☉ Hego Uribe
Herritarren berbak (VII): “Hiztegia, albisteen egitura, ulermena… ikasleekin lantzeko erabiltzen dut”
Geuriak 5 urte bete ditu aurten. Horren harira, Hego Uribeko herritarren berbak bildu ditugu: Peio Molinuevo, Aitziber Cobo eta Bego Gonzalez.
Geuriak 5 urte: https://labur.eus/Geuriak5urte
Hego Uribeko herritarren berbak:
Galderak:
1. Geuriak 5 urte bete ditu. Geuria aipatzen dizutenean, zer da burura datorkizun lehen gauza?
2. Zer da gehien gustatzen zaizuna Geuria komunikazio proiektuan?
3. Garrantzitsua al da zuretzat toiko kazetaritza?
4. Zertan laguntzen du Geuriak gizartean?
5. Zer hobetu, aldatu edo gehituko zenuke Geurian?
6. Zergatik gomendatuko zenioke lagun bati Geurian informatzea?
Izena: Peio Molinuevo
Adina: 23 urte
Herria: Arrigorriaga
Lanbidea: Ikaslea
1. Hego Uriben gertatzen diren gauza “txikien” ahotsa dela esango nuke.
3. Bai, nire iritziz ezinbestekoa. Komunikabide handiek maila globaleko notiziak kaleratzen dituzte batik bat eta gehienetan maila lokaleko albisteak ez dira inon plazaratzen. Hori dela eta, herrietan gertatzen diren gauzek eta egiten diren ekintzek ez dute inongo lekurik horrelakoetan. Baliteke berri hauek egunero inguratzen gaituzten eragin handiagoko berrien jakin-min eta intriga berbera ez piztea, hala ere gertuen daukagunaren berri izatea bestea bezain komenigarria da.
4. Gure kasuan, Arrigorriagako Gaztetxean edo Arrigorriaga Harrera Sarean egiten ditugunen berri emateko oso baliagarria zaigu Geuria bezalako komunikabide bat, eskualde mailan gure ekintzak ezagutarazteko (honetarako prestutasun handia erakutsi digute beti) eta modu berean, gu ere gure inguruan gertatzen ari denaz jabetzeko. Gauza eta gertakizun txikiak, izaera umil hori izate hutsagatik ez dute esan nahi garrantzitsuak ez direnik eta lan horri ahotsa ematea benetan eskertzen diogu Geuriari. Gainera hau guztia Euskaraz egiten da eta hori ere zoriontzekoa da gure eskualdeko euskararen egoera traketsa ikusita. Bestalde, Arrigorriagako Gazte Asanbladak komunikatiboki, gazteengana heltzeko gaitasun handiagoa du sare sozialen bitartez. Geuriari esker, adin-muga hau gaindi dezakegu edade ezberdineko irakurleengana heltzen baita eta honek hutsune hori betetzea ahalbidetzen digu.
5. Nik Geuriarekin dudan harremana bi eratakoa da: alde batetik irakurlearena eta besteetan, kolaboratzaileei gure ekintzak kaleratu ditzaten txapa ematen dienarena. Bi parte-hartze moduetan pozik nago, irakurle zein txapa-emaile bezala ez naiz kexu. Dena dela, Arrigorriagako Gazte Asanbladatik natorrenez eta eskualdeko Gazte Asanblada ezberdinak ezagutzen ditudanez, badakit herri batzuetako Gazte Asanbladen jarduna ez dela normalean publikatua izaten. Ez diot inondik inora Geuriaren hutsegitea denik baina alternatibak eraikitzen diharduten gazteekin lotura estuagoa bultzatzen saiatuko nintzateke, gaur egun gure eskualdean bizi duguna loraldi bat dela esango bainuke eta honek ere hauspotze komunikatiboa behar duelako.
6. Lehenago aipatu dudan bezala, eragite-maila handiagoko berriak uneoro eta nonahi aurki ditzakegu. Maila lokaleko notiziak jasotzeko berriz, zailtasun handiagoak ditugu eta Geuriaren bitartez gure herrietan eta ingurukoetan gertatzen dena ezagutu dezakegu.
Izena: Aitziber Cobo
Adina: 25 urte
Herria: Zaratamo
Lanbidea: LH irakaslea
1. Geuria entzutean, guztiona eta guztiontzako den egunkaria datorkit burura. Herriko eta inguruko herrien informazioa jasotzeko aukera eskaintzen digulako ulertzen dut guztiontzako egunkaria dela: albisteak, jaiak, gertakizunak… Zure herrian gertatu edo gertatuko dena alboko herritarrek ezagutzea interesgarria dela pentsatzen dut. Beharbada herrira hurbildu daitezke haien intereseko ikuskizun, jaialdi… batera. Eta hori herritarron arteko harremanetan aberasgarria dela uste dut.
2. Gehien gustatzen zaidana, herri orori eskaintzen zaion tartea da. Hego Uribeko herritarrok prestatzen ditugun ekitaldiak, jaiak, gertatzen diren arazoak edo egoerak bertan islatzen dira eta herrikoentzat ez ezik, alboko herrietakoentzat ere interesgarri suerta daitezke.
3. Zalantzarik gabe, bai. Askotan munduko beste puntako arazo edo berri gehiago ezagutzen ditugu gure begien aurrean gertatzen direnak baino. Jakina garrantzitsuak direla, baina lehendabizi gertu dugun errealitatea ezagutzea ezinbestekoa dela esango nuke. Askotan inguruan zer gertatzen den, baten batek laguntza behar duen… ez dakigu eta beharbada hurbil ditugun kasu horietan laguntza jaso zein eman genezake. Gizarte hobea eraikiz denon artean.
4.Alde batetik, zonalde bereko herritarroi jakinaren gainean egoteko aukera ematen digu, hau da, toki bakoitzeko lehen eskuko informazioa jasotzen dugu. Hurbil gaudenon arteko komunikazioa oso aberasgarria delakoan nago. Askotan, alboko herrietan burututako ekimenak ezagutzea eta horietatik ideiak hartzea gure herrian proposatzeko aparteko aukera dela uste dut. Horrez gain, irakasle izanda aipatu beharra dut, zenbaitetan ikasleekin euskara lantzeko erabili dudala: hiztegia, albisteen egitura eta ulermena, denbora pasak… lantzeko.
5. Haurrentzako tartetxo bereziren bat uztartzea. Irakurmena sustatzeko eta bizi diren edo alboko herrietan gertatutako egoerekiko interesa pizteko.
6. Geuria egunkariaren bidez, gertuko informazioa jasotzen duzulako.
Izena: Bego Gonzalez Garcia
Adina: 43 urte
Herria: Zeberio
Lanbidea: Aisialdia, interpretea
1. Geuria hitza entzun eta geure berriak etortzen zaizkit burura, geure errealitatea ezagutzeko era bat, gertuko informazioa eta gainera euskaraz!!
2. Euskararen aldeko apustu ausarta egin izana. Gaur egun, euskara gero eta presenteago dago gure jendartean, baina oraindik gutxi batzuk euskaraz irakurtzeko ohitura dute. Euskaraz mintzatzen gara, euskara bultzatzen dugu, euskaraz bizi nahi dugu, baina batzuetan erosotasunera jotzen dugu eta gazteleraz aritzen diren komunikabideei kasu egiten diegu. Geuriak aldiz, gogoratzen digu informazioa euskaraz eta era sinplean ere zabaldu ahal dela.
3. Estatu eta mundu mailako berriak entzun eta irakurtzeko aukera anitza dugu, gertukoak berriz eskuratzeko ez dugu hain errez, ezta askoz gutxiago ere gure herrietako bitxikeriak. Informazioa boterea dela diote, zenbat eta aukera gehiago beraz, hobeto, ezta?
4. Euskarari, zalantza barik, fabore handia egiten dio, eta nola ez, euskaldunoi. Baina horretaz gain, gure herrietako zuzeneko gaurkotasuna ematen digu. Gure egunerokotasunean buru belarri sartuta egoten ohi gara, eta askotan ez gara ohartzen ezta gure ondoan gertatzen ari denaz ere. Geuriak informazio hori gerturatzen digu.
5. Ikuspegi feministagoa, emakumeen presentziari eta bisibilizazioari garrantzia handiagoa emanez, adibidez.
6. Ez nioke gomendutako Geuria aukeratzea beste bat baino, baizik eta “beste” horretaz gain, Geuria ere irakurtzeko, geuria delako.
☉ Hego Uribe
ZOZKETA / ‘Ezinbestekoak’ diren bi saskien zozketa, Errigora eta GEURIAren eskutik
Zozketa Geuriaren Instagram sare sozialaren bidez egingo da eta parte-hartzaileek hiru pauso erraz bete beharko dituzte, komunitatea sortzeko eta Agerreko euskara pizteko.
Martxoaren 10etik 26ra luzatuko da Errigora auzolan-ariketa erraldoi honetan Agerreko —alegia, Nafarroa erdi eta hegoaldeko— produktuen eskaintza. Horien balioaren % 25 zonaldeko euskalgintzari bideratuko zaio.
Euskara hauspotzen duten eragileentzako ekarpena indarrak batuz egiten da ‘Eskutik eskura’ kanpainari esker, Nafarroa hegoalde eta erdialdeko euskalgintzari behar duen haize bolada bidaltzeko.
Zozketa Instagram sare sozialaren bidez egingo da eta honakoak dira zozketan parte hartzeko pausoak:
😍 @geuria.eus jarraitu
❤️ Like eman
💬 Zein lagunekin egingo zenuke otordutxo eder bat? 😉 Etiketatu.
🔴 Gorria edo 💚 Berdea? Elkarbanatu zure story-etan nahiago duzun saskiaren argazkia eta @geuria.eus aipatu. Horrrela jakingo dugu zein saski duzun gustukoen.
Zozketan parte hartzeko epea zabalik dago urriaren 31ra arte (12:00). Datozen egunetan egingo dugu zozketa eta irabazleak postean bertan etiketatuko ditugu. 48 orduren buruan irabazleren bat ez bada GEURIArekin harremanetan jarri, txandapasa egingo dugu eta zerrendako hurrengoari paso emango diogu.
Irabazleetako bat bazara, nola jarri GEURIArekin harremanetan? Instagram bidez mezu bat bidalita, info@geuria.eus helbide elektronikora idatzita edo 944 406 692 telefono zenbakira deituta.
Errigorak produktuak salgai ditu errigora.eus atari digitalaren bidez. Eskaera egin eta banaketa hurrengo asteetan izango da eta, salbuespenak salbuespen, produktu guztiak aldi berean jasoko dituzte erosleek. Eskaera egiterakoan aukeratu behar duzu produktuak jasotzeko puntua eta bertan zehaztutako egun eta ordutegian pasa beharko duzu jasotzera. Hego Uribe eskualdeko hainbat puntutan ere eros daitezke kutxak. (+) ikurra duten guneetan, internet bidez erosi eta bertan jaso daiteke erosketa.
ARRIGORRIAGA
Arrigorriagako AEK
BASAURI
+Bolintxu AEK
GALDAKAO
+Eguzkibegi Ikastola
Martxan da Basaurin eta Galdakaon Berbalagun egitasmoa. Aurtengoa hamabosgarren edizioa da Basaurin eta hogaita batgarrena Galdakaon.
Programaren helburua da euskaldun berriei ikasitakoa praktikara eramateko zubi lana egitea eta euskaraz bizi nahi duten euskaldun osoei euren ingurua euskalduntzen laguntzea.
Hasierako asmoa zen taberna batean euskaraz berba egiteko taldeak sortzea, baina urtetik urtera hedatu egin da ekimena eta interes talde desberdinak eratu dituzte bai Basaurin bai Galdakaon. Hala nola, mendi taldea, jostun taldea, euskal dantza taldea, txalaparta taldea, bizkaiera lantzeko taldea, Gurasolagun taldeak, musean aritzeko taldeak edota irakurketa taldea.
Eta, aurten, nobedade gehiago izango ditu egitasmoak: “Basaurin kakorratz taldea sortu da eta aurten gure erronka izango da gurasoberriak edo haur txikiak dituzten gurasoak elkartzea parke edo plaza batean euren artean harreman euskaldunak sortzeko; horri Parkelagun deitu diogu”, dio Ioritz Lopez de Alda Basauriko Berbalagun dinamizatzaileak.
Hego Uribeko Berbalagun egitasmoko arduradunak eta Basauriko eta Galdakaoko udal ordezkariak // Geuria
Txakurlagun taldeak ere eratu nahi dituzte Basaurin, baita Galdakaon ere. “Ikasturte honetako erronka da Txakurlagun taldeak sortzea; izan ere, eskualde honetan hainbat txakur daude eta jabeak askotan entzuten ditugu eurei euskaraz egiten”, esan du Asier Martin Galdakaoko Berbalagun arduradunak.
Eskualdeko ondarea ezagutzen
Eskualdeari begira ere talde berri bat martxan jarriko du Berbalagun egitasmoak: Euskal Herriko ondare kulturala ezagutzeko taldea, hain zuzen.
“Basauriko eta Galdakaoko kultur ondarea ezagutzea da asmoa. Hilean behin batuko gara, eta hasteko, azaroaren 8an Galdakaon izango dugu hitzordua. Elexalde auzoan elkartuko gara, Guzur Aretxaren ondoan, eta ibilalditxoa egingo dugu”, dio Martinek.
Abenduan Basauriko ondare kulturala ezagutuko dute: “Oraindik data zehazteke dago —abenduaren 13an edo 14an izan daiteke—, baita zein ibilbide egingo dugun ere”, adierazi du Lopez de Aldak.
“Eskualdeko ondare kulturala ezagutu nahi dugu, baina baita Bizkaikoa eta Euskal Herrikoa ere. Hirugarren hitzordurako Bermeora irteera antolatu nahi dugu. Aurrerago emango dugu informazio gehiago”, diote.
Izena ematea: doan!
Berbalagun taldeak martxan dauden arren, izena emateko epea ikasturte osoan zehar zabalik dagoela gogorarazi dute Berbalaguneko dinamizatzaileek.
Izena ematea doakoa dela azpimarratu dute, eta eskatzen den gauza bakarra euskaraz elkarrizketa bat mantentzeko kapaz izatea dela.
Taldeetan eta ekintzetan izena emateko 607 146 855 telefonora deitu edo galdakao_berba@aek.eus (Galdakao) edo hegouribe@aek.eus (Basauri) helbide elektronikoetara idatz dezakete interesdunek.
Basauriko eta Galdakaoko Udalek, Udal euskaltegiek, AEK-k eta, Basauriko Hizkuntz Eskolak babesten dute Hego Uribeko Berbalagun programa.
Agenda | Hego Uribeko Berbalagun
2025 Urria-Abendua
Urriak 26, igandea | Basauri-Galdakao
Mendi irteera: Belatxikieta
09:00 Basauriko udaletxe pareko autobus geltokia
Urriak 30, osteguna | Basauri
Mintzodromoa
10:00 Solobarria plaza
Azaroak 4, asteartea | Galdakao
Berbalagun aurkezpen jaia
18:30 Ganguren taberna
Azaroak 8, larunbata | Galdakao
Ondare taldearen lehen txangoa: Elexalde
10:00 Elexaldeko Guzur Aretxa plaza
Azaroak 13, osteguna | Basauri
Berbalagun aurkezpen jaia
18:30 Bonboi taberna
Abenduak 4, osteguna | Galdakao
Mintzodromoa
10:30 Kurtzeko frontoia
Abenduak 12, ostirala | Basauri-Galdakao
Baskot Gaua
19:00 Bananas tabernatik
Abenduak 13 edo 14 | Basauri
Ondare taldearen bigarren txangoa: Elexalde
Abenduak 19, ostirala | Galdakao
Gurasolagun taldearen lehen hitzordua
17:15 Galdakaoko AEK Euskaltegian
☉ Hego Uribe
Palestinaren alde elkarretaratzeak deitu dituzte gaur Hego Uriben, lanuzte orokorrarekin bat eginez
Mobilizazio guztiak 19:30ean egingo dituzte. Arrigorriagan, Ugaon, Galdakaon, Etxebarrin eta Usansolon udaletxeen aurrean burrunbak antolatu dituzte
Gaur, urriak 15, Palestinaren aldeko elkarretaratzeak deitu dituzte Gernika-Palestina herri ekimenetik Hego Uribe eskualdeko hainbat udalerritan, lanuzte orokorrarekin bat eginez.
“Israeli zilegitasuna kentzea eta mendebaldeko estatuen interesen kontra egitea da gure ekarpenik onena palestinarrek indar-harreman hobea izan dezaten erabakiak hartu ahal izateko”, azaldu dute Palestinarekin Elkartasunatik. “Horregatik atera ginen hamarnaka milaka pertsona Iruñean joan den urriaren 4ean palestinar erresistentzia babestu eta sionismoa suntsitu behar dela aldarrikatzeko eta horregatik aterako gara urriaren 15ean palestinarren aldarri historikoekin”.
Gaurko mobilizazioen helburua, Palestinarekin Elkartasunatik azaldu lez, Eusko Jaurlaritzari, Nafar Gobernuari, Espainiako zein Frantziako Gobernuei eta CAF bezalako enpresa konplizeei presio egitea da, “Israelekin harreman oro eteteko”.
Mobilizazio guztiak 19:30ean egingo dituzte. Arrigorriagan, Basaurin, Ugaon, Galdakaon, Etxebarrin eta Usansolon burrunbak antolatu dituzte.
Elkarretaratzeak: Hego Uribe eskualdea
Basauri
Bentako plazan
Galdakao
Udaletxeko plazan
Arrigorriaga
Udaletxeko plazan
Ugao
Herriaren plazan
Etxebarri
Etxebarriko plazan
Usansolo
Izar Gorri plazan
GEURIAk bat egingo du Hego Euskal Herriko sindikatuek Palestinaren alde deitutako lanuztearekin, eta horiek iraun bitartean horiei buruzko informazioa emango du soilik webgunean.
Era berean, arratsaldean Gernika-Palestina herri ekimenak deitutako mobilizazioen jarraipena egingo dugu bai webgunean bai sare sozialetan.
Lanuztearen erreferentziazko ordutegia 11:00etatik 14:00etara izango da, eta 15:00ak arte luzatuko da ordu horretan amaitzen diren jardunaldietan. Arratsaldean 19:00etatik 22:00etara bitartean deitu dituzte lanuzteak.
☉ Hego Uribe
Itziar Atienza eta Itziar Ituño aktoreek bat egin dute Donostian Gazako genozidioa salatzeko egingo den manifestazioarekin
Palestina-Euskal Herria Elkartasun Batzordeek manifestazioa deitu dute irailaren 24an, asteazkenez, Donostian
Zinemaren eta kulturaren munduak bat egin du Palestina-Euskal Herria Elkartasun Batzordeek Gazako genozidioa salatzeko Donostian irailaren 24an egingo duten manifestazioarekin.
Eta deialdi horrekin bat egin dute Itziar Atienza galdakoztarrak eta Itziar Ituño basauriarrak.
Hain zuzen ere, Atienzak irakurri zuen atzo adierazpena Donostiako Victoria Eugenia Antzokiaren aurrean, Antonio De la Torre aktorearekin batera.
“Hitz egiten ari garen bitartean, haur errugabeak hiltzen ari dira Gazan”, adierazi dute.
‘The Voice of Hind Rajab’ filma
Manifestazioa irailaren 24an, asteazkenez, izango da Donostian 18:30etik aurrera.
Aurretik, ‘The Voice of Hind Rajab’ filma proiektatuko dute Zinemaldian.
Kaouther Ben Haniaren filmak Israelgo Armadaren eraso batean bere familia osoa, ama izan ezik, galtzen duen sei urteko neskato baten istorioa kontatzen du.
“Bere laguntza-oihuek ezin dute salbatu, eta erreskatatu nahi duten anbulantzia-taldeko kideak ere hiltzen dituzte”, aurreratu dute Palestina-Euskal Herria Elkartasun Batzordetik, eta gaineratu dute: “Ez da istorio isolatua, palestinarren egunerokoa da: suntsitutako familiak, suntsitutako ospitaleak eta 70.000 pertsona baino gehiago erailak”.
Palestina-Euskal Herria Elkartasun Batzordearen barruan honako kolektiboak daude: Artistas con Palestina, Campaña Final Comercio de Armas con Israel, Donostia Palestina, EAB Euskal Aktoreen Batasuna, EPE-thaia, Gernika Palestina Herri Ekimena, Gure Haurrak Ere Badira; Kulturatik, creadorks culturales con Palestina; Rescop eta Trabajadors del Cine x Palestina.
Bideoa | Xanduli-manduli kirrikiki… Gau Beltza ospatu dute Galdakaon!
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Sorginek eta mamuek Arrigorriagako Gau Beltza hartu dute etxeko txikiekin
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
Argazkiak | Galdakao Gela TEk mendiko aulki egokitua entregatu dio Bizkaiko Mendi Federazioari
Bideoa | Xanduli-manduli kirrikiki… Gau Beltza ospatu dute Galdakaon!
Bideoa | Dozenaka pertsona elkartu dira Arrigorriagan Heidelberg enpresan gertatutako lan-heriotza salatzeko
