Zutabeak

Nostalgiak ez gaitu salbatuko

Hainbatek Basauritik alde egin behar izan zuten lan egin ahal izateko. Gaur egun 25-35 urteen bueltan direnak dira, batez ere. Horretara, herriaren egoerak baino, hego Euskal Herrian bizi dugun egoera ekonomikoak bultzatu zituen. Hortaz, askorentzat, Basauri, asteburu pasa bisita egiteko toki bilakatu zen. Are gehiago, Gabonetan edota herriko jaietan bisita egiteko tokia.

Urteak aurrera, etxera itzuli nahi izan zuten askok baino aukerarik ez. Zergatik? Etxerik ez zegoelako. Luze, hobe esanda, luzeegi jo zuen babes ofizialeko etxeen eraikuntzak. Ondorioz, baziren dagoeneko beste herri batzuetan bizitzeko hautua egina zutenak, edota, hein batean berdina dena, Basaurira itzultzeko esperantzarik ez zeukatenak. Nostalgiak ez gaitu salbatuko.

Eszenario berri horren bueltan bizi izan dugu, esate baterako, herritarrok erritual erlijioso gisa bizi ditugun Basauriko jaien gainbehera. Populazioa zahartzen ari da, makina bat gaztek alde egin dute, aisialdi moduak geroz eta mugatuagoak dira… Horren gainetik, bada fideltasuna. Alegia, herriak nortasuna galdu ez dezan lan egiten dutenak: Herriko Taldeak, Marienea, Zirt Zart edo skate mugimendua, esate baterako.

Kaleak xahutu eta eraldaketa sozial zein demografikoak eragin dituen aldaketak pauso bakoitzean dute isla: Bilbondok desagertarazi ez zituen dendak desagertarazi ditu egoerak. Frankiziak ari dira tokia hartzen herrian: lan prekario eta merkea eskaintzen dutenak, pertsonei garrantziarik ematen ez dietenak. Herriko aberastasuna beste herri batzuetara eramaten dituztenak. Madriletik nahi dutena esan dezakete, honetan ere, hautua gurea da. Nostalgiak ez gaitu salbatuko.

Gora

Geuria Laguntzaileak Geuria Laguntzaileak