→Arrigorriaga

Arrigorriagak hamasei nitxo izango ditu hilerrian komunitate musulmanaren hildakoak ehorzteko

Gehienez hamasei nitxo prestatuko dira, eta gehienez bost urteko iraupena izango dute.

Landaederragako hilerria / Arrigorriagako Udala

Arrigorriagako Udala lankidetzan ari da Eusko Jaurlaritzako Biktimen eta Giza Eskubideen Zuzendaritzarekin elkarlanean, musulmanen ehorzketen arazoa konpontzeko asmoz, Arrigorriagako Udalak hamasei horma-hilobi prestatuko ditu komunitate horrek erabiltzeko espreski zuzenduta. Hortaz, Landaederragako hilerriak aldi baterako prestatutako hamasei nitxo berezi izango ditu.

Horrela, covid-19k eragindako arazoetako bati konponbidea emango dio Arrigorriagak. Izan ere, ehorzketa horiek Euskal Herritik kanpo egin ohi dira, bai erlijioak eskatzen dituen baldintza bereziengatik, bai Euskal Autonomia Erkidegoan leku gutxi daudelako horretarako prestatuta eta erabilgarri. Baina pandemiak eragindako murrizketa-neurrien ondorioz, ezin izan da gorpuak beste lurralde batzuetara eraman.

Maite Ibarra alkatearen esanetan, “Arrigorriagan beti izan gara herri inklusiboa eta anitza, eta ikuspegi teknikotik proiektu egingarria zela ikusita, Eusko Jaurlaritzak planteatutako ekimenarekin elkarlanean aritzea erabaki genuen. Covid 19ren osasun-krisiak ustekabeko egoeren aurrean jarri gaitu, eta hain trantze mingarrian kolektibo horren eta bere senideen eskubideak bermatuko dituzten ekimenetan modu aktiboan parte hartu eta lagundu izanak pozten gaitu”.

Konponbide partziala eta aldi baterakoa da: gehienez hamasei nitxo prestatuko dira, eta gehienez bost urteko iraupena izango dute. Denbora hori igarotakoan, hobitik atera eta dagokien legezko destinoa eman beharko zaie. Udalak bere gain hartzen du Landaederragako hilerri-parkean hamasei nitxo eraikitzeko administrazio-kontratazioa, dauden nitxoen forma, material eta konfigurazio berdinarekin. Eusko Jaurlaritzak, ostera, bere gain hartuko du obra osoaren finantzaketa.

Gora

Geuria Laguntzaileak Geuria Laguntzaileak