☉ Basauri
Lorena Fernandez: “Zientzian eta teknologian diharduten emakumeak erreferente bihurtzea bilatzen dugu Inspira proiektuarekin”
Lorena Fernandez Deustuko Unibertsitateko Identitate Digitaleko zuzendaria da. Era berean, nesken artean bokazio zientifiko-teknologikoak sustatzen ditu Inspira Steam proiektuaren bitartez.
Lorena Fernandez Deustuko Unibertsitateko Identitate Digitaleko zuzendaria da. Era berean, nesken artean bokazio zientifiko-teknologikoak sustatzen ditu Inspira Steam proiektuaren bitartez
“Talentu berdina, onarpen berdina”. Hori izan da Bizkaiko Foru Aldundiak martxan jarritako WomenBi erakusketaren lema. Erakusketan partaide izan da Lorena Fernandez Alvarez (Basauri, 1982). Deustuko Unibertsitateko Identitate Digitaleko zuzendaria da eta Inspira Steam proiektuan aholkulari dabil. Azken honekin Europako Parlamentuan plazaratu zuen neska gazteak ahaldundu eta euren artean bokazio zientifiko-teknologikoak sustatzeko beharra.
Deustuko Unibertsitateko Identitate Digitaleko zuzendaria zara.
Hala da. Deustuko Unibertsitateko komunikazio digitaleko estrategia zehazteaz, inplementatzeaz, exekutatzeaz eta neurtzeaz arduratzen naiz. Bertan nire bi pasio uztartzea lortu dut: teknologia eta komunikazioa, alegia. Beti diodan bezala, makina deterministekin lan egitearen ideiak ingeniari izateko grina piztu zidan; baina ingeniaritza ikasketak bukatuta, ohartu nintzen makina baten atzean beti dagoela pertsona bat… Eta hori askoz gehiago gustatzen zitzaidan.
Zein izan da zuzendari izan aurretiko zure ibilbidea ingeniaritza munduan?
Unibertsitate ikasketak bukatu nituenean nire lehen lanbidea sistema administrari moduan izan zen. Labur azalduta: zerbitzariekin, sare-kableekin eta pantaila beltzen gaineko komando-lerroekin lan egiten nuela. Hau da, estereotipo anitzekin eta imaginario femeninotik oso aldendutako lanbidea nuen. Egia esan, emakume bakarra (eta lehena) nintzen postu horretan enpresa hartan.
WomenBi erakusketako partaide izan da Lorena Fernandez // Bizkaiko Foru Aldundia
Estereotipoekin apurtzeko unea, orduan.
Postu horretan emakume bakarra nintzela benetan konturatu nintzen sare-armairu bateko hartuneak ikuskatu behar nituenean. Hainbatetan egin izan nuen lan hori, baina oraingo horretan sare-armairuaren kokapenak harritu ninduen: enpresako gizonezkoen komunean zegoen, ustez emakume bat ez zelako sekula bertan sartuko! Lankide batekin joan nintzen sare-armairu horretako hartuneak ikuskatzera eta hutsik zegoenean gure lana burutu genuen. Eta anekdota ondoren etorri zen, nire familiari gertatutakoa azaldu nionean. “Goiza nire lankidearekin pasa dut gizonezkoen komunean” erantzuna ez zuten inola ere espero!
Noiz heldu zinen Unibertsitateko Identitate Digitaleko zuzendari izatera?
Denborarekin web sozialaz interesatzen hasi nintzen eta autoikaskuntzari ekin nion oraindik esparru hori garatu gabe zegoenean. Behin Unibertsitatetik arlo hori zehazteko ardura eman zidaten, nik lidergoa hartu behar nuela. Zentzu horretan ere, esan daiteke lehenengo emakumea naizela Identitate Digitaleko zuzendari bezala. 2012an hartu nuen kargua.
Destuko Unibertsitatetko IDko zuzendaria izateaz gain, Inspira Steam-eko aholkularia ere bazara.
Bai. Unibertsitateko genero plataforman ere parte hartzen dut. Plataforma horrek neskatila eta neska gazteak ahaldundu eta euren artean bokazio zientifiko-teknologikoak sustatzea du helburu, baita Adimen Artifizialean inpaktua analizatzea ere. Inspira Steam Euskadin sortutako proiektua da xede bera duena (gaur egun Espainian ere ezarri dute), eta horretarako lehen eta bigarren hezkuntzako ikasleen artean taldekako aholkularitza ematen dugu eskola orduetan, sei saiotan. Bizkaian 133 aholkulari inguru gaude.
Zientzian emakumeak ere badaudela erakusten diezue ikasleei?
Noski. Inspira Steam proiektuaren asmoa da zientzian eta teknologian diharduten gertuko emakumeak erreferente bihurtzea eurentzat. Benetako emakumeak gara eta ikasleek aukera dute gure lanbideaz eta gure egunerokoaz guri zuzenean galdetzeko. Azken finean, neskatila eta neska gazteek benetan nahi dutena izan daitezen bilatzen dugu, askatasun osoarekin. Aurten Basauriko Urbi Institutuan izan naiz aholkulari. Ikasle ohia izanik, ilusioa bikoitza izan da: alde batetik nire hezkuntza zentroa izandakoari zerbait bueltatzea, eta bestetik neskek konfiantza irabazten dutela eta ogibideen inguruan estereotipoak apurtu ditzaketela ikustea. Esate baterako, ikasle batek honako esaldi hau idatzi zuen: “Neskek mutilek egin ditzaketen gauza berak ere egin ditzakegula ikasi dut”.
Inspira Steam-eko zure profilak zera dio: Kristalezko sabaia apurtzeko borrokan zaudela.
Matxismoak ez du ideologiaz edo erlijioaz ulertzen; guztiz estrukturala da: katolikoa, ateoa, liberala, komunista, intelektuala, femeninoa eta maskulinoa da, besteak beste. Horregatik ikusten eta sentitzen dugu edozein esparrutan eta horregatik da hain zaila erauztea. Doce Miradas proiektuaren konpromisoa honakoa da: diskurtso berri bat osatzea eta aldaketan eragin nabariagoa izatea. Jakin badakigu oso zaila dela eta ditugun baliabideak eskasak direla, baina helburu batzuk gure eskura daude, eta horretan aurrera egin behar dugu. Helen Keller idazle eta aktibistaren esaldi hau ekarri nahi dut gogora: “Ez naiz bakarra, baina hala ere norbait naiz. Ezin dut dena egin, baina hala ere zerbait egin dezaket. Eta hain zuzen, dena ezin dezakedalako egin, ez diot uko egingo egin dezakedanari”.
Basauri Bonua kanpaina berria abiaraziko du Udalak apirilaren 22tik maiatzaren 19ra bitartean. Guztira herriko 140 saltoki atxiki dira kanpainara, iaz baino zazpi gehiago.
Aurreko urteetan bezala, bi bonu mota igorriko dituzte: bata 4 eurokoa, bezeroek 6 euro gastatu ahal izateko; eta bestea 10 eurokoa, 15 euro gastatzeko.
Aurrekoetan bezala, bonuak ez dituzte formatu fisikoan aterako. Bonuak kanpainari atxikitako establezimenduetan eskuratu behar dira, eta gehienez ere 60 eurora arteko bonuak erosi ahal izango dira NAN/IFZ/AIZ bakoitzeko. Ezin izango dira diru-truke aldatu eta, erabiltzen ez badira, ez da dirua itzuliko.
Kanpainara atxiki diren establezimenduen zerrenda apirilaren 22an bertan publikatuko dute bono.basauri.eus webgunean. Hala ere, saltoki bakoitzak Basauri Bonua identifikazio-eranskailua izango du.
100.000 euro gehiago
Basauriko Udalak 300.000 euro bideratu ditu aurtengo kanpainara, iaz baino 100.000 euro gehiago.
“Guztira 300.000 euro bideratuko ditugu ekimen honetara, baina udalerrian izango duen inpaktu ekonomikoa askoz ere handiagoa izango da, bezero bakoitzak bonua eskuratzean eta erosketa egitean ordaintzen duen kopurua gehitu behar baitzaio kopuru horri”, diote udal ordezkariek.
Basauriko Meeting Probak maiatzaren 5ean, igandez, izango dira Artunduagako kiroldegian 09:00etatik aurrera. Aurten 26. edizioa da eta guztira 40 proba izango dira, tartean kategoria paralinpikokoak.
Izan ere, proba Nazioarteko Batzorde Paralinpikoaren Nazioarteko Atletismo Egutegian sartuta dago, eta, beraz, meetingaren emaitzek errekorretarako eta KPIren rankingerako balioko dute.
Basauriko Meeting Probetan parte hartzeko izena emateko epea zabalik dago apirilaren 21era arte. “Beharrezkoa da atletek, gidariek eta entrenatzaileek izena emateko inprimakia betetzea”, diote batzorde antolatzailetik.
Meetinga Basauriko Merkatari Elkarteak antolatzen du, Udalaren laguntzarekin.
Arazo teknikoak direla eta, Etxebarri eta Basauri geltokien artean zerbitzua eten egin du Metro Bilbaok. Gainera, Basauri geltokia itxita egongo dela adierazi dute, “beste abisurik eman arte”.
Suhiltzaileek jakinarazi dutenez, “sute txiki bat” piztu da metro trenaren gainean, eta adierazi dutenez Metroko langileek eurek amatatu dute.
Pequeño incendio @metrobilbaoeus #Basauri extinguido x operarios #Metro #Bomberos revisan y regresan
Basauri, metron izandako sute txikia metro langileek amatatu dure #Suhiltzaileek errebisatu eta bueltan https://t.co/vMvxPNmsL8 pic.twitter.com/O1naiK59l1— Bomberos y Bomberas Bizkaia (@BomberosBizkaia) April 18, 2024
Alex Garcia Galas basauriarra (Basauri, 36 urte) pankreatitisak jota gaixorik dago Bangkokeko (Thailandia) ospitale batean.
Otsailaren 25ean ospitaleratu zuten Zainketa Intentsiboetako Unitatean (ZIU) eta ordutik bere senideak Euskal Herriratzeko ahaleginetan dira.
Alexen ingurukoek zabaldu dutenez, familiak, “etsi-etsian”, hegazkin medikalizatu bat kontratatu zuen bertara ekartzeko, baina ez zioten hegan egiten utzi, “barne-odoljario larria izateko arriskua” baitzegoen.
Familiak 221.000 euro jarri zituen hegazkin medikalizatu hori kontratatzeko, baina ezin izan dutenez erabili, diru hori galdu dute.
Gauzak horrela, crowfunding kanpaina bat abiarazi dute Alexen lagunek eta senideek. Momentuz 91.371 euro bildu dituzte.
Defentsa Ministerioarekin harremana
Alexen senideak Margarita Robles Defentsa ministroarekin harremanetan jarri ziren aste hasieran eta horrek egoera aztertuko zuela adierazi zien.
Orain, Eitb-k jakinarazi duenez, Defentsa Ministerioak baieztatu du pankreatitisa duen gaztea Espainiaratzeko (Madrilera eramango lukete) hegazkin medikalizatua prestatzen hasi direla, baina oraingoz ez dutela datarik zehaztu.
Diru bilketa Basaurin
Estatuko zein Euskal Herriko hainbat herritarrek dohaintzak egin dituzte. Momentuz 91.371 euro bildu dituzte eta asmoa da 221.000 eurora iristea.
Basaurin El Maño Basozelaiko Auzo Elkarteak kanpaina bat jarri du martxan dirua biltzeko: “Basozelaiko Auzo Elkartetik gure babesa adierazi nahi diogu gure bizilagun Alexen familiari eta datozen egunetan zehaztuko ditugu egingo ditugun ekitaldi solidarioak”, diote.
“Basozelaiko saltokietan itsaulapikoak jarriko ditugu Alexen familiari dohaintzak egiteko, eta diru-sarrerak egiteko kontu-zenbaki bat zehaztuko dugu”, adierazi dute.
Ikastetxeetako jolastokiak ikuspegi feministarekin eraldatzeko prozesua hasi dute Basaurin. Horretarako Udaleko Berdintasun Arloak jardunaldi bat antolatu du eskoletako jolastokiak ikuspegi feministarekin eraldatzearen garrantziari buruzko gogoeta bultzatzeko.
‘Patioetan hamaika aukera. Jolastokiak konpon eta berdintasuna lor’ lemapean, apirilaren 23an mahai-inguru ireki bat antolatu dute Basauriko Udalak eta Marieneak 1era2kain egitasmoaren barruan.
Jardunaldia Ibaigane Kultur Etxean izango da 17:30etik 20:00etara bitartean, eta Basauriko jolastokiak eraldatzeko prozesuan parte hartu duten Lehen Hezkuntzako ikastetxeen esperientziak aurkeztuko dituzte, “haien zailtasun, erronka eta aukerekin”.
Ildo horretan, etorkizuneko erronkak jasoko dituzte “eskola-ingurune inklusibo, genero-estereotiporik gabekoa eta ingurunearen eta pertsona guztien zaintzaz arduratutako baterantz urratsak egiten jarraitzeko”.
Jardunaldian parte hartu nahi duten herritarrek izena eman behar dute esteka honen bitartez edo 605 173 119 telefono zenbakira deituz apirilaren 22a baino lehen.
Autobus zerbitzu osagarria jarri du Metro Bilbaok Etxebarri eta Basauri artean
Basauri Bonua kanpaina berria martxan izango da apirilaren 22tik maiatzaren 19ra arte
Urreta kiroldegia handitzeko lanak udan hastea aurreikusi du Galdakaoko Udalak
Hego Uribeko dozenaka pentsiodun Gasteizen batu dira 1080 euroko gutxieneko pentsioa aldarrikatzeko
⚪️🔴 GABARRA | Argazkiak | Aupa Aitor Paredes! Talde zuri gorria Kopako txapelketa ospatzen!
