Sareak

☉ Arrigorriaga

Doako 35 kultura eta kirol jarduerez osatutako ‘Arrigorriaga On’ programa abiaraziko du Udalak hilabete bukaeran

Orain 5 urte

|

Ezkerretik eskumara: Rosa Martinez, Maite Ibarra, Sonia Camara izenekineta Iratxe Rubio, udaletxe aurrean // Geuria

Arrigorriagako Udalak doako 35 kirol eta kultura jarduerez osatutako ‘Arrigorriaga On’ programa antolatu du martxoaren 23tik apirilaren 11ra, horietako 25 euskara hutsean izanik: “Kultura eta kirola uztartuko dituen programazio fresko eta bizia eskainiko die Arrigorriaga On programak herritarrei eskaintzen. Pandemiak baldintzatuta datoz aurtengo oporraldi guztiak, eta Aste Santua ez da salbuespena: Aurreikusten genuen gerta zitekeela egoera honetan egotea, eta horregatik, ikasturtearekin batera lanean hasi ginen, osasun egoeraren eta mugikortasun murrizketen arabera aukera eta programazio ezberdinak lantzen”, azaldu du Iratxe Rubio Kultura zinegotziak programaren aurkezpenean, udaletxeko Osoko bilkuren aretoan.

“Herriko jarduerak antolatu behar genituen, murrizketek eragindako egoera ikusita”, jarraitu du Sonia Camara programatzaile soziokulturalak. “Programa honek kontziliazioa errazten du: umeek aste biko oporrak dituzte Aste Santuan eta helduek egun batzuk libre dituzte ere eta pandemiak herriko etxeetan eragina izan duenez ‘Arrigorriaga On’ programak gastu ekonomikorik gabeko aisialdiaz gozatzen utziko digu“.

Udalak 25.000 euro bideratu ditu adin tarte ezberdinei zuzendutako programa Arrigorriagako erdigunean zein Abusun burutzeko: “Jakin badakigu aurreko urteetan baino askoz jende gehiago ibiliko dela herrian, eta Arrigorriagan kulturaz eta kirolaz gozatzeko aukerak biderkatu nahi izan ditugu”, jarraitu du Iratxe Rubiok. Arrigorriagan bertan Gatibu taldeak kontzertua eskainiko die 18 urte gorako gazteei, formatu akustikoan. Haurrentzako tailerrak prestatu dituzte eta zinema saioak eta spinning eta zumba masterclassak izango dira herrian. Jarduerak Gaztegunean, Herrigunean, kiroldegian eta Abusun eskainiko dituzte. Gazteguneko jarduerak 12 eta 17 urteko gazteei zuzendutakoak izango dira. Herrigunean adin ezberdinetako pertsonei zuzendutako jarduerak egongo dira: hitzaldiak, tailerrak, film proiekzioak… Kiroldegian profesional bik spinning eta zumba masterclass bereziak eskainiko dituzte. Abusun ume txikienetan zentratutako jarduerak egingo dituzte, kontaketa saioak eta tailerrak.

“Pandemiak utzi digun berri on bakarren artean badago herrian egoteko eta bizitzeko ohitura indartu duela. Zentzu horretan, uste dugu kulturak badaukala herritarren ohituretan eragiteko gaitasuna, eta Arrigorriagaz gozatzeko modu osasuntsu, dibertigarri eta kitzikagarria izan daitezke Arrigorriaga ON bezalako ekimenak”, izan dira Maite Ibarra alkatearen hitzak. Ibarrak azpimarratu du jarduera guztiak doakoak izan arren izena ematea derrigorrezkoa izango dela, azken eguna martxoaren 22an izanik, eta horri edukiera mugak era zorrotzean beteko direla gehitu du. “Modu berean, eraikin bakoitzean dauden kontingentzia planak zorrotz ere beteko dira”.

Maite Ibarra alkatea, Arrigorriaga ON programaren aurkezpena bukatzean // Geuria

Programa, egunez egun

GAZTEGUNEA

Bertako jarduerak 12 eta 17 urte bitarteko gazteei zuzendutakoak dira eta Gaztegunean eskainiko dira, 18:30ean, edukiera 10 lagunekoa izanik. Salbuespenak salbuespen. Izena emateko idatzi gazteria@arrigorriaga.eus helbide elektronikora.

  • Martxoak 26, ostirala: Alkoholik gabeko koktelak – 12 eta 17 urte bitarteko gazteei zuzendutako tailerra. Abusun, 17:30ean. Edukiera: 10 lagun
  • Martxoak 27, larunbata: Gatiburen kontzertu akustikoa – 18 urtetik gorako gazteentzat. Lonbo aretoan. Pase bi egongo dira: 17:30ean eta 19:30ean. Saio bakoitzeko edukiera: 107 lagun
  • Martxoak 28, igandea: Alkoholik gabeko koktelak – euskaraz
  • Apirilak 6, asteartea: Gaztechef – euskaraz
  • Apirilak 7, asteazkena: Arrautzekin dekoratzen ikasteko tailerra – euskaraz
  • Apirilak 8, osteguna: Aeroyoga – euskaraz
  • Apirilak 9, ostirala: Ispilu-mandala – euskaraz
  • Apirilak 10, larunbata: Lightpainting – euskaraz

HERRIGUNEA

Herriguneko jardueretan izena emateko idatzi scamara@arrigorriaga.eus helbide elektronikora edo deitu 946 712 361 telefono zenbakira 16:00etatik 20:00ak arte.

  • Martxoak 23, asteartea: ‘Familia harremanak Covid garaian’ tailerra – 18 urtetik gorakoentzat, Kultur etxean, 19:00etan. Edukiera: 12 lagun
  • Martxoak 28, igandea: ‘Onward’ filmaren proiekzioa – Gaztelaniaz. Lonbo aretoan, 18:30ean. Edukiera: 107 lagun
  • Martxoak 29 eta 31, astelehena eta asteazkena: Umeentzako tailerrak: zientzia eta esperimentuak – euskaraz. 4 eta 12 urte bitarteko haurrentzako tailerra. Euskaldun Berria erakusketa gelan, 17:00etan. Edukiera: 35 lagun
  • Martxoak 30, asteartea: Osasun fisiko eta mentala Covid garaian – Kultur etxean, 19:00etan. Edukiera: 12 lagun
  • Martxoak 30, astelehena: ‘Manou’ filmaren proiekzioa – 4 eta 8 urte bitarteko haurrentzako emanaldia – euskaraz. Lonbo aretoan, 12:30ean. Edukiera: 107 lagun
  • Martxoak 31, asteazkena: ‘Parásitos’ filmaren proiekzioa – gazteleraz. Helduentzako emanaldia. Lonbo aretoan, 19:00etan. Edukiera: 107 lagun
  • Apirilak 6-9: ‘Telefono mugikorraren erabilera eraginkorra adinentzako tailerra’ – gazteleraz. Kultur etxean. Saio bi egingo dira: 11:30ean eta 17:30ean. Edukiera: 6 lagun
  • Apirilak 6-9: Umeentzako zientzia eta esperimentu tailerrak – 4 eta 11 urte bitarteko haurrentzako tailerrak – euskaraz. Euskaldun Berria erakusketa gelan, 17:00etan. Edukiera: 35 lagun
  • Apirilak 6, asteartea: ‘Nutrizioa Covid garaian’ tailerra – 18 urtetik gorakoentzako tailerra – euskaraz. Kultur etxean, 19:00etan. Edukiera: 12 lagun
  • Apirilak 8, osteguna: Pokemon: Pikachu Detektibea – 4 eta 11 urte bitarteko haurrentzako saioa – euskaraz. Lonbo aretoan, 12:30ean. Edukiera: 107 lagun
  • Apirilak 9, ostirala: Artoteka tailerra – 12 urtetik gorako haurrentzako tailerra – gazteleraz. Euskaldun Berria erakusketa gelan, 18:30ean. Edukiera: 15 lagun
  • Apirilak 10, larunbata: ‘Joker’ filmaren proiekzioa – gazteleraz. Lonbo aretoan, 18:30ean. Edukiera: 107 lagun
  • Apirilak 11, igandea: ‘Quien a Hierro Mata’ filmaren proiekzioa – gazteleraz. Lonbo aretoan, 19:00etan. Edukiera: 107 lagun

KIROLDEGIA

Kiroldegiko masterclassetan parte-hartzeko deitu 946 711 021 telefono zenbakira.

  • Martxoak 27, larunbata: Spinning masterclassa – 15 urtetik gorako gazteentzat – elebiduna. Kiroldegian, 12:00etan. Edukiera: 18 lagun
  • Apirilak 10, larunbata: Zumba masterclassa – 15 urtetik gorako gazteentzat – elebiduna. Kiroldegian, 12:00etan. Edukiera: 18 lagun

ABUSU

Abusuko jardueretan izena emateko idatzi abusu@arrigorriaga.eus helbide elektronikora edo deitu 944 792 930 telefono zenbakira 16:00etatik 20:00ak arte.

  • Martxoak 29, astelehena: ‘Edison robotarekin jarduera’ – 7 eta 9 urte bitarteko haurrentzat – euskaraz. 4. gelan, 17:00etan. Edukiera: 10 lagun
  • Martxoak 30, asteartea: ‘Diseinatu eta programatu zure marrazkiak Mind Designer erabiliz’ – 7 eta 9 urteko haurrentzat – euskaraz. 4. gelan, 17:00etan. Edukiera: 10 lagun
  • Martxoak 30, asteazkena: ‘Cospaces erabiliz mundu birtuala sortu’ – 10 eta 12 urte bitarteko haurrentzako tailerra – euskaraz. 4. gelan, 10:00etan. Edukiera: 10 lagun
  • Apirilak 6, asteartea: ‘Joko erraldoiak eta ipuin kontaketa saioa’ (gaia: euskal mitologia) – 3 eta 5 urte bitarteko haurrentzat – euskaraz. Sarrera nagusian edo plazan, 17:00etan. Edukiera: 15 lagun
  • Apirilak 7, asteazkena: ‘Eskulanak eta fabula kontuak’ (gaia: zientzia) – 3 eta 5 urte bitarteko haurrentzat – euskaraz. Sarrera nagusian edo plazan, 17:00etan. Edukiera: 15 lagun
  • Apirilak 8, osteguna: ‘Eskulanak eta joko erraldoiak’ (gaia: ingurumena) – 6 eta 10 urte bitarteko haurrentzat – euskaraz. Sarrera nagusian edo plazan, 17:00etan. Edukiera: 15 lagun
  • Apirilak 9, ostirala: ‘Bide-zirkuitua eta magia-saioa’ (gaia: bide-segurtasuna) – 6 eta 10 urte bitarteko haurrentzat – euskaraz. Sarrera nagusian edo plazan, 17:00etan. Edukiera: 15 lagun

 

Sailkatuta:

☉ Arrigorriaga

Arrigorriagako Mendi Asteak emakumeen ahotsak ekarriko ditu Lamiaena eta Lonbo aretora

Aurtengo hitzaldietako protagonistak Igone Mariezkurrena, Elixabete, Johanna eta Bego hirukotea eta Pipi Cardell izango dira

Orain 22 ordu

|

2025/10/28

Lesothora egindako bidaiaren argazki bat // Igone Mariezkurrena

Azaroaren 10etik 20ra Mendi Astea antolatu du Padura Mendi Taldeak Lamiaena Emakumeen Etxean eta Lonbo aretoan.

Aurtengo hitzaldietako protagonistak Igone Mariezkurrena, Elixabete, Johanna eta Bego hirukotea eta Pipi Cardell izango dira. Gainera, Alex Txikon beste urte batez hurbilduko da Lonbo aretora.

Saioak arrastietan izang0 dira eta sarrera doakoa izango da.

Egitaraua | Arrigorriagako Mendi Astea 2025

Azaroak 10, astelehena
20:00 Igone Mariezkurrena: ‘Leshoto, mendietako erresuma afrikarra, bizikletaz’, Lonbo aretoa

Azaroak 13, osteguna
19:00 Elkarregaz (Elixabete, Johanna eta Bego): ‘GR 11, zeharkaldi bat baino gehiago’, Lamiaena

Azaroak 18, asteartea
20:00 Pipi Cardell: ‘Nanga Parbat (8.125mt) – Via “Nezabudka”‘, Lonbo aretoa

Azaroak 20, osteguna
20:00 Alex Txikon, Lonbo aretoa

Osorik irakurri

☉ Arrigorriaga

Argazkiak | Ehun arrigorriagar baino gehiagok Heidelberg enpresan gertatutako heriotza-istripua salatu dute herriko plazan

“Eredu berri bat behar dugu Euskal Herrirako, enpresen irabazi ekonomikoen aurretik langileon bizitza eta osasuna lehenetsiko duena. Lanetik onik eta bizirik bueltatzeko eskubidea dugu, eta horren alde borrokatu eta antolatuko du langileriak”, aldarrikatu dute herritarrek

Orain 2 egun

|

2025/10/27

Herritarrak, udaletxe aurrean elkartuta // Geuria

Gaur arrastian joan den urriaren 22an Arrigorriagako Heidelberg enpresan gertatutako heriotza-istripua salatu dute herritarrek, udalatxe aurreko plazan.

Elkarretaratze isila izan da, 20 minutu ingurukoa. Amaitzerakoan adierazpenak egin dituzte: “Istripuak ez dira kasualitateak sortuak. Ematen diren prekarizazioaren eta lan baldintzen ondorio zuzenak dira. Patronalaren aldetik, kapitala langileen segurtasunaren gainetik jartzearen ondorioz. Lan istripu bat eragiten duen makinak ez du lan osasunerako araudia betetzen; Eusko Jaurlaritzari dagokio enpresei lan-osasun araudia betearazteko bitartekoak jartzea eta ez dute egiten”.

Herritarrek elkartasuna eta babesa adierazi diete istripuaren ondorioz zendu zen langileari. “Eredu berri bat behar dugu Euskal Herrirako, enpresen irabazi ekonomikoen aurretik langileon bizitza eta osasuna lehenetsiko duena. Lanetik onik eta bizirik bueltatzeko eskubidea dugu, eta horren alde borrokatu eta antolatuko du langileriak. Aski da, bizitzak erdigunean!”.

19:45ak inguru amaiera eman diote elkarretaratzeari, txalo zaparrada batekin.

Osorik irakurri

☉ Arrigorriaga

Gazteen hiru laurdenak ezin du emantzipatu Arrigorriagan, udal diagnostikoaren arabera

Txostenaren helburua  “joera demografikoak, egoera sozioekonomikoa eta etxebizitza parke publiko zein pribatuaren ezaugarriak” ezagutzea dela adierazi dute udal ordezkariek

Orain 2 egun

|

2025/10/27

Udalak bi aurkezpen publikoa egingo ditu, bata azaroaren 6an eta bestea 12an // Geuria

Arrigorriagako Udalak herriko etxebizitza diagnostikoa egin du, udalerriko etxebizitza egoeraren argazki zehatza jasotzeko asmoz. Txostenaren helburua  “joera demografikoak, egoera sozioekonomikoa eta etxebizitza parke publiko zein pribatuaren ezaugarriak” ezagutzea dela adierazi dute udal ordezkariek.

Ikertaldek eraman du azterketaren ardura, eta haren arabera, “udalerriak %10,7ko hazkunde demografikoa izan du 2001etik, Euskal Autonomia Erkidegoko batez bestekoa gaindituz”.

Hazkunde hori, Bilbo Handiko migrazio-dinamiken ondorioz izan da batez ere, eta ondorioz, etxebizitza-premia duten gazteen kopurua ere handitu egin da.

Aldiz, eskaintza  ez da erritmo berean hazi, eta horrek prezioetan eragin nabarmena izan du. Horren erakusgarri da Etxebiden izan den eskari kopurua, Arrigorriagan inguruko herrietan baino handiagoa dena.

Gazteen egoerari dagokionez, emantzipazio-tasa orokorra %28,1ekoa da, EAEko batez bestekoaren azpitik. Hau da, 34 urtetik beherakoen ia hiru laurdenek ezin dute emantzipatu gaur egun. Auzoen artean aldeak daude: Abusun %36,1eko tasa da, eta Herrigunean %24,9koa.

Bestalde, udalerriko etxebizitzen %10a hutsik dago, eta azken urteetan ez da nabarmen handitu alokairura bideratutako etxebizitzen kopurua. Salerosketaren erritmoak ere behera egin du, eta gaur egun metro karratuko prezioa 2.400 eurotik behera dago, Bilbo Handiko batez bestekoaren azpitik.

Gardentasuna eta etorkizunerako oinarri sendoak

David Cidre Hirigintza zinegotziaren hitzetan, diagnostikoa “gardentasun-ariketa bat” da, etorkizuneko etxebizitza politiken oinarria, hain zuzen ere: “Emaitzek argi erakusten dute Arrigorriaga udalerri erakargarria dela, baina, aldi berean, etxebizitza eskuratzeko arazoak badaudela. Guretzat, etxebizitza oinarrizko eskubidea da, eta ez inbertsio espekulatiborako merkantzia”.

Udal gobernuak etxebizitzaren erronkari aurre egiteko duen asmoaz ere hitz egin du Cidrek: “Txosten hau hasiera besterik ez da. Orain, azterketan identifikatutako arazoei erantzungo dieten neurri zehatz eta ausartak zehazten ari gara”.

Zailtasunak zailtasun, Arrigorriagako Udalak etxebizitzaren egoera hobetzeko hainbat pauso eman dituela nabarmendu nahi izan dute udal gobernutik.

Duela urtebete onartu zen behin betiko Hiri Antolamenduko Plan Orokorra, eta aurten bertan, Maite Ibarra alkatea, David Cidre eta Josetxu Olivares arkitekto aholkularia Eusko Jaurlaritzako Etxebizitza, Lurzoru eta Arkitekturako zuzendari Pablo García Astrainekin bildu ziren, babes sozialeko 127 etxebizitza eraikitzeko hiru orube eskaintzeko.

Horrez gain, gobernu taldea beste udal batzuetako proiektuak bertatik bertara ezagutzen aritu da, etxebizitza arloko esperientziak partekatzeko helburuarekin.

Herritarrentzako aurkezpenak azaroan

Txostenaren emaitzak herritarrek gertutik ezagutzeko, Udalak bi aurkezpen publiko antolatu ditu:

  • Azaroaren 6an, 19:00etan, Edurne Garitazelaia kultur etxean (Azokea aretoa)

  • Azaroaren 12an, 19:00etan, Abusuko Zentro Soziokulturalean

Osorik irakurri

☉ Arrigorriaga

Bideoa | Dozenaka pertsona elkartu dira Arrigorriagan Heidelberg enpresan gertatutako lan-heriotza salatzeko

LAB: “Lan prebentziorako neurriak ez betetzearen ondorioz hil egin da langilea. Harrapaketa sor dezakeen edozein tresna egokitu beharra dago”

Orain 5 egun

|

2025/10/24

Gaurko elkarretaratzea, Arrigorriagako udaletxe aurreko plazan // Geuria

“Patronalak eta instituzioek gaixotu eta hiltzen gaituzte” lelopedun pankartarekin dozenaka pertsona elkartu dira Arrigorriagako udaletxeko plazan, joan den asteazkenean Heidelberg enpresan gertatu zen lan-heriotza salatzeko.

Elkarretaratzea LAB, ESK, Steilas, EHNE-Etxalde eta HIRU sindikatuek deitu dute: “Dauzkagun datuen arabera, torno batek harrapatuta hil zen eskualdeko langile bat”, azaldu du Agus Figal LABeko Hego Uribe eskualdeko arduradunak. “Gaur elkartu garen sindikatuok egoera hau salatu nahi dugu”, izan dira sindikatuko ordezkariaren berbak.

LABeko ordezkarien arabera, Heidelberg enpresan gertatutako istripua “ekidin zitekeen”: “Lan prebentziorako neurriak ez betetzearen ondorioz hil egin da langilea. Harrapamendua sor dezakeen edozein tresna egokitu beharra dago. Lan-kodeak argi esaten du hori hala egin behar dela”.

LAB: “Lan prebentziorako neurriak ez betetzearen ondorioz hil egin da langilea”

Elkarretaratzean egon diren herritar batzuk // Geuria

Agusen hitzetan, lan prebentziorako eskumena Eusko Jaurlaritzarak dauka: “Baina, Jaurlaritzak beharrezkoak diren aldaketak egiteko zein behar diren prebentzio neurriak hartzeko presioa egin beharrean, enpresei nahi dutena egiten uzten die. Ondorioz, honelako ondorio larriak gertatzen dira”.

LAB: “Jaurlaritzak beharrezkoak diren aldaketak egiteko zein behar diren prebentzio neurriak hartzeko presioa egin beharrean, enpresei nahi dutena egiten uzten die”

Ezbeharra gertatu zenetik ekimen ezberdinak antolatu dituzte eskualdean: ELAk elkarretaratzea deitu zuen enpresa aurrean; gaur, euskal gehiengo sindikalak Arrigorriagako elkarretaratzea antolatu du.

Hurrengo astelehenean, herrian ere beste elkarretaratze bat deitu du herri mugimenduak, 19:30ean, “Prekarietateak hiltzen du” lelopean.

Osorik irakurri

☉ Arrigorriaga

Arrigorriagako Heidelberg enpresan gertatutako lan-heriotza salatzeko elkarretaratzea urriaren 27an egingo dute

Elkarretaratzea 19:30ean izango da Arrigorriagako udaletxe aurreko plazan

Orain 6 egun

|

2025/10/23

Arrigorriagako udaletxe aurreko plazan egingo dute elkarretaratzea, astelehenan // Geuria

“Lan, bizi, pentsioa duinak” plataformak elkarretaratzea deitu du datorren urriaren 27an, 19:30ean, Arrigorriagako udaletxeko plazan, atzo Heidelberg enpresan gertatutako lan-heriotza salatzeko.

Istripuaren ondorioz 45 urteko langile bat hil egin zen: “Lan istripu gehiagorik ez! prekarietateak hiltzen du”, salatu dute sindikatutik eta gaur bertan elkarretaratze bat egin dute Arrigorriagako Arane auzoan (Heidelberg enpresaren sarreran), eguerdian.

“Laneko segurtasun eta osasun neurriak behar bezala ez ezartzeak, produkzio presioak eta pisu handien edo errotazio-piezen eraginpean egoteak handitu egiten dute harrapatuta edo zapalduta egoteagatik istripu larriak izateko aukera”, azaldu dute ELAko bozeramaileek. “Horrelako lanetarako, etengabeko prestakuntza behar da laneko arriskuen prebentzioan, eta blokeo eta seinaleztapen protokoloak zorrotz aplikatu behar dira martxan dauden ekipoetan edozein esku-hartze egin aurretik”.

Sindikatuak argitaratutako datuen arabera, 2025ean 44 langile hil dira Hego Euskal Herrian lan istripu baten ondorioz: “Bizkaian, zehazki, 9 pertsona hil dira. Industria-sektoreak, eta, bereziki, zementuaren eta deribatuen fabrikazioak, arrisku maila handiak ditu, makina astunak, doitasun erremintak eta mantentze lanak etengabe erabiltzen baitira, eta horrek mugitzen ari diren ekipoekin zuzeneko kontaktua izatea eskatzen du”.

ELA: “2025ean 44 langile hil dira Hego Euskal Herrian lan istripu baten ondorioz. Heriotza horietako 9 Bizkaian izan dira”

“Lan heriotza bakoitza ez da halabeharrezko ezbehar bat: enpresen erabakien, prebentzioan egindako murrizketen eta kontrol instituzional ezaren emaitza da. Ezin dugu jarraitu normalizatzen langileek beren bizitzarekin ordaintzea zementuaren, burdinaren edo enpresa etekinen prezioa”, azaldu dute sindikatutik.

“Laneko ezbeharrak egiturazko eta erakundeetako indarkeria mota bat dira. Premiazkoa da ikuskapenak indartzea, legea betetzen ez duten enpresen zigorrak handitzea eta langileon bizitza eta osasuna politika ekonomiko eta produktiboaren erdigunean jartzea.”

Osorik irakurri