→Ugao

Ugaoko Udalak 588.541 euroko geldikinarekin itxi du 2017a

ugao udaletxea

146.000 euro Udiarraga baselizako plazako jolas guneko estalpea ordaintzeko eta kiroldegiko aparkalekuko irisgarritasuna eta segurtasun hobetzeko erabiliko dituzte.

Ugaoko udaletxea // Geuria

146.000 euro Udiarraga baselizako plazako jolas guneko estalpea ordaintzeko eta kiroldegiko aparkalekuko irisgarritasuna eta segurtasun hobetzeko erabiliko dituzte

Ugao-Miraballesko Udalak 2017ko aurrekontuaren likidazioa onartu du. Guztira 115.280 euroko superabitarekin itxi du joan den ekitaldia, bosgarren urtez jarraian joera positiboa sendotuz. Era berean, gastu orokorretarako 588.541 euroko diruzaintza geldikina izan du. Bere egikaritzeari dagokionez, portzentajea %103,51koa izan da sarreretan eta %95,19koa gastuetan.

Gastu orokorretarako geldikinetik 146.000 euro inguru bideratuko ditu Udalak bi jarduketa egiteko. Alde batetik Udiarraga baselizako plazako jolas-tokiko estalpearen eraikuntza egin berria ordaintzeko, eta bestetik, kiroldegiko aparkalekuko irisgarritasuna eta segurtasun hobetzeko. Egun, Udala lanak hasteko Sustapen Ministerioaren baimenaren zain dago.

“Legealdi guztiko kontu publikoen kudeaketaren zorroztasun eta erantzukizunaren isla dira. Ugao-Miraballeskoa kaudimendun udala da, bere kontuak onbideratuak ditu eta aurrekontuak egonkortasun helburua betetzen du“, dio Ekaitz Mentxaka Ugaoko alkateak. Udalak bere hornitzaileen ordainketen epeak betetzen dituela eta kalitatezko zerbitzu publikoak bermatzen jarraitzen duela ere gogorarazi du Mentxakak: “Datu moduan, 2013an Udalak 116.000 euroko geldikin negatiboa izan zuen, hortaz, 5 urte hauetako bilakaera askoz positiboago izan da“.

Kreditu aldaketak

2017an zehar, 2016ko geldikinaren zati bat erabiltzeko kreditu aldaketak egin zituen Udalak. Zehazki, besteak beste, honako partidetarako erabili ziren: Gizarte-Larrialdietarako Laguntzak (GLL) 5.000 euroan igotzeko; Etxeko Laguntza zerbitzua 32.000 euroan igotzeko (zehazki, hasierako 70.000 eurotik 107.000 eurora); Lehendakari Aguirre parkeko kulunkak erosteko 41.000 euro; alta hartuta ez zeuden horniketak Ur Partzuergoko likidazioak ordaintzeko 62.000 euro; argiteria publikoko partida igotzeko, udalerriko zenbait gune eta auzoetako argiztapena indartu baitzen; eta, Astibi auzoan lur-jausiak konpontzeko 6.300 euro.

Gora

Geuria Laguntzaileak Geuria Laguntzaileak