☉ Arrigorriaga
PCR positibo bat atzeman dute Arrigorriagan azken orduetan
Uztailaren 14an positibo bakarra atzeman dute Hego Uriben, Arrigorriagan. Eskualdeko gainerako udalerrietan ez dute PCR positiborik diagnostikatu azken lau egunetan.
PCR positibo berrien inguruko txostena argitaratzen du egunero Osasun Sailak, eta astero datu orokorren berri ematen du (positiboak eta hildakoak udalerrika). Uztailaren 15ean publikatutako txostenaren arabera, hilaren 14an positibo bakarra atzeman dute Hego Uribe eskualdean. Hain zuzen ere, Arrigorriagan. Eskualdeko gainontzeko udalerrietan ez dute PCR positiborik diagnostikatu.
Datu orokorrei dagokienez (uztailaren 6ra artekoak), 1.200 positibo atzeman dituzte Hego Uriben: 132 Arrigorriagan, 552 Basaurin, 113 Etxebarrin, 349 Galdakaon, 36 Ugaon, 11 Zaratamon eta 7 Zeberion. Hildakoak 128 izan dira eskualdean: 12 Arrigorriagan, 75 Basaurin, 6 Etxebarrin, 32 Galdakaon, 2 Ugaon eta 1 Zaratamon. Azpimarratzekoa da Zeberion positibo kopuru bera dagoela ekainaren 8tik eta ez dela koronabirusaz hildakorik egon. Uztailaren 13ra arteko datuak aste honetan zehar emango ditu Eusko Jaurlaritzak jakitera.
Maskarak derrigorrezkoak
Nekane Murga Osasun sailburuak gaur bertan eman du horren berri: maskarak derrigorrezkoak izango dira bihartik aurrera EAE osoan, kalean zein espazio publiko itxietan, “pertsonen arteko distantzia edozein izanda ere”, dio Murgak. Azken 24 orduetan 60 kasu atzeman dituzte EAEn: 7 Araban, 10 Bizkaian, 41 Gipuzkoan eta 2 kasu Euskaditik kanpo.
Tabernetan, jatetxeetan edota elkarte gastronomikoetan maskara erabili beharko da eta, “edaria edo janaria irensten den unean bakarrik kendu ahal izango da”, dio Murgak. Gainera, mahai baten inguruan gehienez ere 10 pertsona egon ahal izango dira, establezimendutik kanpo zein establezimendu barruan, eta ordutegi-luzapenak etenda geratu dira.
Igerilekuetan eta hondartzan ere derrigorrezkoa izango da maskara erabiltzea, “joan-etorrietan”, eta etzatean edo leku batean esertzean kendu ahal izango da, “betiere metro eta erdiko tartea gordetzen bada, edo pertsonak elkarbizitza unitate berekoak badira”, dio Murgak. Neurri berriak aplikatzea ez du baztertu Osasun sailburuak.
DATUAK / Koronabirusa / Herriz herri
Azken eguneraketa: uztailak 6
POSITIBOAK
– ARRIGORRIAGA: 132
– BASAURI: 552
– ETXEBARRI: 113
– GALDAKAO: 349
– UGAO: 36
– ZARATAMO: 11
– ZEBERIO: 7
– HEGO URIBE: 1.200
– BIZKAIA: 12.028
– EAE: 20.902
HILDAKOAK
– ARRIGORRIAGA: 12
– BASAURI: 75
– ETXEBARRI: 6
– GALDAKAO: 32
– UGAO: 2
– ZARATAMO: 1
– ZEBERIO: 0
– HEGO URIBE: 128
– BIZKAIA: —
– EAE: 1.622
☉ Arrigorriaga
Arrigorriagako Hezkuntza Kontseilu berriak udalerriko hezkuntza-beharrak identifikatuko ditu
Udalerriko hainbat eragilek eratutako foro honek, gainera, hezkuntzari eskola-eremutik kanpo ere helduko dioten baterako proposamenak eta ekintzak bultzatuko ditu aldi berean
Joan den otsailean lehen ohiko bilera egin ostean, martxan da Arrigorriagako Udal Hezkuntza Kontseilua.
Ikastetxeetako, familietako, hezkuntzako, udal zerbitzuetako, kirol klubetako eta Udaleko talde politiko guztietako ordezkariek eratzen dute foro hau eta helburu nagusia udalerriko hezkuntza-beharrak modu koordinatuan identifikatzea izango da. Gainera, hezkuntzari eskola-eremutik kanpo ere helduko dioten baterako proposamenak eta ekintzak bultzatuko dituzte.
Gorka Etxebarria Euskara, Hezkuntza eta Gazteria zinegotziak azaldu du kontseilua “tresna baliotsua” izango dela hezkuntza ardura partekatua izan dadin: “Elkarrekin eta era kohesionatuan egin behar dugu lan, eta horretarako aukera eskainiko digu kontseiluak”, eta Kontseilu hau martxan egotea “urrats garrantzitsua” dela gaineratu du, ” komunitate gisa dugun erantzukizun partekatua aitortzeko eta haurren eta nerabeen ahotsak benetako espazioa izan dezan bermatzeko”.
Hezkuntzaren esparruan, kontseilu honen motorrak dira Arrigorriagako Haurreskola, eskola, institutua eta Abusu ikastola; Familiari dagokionez Gure Magalean guraso elkartea ageri da; Hezkuntza eragileen artean Altzoan zaintza sarea, Arritxikerrak, Kilimusi eskaut taldea eta eskolako mendi taldea; udal zerbitzuetan Gaztegunea, Ludoteka eta EISE (Gizarte Zerbitzuetako hezitzaileak) eta kirol kluben artean Padura saskibaloia, Garriko taekwondo, Arri-gorri irristaketa eta Arrigorriagako Tenis Kluba.
“Kontseilu honen bidez, Udalak benetako udalerri hezitzailea eraikitzeko apustua berresten du, gobernu-planaren 26. neurrian jasotako konpromisoari erantzunez”, diote Udaletik.
☉ Arrigorriaga
Arrigorriagako udal igerilekuen ordutegia ordu erdi luzatuko dute martxotik aurrera “zerbitzua hobetzeko”
Goizeko lehen orduan erabiltzaile asko pilatzen direla detektatu ondoren, irekiera-ordua aurreratzeak masifikazioak gutxitzen lagunduko duela arrazoitu dute Udaletik
Gaur egun arte, Arrigorriagako udal igerilekuek 09:00etan zabaltzen zituzten ateak, baina martxotik aurrera ordu erdi lehenago zabalduko dute, 08:30ean, alegia.
Helburua “zerbitzua hobetzea” dela iragarri dute udal ordezkariek: “Neurri hau erabiltzaileen eguneroko beharrei entzun ondoren hartu da”, azaldu dute. Izan ere, goizeko lehen orduan erabiltzaile asko pilatzen direla detektatu ondoren, irekiera-ordua aurreratzeak masifikazioak gutxitzen lagunduko duela arrazoitu dute. “Gainera, ordutegi zabalagoarekin, herritar gehiagok izango dute euren erritmoari egokitutako kirola eta igeri egiteko aukera”.
Horrela, urteko egutegiari dagokionez ordutegia 08:30etik 22:00ra bitartekoa izango da astelehenetik ostiralera, 08:30etik 20:00ak bitartekoa larunbatetan eta 08:30etik 14:00ak artekoa igande eta jaiegunetan.
Uda sasoian (ekainaren 8tik irailaren 6ra, orokorrean), ordutegia 08:30etik 22:00ra bitartekoa izango da astelehenetik ostiralera, 08:30etik 20:00ak bitartekoa larunbatetan eta 08:30etik 20:00ak artekoa igande eta jaiegunetan.
Uztaila eta abuztuan, ordutegia 08:30etik 21:00ra bitartekoa izango da astelehenetik ostiralera, 08:30etik 20:00ak bitartekoa larunbatetan eta 08:30etik 20:00ak artekoa igande eta jaiegunetan.
☉ Arrigorriaga
Zineforuma, antzerkia eta erromeria antolatu dituzte Arrigorriagan, Emakumeen Nazioarteko Egunaren testuinguruan
Jardueraz beteriko egitarau zabala antolatu du Arrigorriagako Udalak Lamiaena Emakumeen Etxearekin eta Berdintasun Kontseiluarekin elkarlanean, martxo osoan zehar
Arrigorriagako Udalak, Lamiaenarekin eta Berdintasun Kontseiluarekin elkarlanean, egitarau zabal eta feminista iragarri berri du Martxoaren 8an, Emakumeen Nazioarteko Egunean. Egitaraua otsailaren azken egunetan hasi eta martxo osora zabalduko da, hainbat diziplina uztartuz, “hausnarketa kritikoa eta ospakizun kolektiboa sustatzea xede”, hiru ardatz nagusirekin: Hausnarketari dagokionez, otsailaren 26an ‘Begirada feminista bat zahartzeari’ izeneko hitzaldiarekin emango zaio hasiera programari. Kulturaren esparruan, martxoaren 3an Zineforum Feminista antolatu dute Lonbo aretoan eta hilaren 7an eta 21ean antzezlanak egingo dituzte bertan. Sormenari eta haurrei dagokienez, ‘Plastiko magikoak’ izeneko eskulan tailerra antolatu dute eta Virginia Imaz ipuin kontalariak saio berezi bat eskainiko du.
Martxoaren 8an ekitaldi bi antolatu dituzte: alde batetik elkarretaratzea egingo dute udaletxeko plazan eta herriko emakumeak izango dira protagonistak. Jarraian, Aritz Berri Dantza Taldeak ‘Emakumeon eskubideen alde dantzan’ izeneko erromeria eskainiko du.
“Egitarau hau herrian azken hilabeteetan egiten ari den lanaren jarraipena da”, azaldu dute egitaraua antolatu duten lantaldetik. “Aipatzekoa da, adibidez, gizonen inplikazioa sustatzeko urtarrilean egindako tailerrak izan duen harrera ona, non 22 gizonek parte hartu duten eta “Lamiaenako aliatuen” taldea sortzeko ernamuina izan nahi duen. Beste hainbat ekimen feminista ere egiten dira aldi berean. Hauen guztien bidez, Arrigorriagak herri berdinzaleago eta justuago baten aldeko apustu irmoa berresten du”.
Egitaraua | Emakumeen Nazioarteko Eguna Arrigorriagan
Otsailak 26, osteguna
18:00 Hitzaldia: ‘Begirada feminista bat zahartzeari’, Lamiaena
Berdintasun Saila
Martxoak 3, asteartea
18:30 Zineforum feminista: ‘Jone batzuetan’, Lonbo aretoa
Berdintasun Saila
Martxoak 5, osteguna
18:00 Tailerra: ‘Plastiko magikoak: pin-ak, giltzatakoak eta iman aldarrikatzaileak’, Lamiaena
Berdintasun Saila
Martxoak 7, larunbata
19:30 Antzerkia: ‘Ni errekadista nintzen’, Lonbo aretoa
Kultura Saila
Martxoak 8, igandea
12:00 ‘Emakumeok plazara!’ Kontzentrazioa eta Berdintasun Kontseiluaren adierazpenaren irakurketa, udaletxeko plaza
12:30 Erromeria: ‘Emakumeon eskubideen alde dantzan’, udaletxeko plaza. Aritz Berri dantza taldea
Martxoak 11, asteazkena
17:00 Umeentzako ipuin kontalaria (Virginia Imaz): ‘Bigarren printzesa’, Lamiaena
Euskara eta Berdintasun Saila
Martxoak 21, larunbata
19:30 Antzerkia: ‘R&J’ La dramática errante, Lonbo aretoa
Kultura Saila
☉ Arrigorriaga
Ikurrina Arrigorriagan jarri zeneko 50. urteurrena oroituko dute Armando Astarloaren dokumentalarekin
Dokumentala ikusi ostean bertan agertzen diren elementuak aztertuko dituzte Malmasingo Lagunak elkarteko Asier Ibarretxe kidearen eskutik
Otsailaren 27an Arrigorriagan ikurrina ipini zeneko 50. urteurreneko dokumental laburraren proiekzioa egingo dute Malmasingo Lagunak elkarteko kideek.
Armando Astarloa idazle, ekonomialari eta abokatua, eta aldi berean dokumentalaren egilearen zinta proiektatu ostean edukiaren azterketa eta solasaldia eskainiko du Asier Ibarretxe Fernandez de Larrinoa Malmasingo Lagunak elkarteko kideak.
“Bost minutuko iraupena duen dokumentala proiektatuko dugu udaletxean”, azaldu dio GEURIAri Ibarretxek. “Ikurriña Arrigorriagako udaletxean ipini zuten egunean filmatutako irudiak dira, 1977ko urtarrilaren 31n, hain zuzen ere”.
Armando Astarloak ‘Super 8mm’ kamera batekin grabatutako irudiak ikusi ahal izango dira Azokea aretoan. “Udalerriaren hainbat filmazio egin zituen Astarloak eta iaz irudi horiek ekarri zituen Arrigorriagara”. Irudi analogiko horiek digitalizatu dituzte eta horrela, Arrigorriagako dokumentu historiko hori auzotar guztiek ikusi ahal izango dituzte proiekzio egunean.
“Plazan egin zuten ekitaldia erakutsiko dute irudiek”, zehaztu du Malmasingo Lagunak elkarteko kideak. “Garai hartako auzotarrak, txistulariak eta prentsa librearen langileak ikusiko dira bertan ere, besteak beste”. Zinta pare bat aldiz erreproduzituko dute eta segidan bertan agertu diren elementu jakin batzuk sakonean aztertuko dituzte Asier Ibarretxek erabiliko duen diapositiba batzuen bidez. “Solasaldia zabala izango da eta gerturatuko direnek berba egiteko aukera izango dute ere”.
Hitzordua 19:00etan ipini dute Arrigorriagako udaletxeko ‘Azokea’ aretoan eta saioa elebiduna izango da.
☉ Arrigorriaga
Arrigorriagako Udalak ere ez du atxilotuen jatorriari buruzko daturik publikatuko
“Neurri horrek ez du delitu edo atxiloketa gutxiago ekarriko”, esan du gobernu taldeak
Arrigorriagako Udalak ere ez du Eusko Jaurlaritzak ezarritako irizpidea jarraituko eta ez du atxilotuen jatorriari buruzko datuak publikatuko.
Gobernu taldearen arabera, “neurri horrek ez du delitu edo atxiloketa gutxiago ekarriko”, esan dute.
Hego Uribe eskualdean Basauriko Udalak dagoeneko zehaztu dute jatorriaren berri emango duela, “gezurrak saihesteko eta gardenak izateko”.
Eta, kontrako erabakia hartu dute, esaterako, Arrigorriagako Udalaz gain, Galdakaok, Bilboko, Barakaldoko, Leioako edo Erandioko udalek.
Basauriko ArcelorMittal enpresak langile bat lan-istripu larri baten ondoren kaleratu duela salatu du ELA sindikatuak
Bide-garbiketak, birziklatze-kudeaketak eta Gizarte Zerbitzuek “oso ongi” nota jaso dute Basaurin
Bizkaiko eraikin eta lokalen garbiketa sektoreko grebak eragina izango du Ugaoko udal-eraikinetako garbiketa zerbitzuan
Argazkiak | Euriak ez ditu Arrigorriagako herri-inauteriak geldiarazi
Argazkiak | Lau urtaroak, Oilategi Deluxe eta Txorimaloak izan dira mozorrorik onenak Basaurin
