→Arrigorriaga

Arrigorriagako toponimiaren inguruko lan bi aurkeztuko dituzte hurrengo asteetan

Arrigorriagako San Antonio baseliza // Geuria

Malmasingo Lagunak ikerketa lan osotua egin du alde batetik, eta Udalak, Labayrurekin batera, ‘Arrigorriaga, Gure Bazter Kuttunak’ dibulgazio lana kaleratuko du hurrengo egunetan. Batak zein besteak helburu bakarra dute: Arrigorriagako toponimia aztertu eta herritarrei eskaintzea: “Udal Gobernura heldu ginenean toponimia ardatz hartuta bi proiektu ezberdin garatzen ari zirela ikusi genuen. Biak bateratzeko aukera aztertu genuen, baina ordurako oso aurreratuta zeuden bai bata zein bestea, eta ordutik hona elkarlanean aritu diren arren, guztiz bateragarriak zirela ikusi genuen” azaldu du Celia Rubio Euskara zinegotziak.

Proiektuak, sakonean

Asier Ibarretxe Malmasingo Lagunak taldearekin aritu izan da ikerketa sakona egiten: 1.200 toponimo inguru izendatu ditu, 9 eremutan sailkatutakoak. Udalak azaldu du horietako batzuk  Arrigorriagako parte zirela, eta beste batzuk elizari atxikituak zeudela Alonsotegi, Bilbo, Basauri eta Ugao eremuetan. Argitalpena euskaraz idatzita dago, artxibategiko aipuak jatorrizko hizkuntza errespetatuz.

Bigarren lana kolorezko 104 orriz osatutako ‘Arrigorriaga, Gure Bazter Kuttunak’ liburua dugu, eta Udalak Labayrurekin batera egindako argitalpen honen helburua herriko leku-izenak batu, aztertu eta finkatzea da. Horretarako, 2017an Foru Artxibategiko atal ezberdinak aztertu ostean, 2018an herriko lekukoen ahozko testigantzekin kontrastatu zirela azaldu du Udalak.

Lan hauei esker toponimoen datu historikoak batzen dira eta leku-izen bakoitzak denboran izan dituen izendapenak ikus daitezke: “2019-2020an egindako lana honako hau izan da: dokumentaziotik eta ahozko bilketatik jasotako informazioa liburuxka baten argitaratzea. Arrigorriagako leku-izenak modu erakargarri eta dibulgatiboan zabaltzea da liburu honen helburua. Liburuxka honetan ez da ikerketan jasotako informazio guztia bilduko, herritarrentzat datu interesgarrienak baino ez dira emango” zehaztu du Celia Rubiok. Liburuko testuek eta argazkiek balio berbera dutela adierazi du Udalak, bertan antzinako eta gaur egungo argazkiak agertzen direlako, lekuak nola aldatu diren azalduz.

Udalak herritarren etxeetara bidaliko du ‘Arrigorriaga, Gure Bazter Kuttunak’ liburuaren buruzko informazioa eta bertan QR kodea erantsita egongo da, argitalpenaren inguruko booktrailerra ikusi ahal izateko. Halaber, liburua eskatu ahal izateko epea zabalduko dute, guztira 1.000 ale egin baitira.

Gora

Geuria Laguntzaileak Geuria Laguntzaileak