazko eskaintza duen bestelako aldizkaririk.
3. Bai. Herritarrok gure inguruan gertatzen diren berrien gaineko informazioa eduki behar dugu, eta Geuriak eskualdeko albisteak bakarrik ematen dituenez, bai Basauriko, zein inguruko herrietako gertakizunen berri dugu. Gertuko informazioak ematen digu gure eskualdearen gaineko ezagutza.
4.Geuria aldizkariak gure eskualdean euskarazko komunikabide eskaintza egotea lortu du. Hori lortzea oso zaila da, izan ere, Hego Uribe eskualdean gaztelania da nagusi. Hala ere, bereizgarri horrek ematen dio Geuriari bere nortasuna, eta horri esker albisteak euskaraz irakurri nahi ditugun herritarroi aukera hori ematen digu. Beraz, bertako kazetarien lanari esker, herriak Geuria identifikatzea, sare sozialetan jarraitzea, eta albisteak euskaraz irakurtzea lortu dute. Hego Uribe eskualdeko albisteak argitaratzen direnez, herritarrok gure inguru osoko informazioa jasotzen dugu, hots, ez du axola zein herritakoa zaren, guztion gaineko datuak edukiko dituzu. Horrek asko laguntzen dio herrien arteko elkarkidetzari, guztiak eskualde beraren parte sentitzen baikara.
5. Nire ustez Geuria taldea primerako lana egiten hari da. Hala ere, gustatuko litzaidake igotzen dituzuen argazkiak mobilean deskargatzeko aukera izatea.
6. Hego Uribe eskualdeko biztanlea izanik, bere informazio bidea Geuria izatea gomendatuko nioke bertatik jasoko baititu eskualdean gertatzen diren albisteen berri. Aipatuko nioke, Geuriak gai desberdinak lantzen dituela, kultura, politika, jaialdiak, kirola, eta abar, informazio globala lortuz bere eskualdeko gertakizunen gainean.
Izena: Unai Zubillaga
Adina: 24 urte
Herria: Etxebarri
Lanbidea: Zerbitzaria
1. Ba oso originala izango naiz eta “euskara” esango dut. Euskaltegian ikasten hasi nintzenean Geuria irakurtzen ere hasi nintzen. Oraindik Etxebarri proiektuan ez zegoen arren, beste herriei buruz irakurtzen nuen. Nire asmoa euskaraz irakurtzea baino ez zen, praktikatzeko. Orain, ordea, etxebarritar euskaldun gisa irakurtzen dut.
2. Hurbiltasuna. Beti dago momentu garrantzitsuenetan, hauteskundeetan, elkarteen proiektuak ikusgarri egiten… eta nik, Etxebarriko Jai Batzordekidea izanez, jaietan egiten duen lana aipatuko nuke.
3. Jakina, nazkatuta nago Bilbori buruzko berriak irakurtzeaz. Gustatuko litzaidake jakitea zer gertatzen den herrian, eguneroko berriak. Ez beti hiriburuetan gertatzen dena eta hortik sortzen duten sentsazionalismoa. Zorionez, gero eta ohikoagoa da gertuko kazetaritza.
4. Lehen esan dudan bezala, uste dut aipagarria dela elkarteen eta herriko proiektuei ematen zaien garrantzia. Beste komunikabide batzuetan ez da hori gertatzen, eta gertatzen bada, bigarren, hirugarren edo azken planoan jartzen dute, soberan dagoen lekua betetzeko. Bestalde, jakina, euskara bultzatzeko oso aurrerapauso handia da komunikabide euskalduna izatea. Herrian euskararen egoera hain larria izanez, asko eskertzen eta nabaritzen dira horrelako proiektuak.
5. Etxera bi aldiz heltzen zait egunkaria: bat tolestuta harpidetuta egoteagatik eta bestea tolestu gabe. Lehenengoa irakurtezina denez, bigarrena da irakurtzen dudana. Amak eskertzen du sudokuak eta horrelako denborapasak egiteko uzten diodalako, baina oso deserosoa da irakurtzeko.
6. Bertako berriak argitaratzen dituztelako, interesatzen zaizkigun gaiei buruzkoak, herrian gertatzen dena, euskaraz. Eta erdaldunei ere gomendatuko nieke, “spam” moduan: denbora-pasak eginez hasten da euskara pixka bat irakurtzen, gero berri bat… Amarekin funtzionatzen ari da.
☉ Hego Uribe
Arratiako Korua Usansolotik eta Galdakaotik igaroko da Santa Ageda bezperan
Usansolon goizean izango da Arratiako Korua eta Galdakaon arratsaldean. Ordutegi zehatza jaso dugu albistean
Santa Ageda bezpera izango da bihar, otsailak 4. Eta tradizioa jarraituta, Hego Uribe eskualdean hainbat eta hainbat talde kalera aterako dira koplak abestera.
Era berean, Arratiako Koruaren bisita ere izango dugu eskualdean: Usansolon eta Galdakaon geldialdiak egingo ditu.
Goizeko 08:25ean hasiko du kalejira Koruak Zeanurin eta Arantzazutik, Igorretik, Dimatik, Lemoatik eta Bediatik igaro ostean, Usansolon egingo du geldialdia 10:15ean [2024an Usansolon harrapatu zuen GEURIAk Korua].
Ondoren, Zornotzara joango dira eta handik Bilbora. Bizkaiko hiriburuan 11:30etik 20:00ak arte egongo da Arratiako Korua leku batetik bestera.
Eta, etxerako bidean, 20:40ean eguneko azken geldialdia egingo dute Galdakaon. Iaz Iturrondo plazan ikusi ahal izan genituen [ikusi bideoa].
☉ Hego Uribe
Metroaren 5. Lineako tunel osoaren % 20 hondeatu du dagoeneko ETSk
Sarratu eta Usansoloko ospitalaren arteko iIbilbide osoko 6,3 kilometroetatik 1.200 metro hondeatu ditu Eusko Jaurlaritzak
Metroaren 5. Lineako obrek aurrera darraite. Sarratu eta Galdakao-Usansolo ospitalea lotuko ditu eta guztira 6,3 kilometroko ibilbidea izango du geltoki hauekin: Sarratu, Aperribai, Bengoetxe, Galdakao eta Usansoloko ospitalea.
Eusko Jaurlaritzaren esku dagoen Euskal Trenbide Sarea (ETS) erakunde publikoa ari da obrak egiten, eta adierazi dutenez, lineako tunel osoaren % 20 hondeatu dute dagoeneko: “Ibilbideko 6,3 kilometroetatik 1.200 metro guztira”, diote.
Iazko apirilean aurreikusi zutenez, tunelak 2028ko azarorako bukatuko dituzte, eta erabiltzaileek 2029ra arte edo 2030era arte ezin izango dute metroa erabili (Galdakaoraino).
Gaur egun, ETS Ibaizabal ibaiaren azpian ari da hondeaketa-lanak egiten Usansolon, ospitalearen eta herriaren arteko bidearen erdian.
“Gainera, haren ondoan ari da eraikitzen etorkizuneko geltokirako bi sarbideetatik bat. Puntu horretan ahokadura hondeatu da eraso-arrapalaren hasierako kotaraino. Ondorengo hondeaketa-lanak marruskatzeko makinarekin egingo dira. Beste sarbidea ospitalean bertan egongo da”, esan dute.
Sarratu-Aperribai tartea
Sarratu-Aperribai arteko tartean (1.540 metroko ibilbidea) ere esku hartzen ari da ETS, eta hiru puntutan ari dira lanak egiten: Larrazabalen, Sarratun eta Aperribain.
“Larrazabal inguruan errepide berria martxan jarri da eta Larrazabal kale zaharreko egiturak eraisteko lanak hasi dira”, diote.
Gainera, gas linea desbideratu dute Larrazabalen: “Gasa kentzeari esker, merkantzien linearen behin-behineko trenbidea desbideratzen hasi ahal izan da, eta, lehen fasean, gaur egun Arcelor-Mittal lantegiari zerbitzua ematen dion trenbidearekin lotuko da. Horrez gain, merkantzien sarea Arcelor-Mittal lantegiarekin lotuko den etorkizuneko trenbidean ari dira lanak egiten. Lantegi hori Basconia lantegi zaharraren inguruan dago. Aurtengo maiatzean irekitzea aurreikusten den lantegirako trenbideko sarbide berria eraikitzeko lanak ere egiten ari dira”, esan dute.
Bestetik, Sarratu inguruan hasi dituzte Matxitxakoko zubia eraisteko lanak, bertan geltoki berria eraiki ahal izateko. Lan horiek bi urtez luzatuko dira eta Basauriko Udalak inguruko trafikoa berrantolatu behar izan du.
Eta, Aperribain auzorako beste sarbide bat jarri dute martxan: “Horrek obrarako sarbideak independizatzea eta bertan bizi direnei eragindako eragozpenak murriztea ahalbidetuko du”, diote.
Aperribai-Galdakao tartea
Aperribai-Galdakao tartean (2,8 kilometro luze) Bengoetxeko eta Galdakaoko geltokiak eraiki behar ditu ETSk. Eta bitartean, larrialdiko aireztapen-galeriak egin dituzte Olabarrietan eta Abusun.
“Olabarrietan, 126 metro luzeran, hondeaketa- eta euste-lanak erabat amaituta daude. Halaber, fronte horretatik lineako tunelaren 2.800 metroetatik 287 metroko hondeaketan eta euste-lanetan aurrera egin da”, esan dute.
Abusuko galeriari dagokionez, 325 metroko hondeaketa- eta euste-lanak egin dituzte, hau da, galeria osatzen duten 355 metro guztien % 92 inguru.
“Azkenik, Bengoetxeko geltokian osorik kendu da landare-lurrezko geruza. Orain arte, 46.460 metro kubiko hondeatu dira, hau da, % 57ko aurrerapena. Ostalaritza-guneari dagokion euste-pantaila ere egin da, beste aurrerapen batzuen artean”, diote.
Sailburuaren eta Ahaldun Nagusiaren bisita
Susana Garcia Chueca Eusko Jaurlaritzako Mugikortasun Jasangarriaren sailburuak eta Elixabete Etxanobe Bizkaiko ahaldun nagusiak gaur goizean bisitatu dituzte Metroaren 5. Lineako obrak.
“Lurraldea kohesionatzen duen proiektua da, eta bere eragin-eremuan bizi edo lan egiten duten pertsona guztiak metro-sisteman sartzen ditu, 7,5 minutuz behingo maiztasunarekin. Tamaina horretako proiektuei kosta egiten zaie erritmoa hartzea, baina egiten dutenean, duela minutu batzuk egiaztatu ahal izan dugun bezala, obren aurrerapena geldiezina da”, adierazi du Garcia Chueca sailburuak.
Elixabete Etxanobe Bizkaiko Ahaldun Nagusiak, bere aldetik, hau nabarmendu du: “Dakizuen bezala, proiektuaren erdia finantzatzen duen Aldundi honek (guztira 407 milioi euro) metroa luzatzea lehentasuna zela esan zuen bere garaian, trenean oinarritutako mugikortasun jasangarriagoa gura dugulako, pertsonak batuko dituen eta haientzat aukera berriak sortuko dituen mugikortasuna, hain zuzen ere. Duela 30 urte Metroak Bizkaia aldatu zuen. Orain, 5. linea berriak metroak irabazten jarraitzen du, pertsonen bizi kalitatea hobetzeko. Eta eskualde hauen konektibitatea nabarmen hobetuta egingo du, ospitalearen ingurutik metroaren maiztasunak izango dituztelako. Hau da, 200.000 bizkaitar inguruk mugitzeko aukera gehiago izango dituzte, ibilbideak hobeto konektatuta egongo direlako”.
☉ Hego Uribe
‘Oihu Bat Palestinara’ jaialdirako sarrerak salgai jarri dituzte Basaurin eta Galdakaon
Jaialdia martxoaren 21ean izango da Durangon. Sarrerak salgai daude Basaurin eta Galdakaon
‘Oihu Bat Palestinara’ jaialdia antolatu dute martxoaren 21ean Durangoko Landako Gunean.
Palestinarekin Elkartasuna plataformak eta Euskal Herriko hainbat musikarik elkarlanean sortutako kultur ekimena da, eta helburua da “Palestinak bizi duen errealitate gordina berriz ere lehen lerrora ekartzea”.
Musika nagusi izango da jaialdian, eta dagoeneko honako artistek eta taldeek parte hartuko dutela jakinarazi dute: Anari, Belako, Bengo, Borla, Chuleria Joder!, Dena, Eire, La Furia, Gailu, Hofe, Ibil Bedi, J Martina, Ke Lepo, Lukiek, Malakias, Ødei, Olatz Salvador eta Mateo Zikuta.
Gainera, bertsolariak, bakarrizketak eta dantza ere izango dira jaialdian. Eta, izen gehiago iragartzeko daudela adierazi dute antolatzaileek.
Sarrerak dagoeneko salgai daude 15 edo 25 euroan. “Ekimen honen helburua erresistentzia sustengatzea denez, bi prezio dituzue aukeran. Ez dago alderik sarreran, ekarpen ekonomikoak baizik. Ekitaldi solidarioa izanik, bakoitzak bere ahalmenaren edo nahiaren arabera erabaki dezala zenbatekin lagundu nahi duen Palestinaren aldeko borroka eta errepresioaren aurkako kutxa”, diote.
Hego Uribe eskualdean Basaurin eta Galdakaon jarri dituzte sarrerak eskuragarri: Fissions eta Berezi tabernetan Basaurin, eta Zurrut tabernan Galdakaon.
☉ Hego Uribe
Eskolarteko Herriarteko eskuzko txapelketa jokatuko dute Basaurik, Galdakaok eta Zeberiok
Eskolarteko Herriarteko eskuzko txapelketa hasiko da asteburu honetan. Hego Uribe eskualdetik Basaurik, Galdakaok eta Zeberiok hartuko dute parte txapelketan.
Basaurik Zaldibarren, Lezamaren eta Abadiñoren kontra jokatuko du; Galdakaok Larrabetzuren, Durango Bren eta Orozkoren aurka; eta Zeberiok Igorreren, Gallarta Bren eta Orduñaren kontra.
Guztira zortzi multzotan banatuta, Bizkaiko hainbat udalerri daude ordezkatuta txapelketan: Gallarta A, Markina A eta Amorebieta-Etxano (A taldea); Lemoa A, Bermeo, Gernika Lumo eta Balmaseda (B1 taldea); Iurreta, Amorebieta-Etxano B, Durango A eta Lea Ibarra (B2 taldea); Zeanuri, Sopela, Markina B eta Dima (B3 taldea); Larrabetzu, Durango B, Galdakao eta Orozko (B4 taldea); Basauri, Zaldibar, Lezama eta Abadiño (B5 taldea); Igorre, Zeberio, Gallarta B eta Urduña (C taldea); eta Barakaldo, Santurtzi, Lemoa B, Elorrio, Sestao eta Muskiz (D taldea).
Egutegia | Hego Uribeko taldeak
Urtarrilak 30, ostirala
– Igorre vs Zeberio (1. jardunaldia)
17:14 Igorreko frontoia
– Basauri vs Zaldibar (1. jardunaldia)
18:00 Artunduagako frontoia
Otsailak 1, igandea
– Galdakao vs Orozko (1. jardunaldia)
10:30 Kurtzeko frontoia
Martxoak 1, igandea
– Abadiño vs Basauri (2. jardunaldia)
– Durango B vs Galdakao (2. jardunaldia)
– Gallarta B vs Zeberio (2. jardunaldia)
Martxoak 29, igandea
– Basauri vs Lezama (3. jardunaldia)
– Galdakao vs Larrabetzu (3. jardunaldia)
– Zeberio vs Urduña (3. jardunaldia)
☉ Hego Uribe
Bideoa | Faxismoaren aurkako manifestazioarekin bat egiteko deia egin dute Hego Uribeko GKStik
Urtarrilaren 31n manifestazioa deitu du GKSk Bilbon. Hego Uribe eskualdean antolatu eta aurkezpenak eta hainbat ekintza burutu dituzte
Faxismoaren eta estatuen autoritarismoaren aurka manifestazioa deitu du Gazte Koordinadora Sozialistak (GKS).
Urtarrilaren 31n, larunbatez, izango da mobilizazioa Bilbon (Jesusen Bihotzetik, 18:00etan) eta Iruñan, eta Hego Uribeko GKStik deialdiekin bat egiteko deia luzatu dute.
Eskualdetik manifestaziora joateko hitzorduak zehaztu dituzte: Arrigorriagan 17:10ean tren geltokian, Basaurin 17:00etan Arizko metro geltokian, Galdakaon 16:45ean Eroski aurreko autobus geltokian, eta Usansolon 16:45ean tren geltokian.
“Faxismoa eta Estatuen joera autoritarioa egun indarra hartzen ari diren bi auzi dira. Biak ala biak egiturazko baldintza bati erantzuten diote, krisi kapitalistari alegia. Izan ere, irabazi tasa beherantz doan momentu honetan oligarkia atlantistak faxismoaren eta estatu autoritarioaren aldeko apostua egiten ari da bere interesak defendatzeko helburuarekin”, diote.
Ildo horretan, faxismoaren kontrako borroka “indartu” behar dela adierazi dute: “Nahiz eta Euskal Herrian oraindik ere gorputz antolaturik ez duen arren, ideia erreakzionarioak hedatzen ari dira. Ideia arrazistak, klasistak, matxistak… zabaltzen ari dira eta geroz eta inpunitate gehiago lortu dute. Horren guztiaren seinale da egun euskaraz eta sinbologia aurrerakoiz mozorrotzen diren euskal adierazpen arrazistak eta faxistak”.
“Estatu autoritarioari eta faxismoari gaurdanik aurre egiteko balditzak sortu behar ditugu eta Gazte Koordinadora Sozialistatik urtarrilaren 31n deitu dugun mobilizazioak horri ekarpena egitera dator. Gaur egun kalera atera eta indar erakustaldi bat egitea ezinbestekoa da indarra hartzen ari den zentzu komun geroz eta atzerakoagoari euste horma bat sortzeko eta mundu mailan artikulatzen ari den mugimendu faxistaren aurrean antifaxismo iraultzaile baten indarra erakusteko”, diote.
Bideoa | Lurra esnatu dute gaur Galdakaoko ikasleek Santa Ageda bezperan
Hidrogeno berdea ekoizteko bidea hasi nahi du Rezola Materialsek Arrigorriagako harrobian
Bideoa | Arratiako Koruak Usansolon eskaini dizkio koplak Santa Agedari
Argazkiak | Galdakao eta Altsasu senidetu egin dira inauterien transmisioari jarraipena emateko
Argazkiak | Lokatz artean lehiatu dira Ausartak Mendi Lasterketako korrikalariak Arrigorriagan
Argazkiak | Errege Magoek ilusioa eta gozokiak banatu dituzte Galdakaoko kabalgatan
Bideoa | Lurra esnatu dute gaur Galdakaoko ikasleek Santa Ageda bezperan
Bideoa | Arratiako Koruak Usansolon eskaini dizkio koplak Santa Agedari
