Quantcast

San Joan gauean

Erre daitezela gaurko suan handiuste eta aginte-gosea. Kiskali errepresioa, mendekua eta herri zapalduen oinazea. Zimel daitezela mina, amorrua eta etsipena. Sutara gerrak. Sutara. Sutara guzti-guztiak. Egin dezagun guztiok zurrunbilo kartsuaren gainetik salto, erraiak baretu eta kontzientzia bera garbitzeko. Zergatik eta onartu ditugunengatik. Esan ez ditugunengatik. Egin ez ditugunengatik. Eta gorde dezagun su-hondarren bat etxerako, badaezpada ere, norbere barruan ere izaten delako, sarritan, erretzeko nahikoa gauza.

Egin diezaiogun, horrela, diosala, biharamunean, egun berri eta garbiari. Joan gaitezen belar-ihintzetan oinutsik ibiltzera, bihotzak elorri-zuri eta lizar-adarrez apainduta, oraindik ere su-hautsa belaun biluzietan iltzatuta. Eta izan bedi, hurrengo hori, behingoz, egun lasai bat. Atxagarena bezala, berrogei egun arrunten luzerakoa, ahal dela. Egun finlandiar bat, egun finlandiar luze eta baketsu bat.

Erlazionatutako edukiak

*

*

Top