→Basauri

Sokadantza eta Eguzkidantza birtuala egin dute Edurre Dantza Taldekoek San Fausto egunean

San Fausto eguna dute gaur Basaurin, jaieguna. Herritarrentzat egun berezia da, baina aurten, koronabirusarekin pandemiagatik, bertan behera geratu dira ekitaldi eta ospakizun guztiak.

Edurre Dantza Taldeak ohikoa du urriaren 13 guztietan Sokadantza eta Eguzki dantza dantzatzea San Fausto plazan bertan. 1991an hasi ziren tradizio horrekin eta etenik gabe urtero dantzatu dute 28 urtetan zehar. “Aurten, modu berean ez bada ere, ez diogu hutsik egin nahi izan gure hitzorduari. Horregatik, Eguzkidantzaren (neskek) eta Sokadantzaren (mutilek) bertsio bereziak grabatu ditugu bideoan, gomendatutako osasun-neurriak betez”, diote Edurre Dantza Taldeko ordezkariek.

Bideoak duela aste batzuk grabatu zituzten, Basauriko toki ezberdinetan. Hala nola, San Fausto kalean bertan, Arizgotiko plazan, Soloarteko parkean, Eskarabilleraren estatuaren ondoan, Manuela Egigurenen eta Roman Garciaren bustoen ondoan, Kantalazarra parkean, Vicente Anton Ferrero kalean, Basozelain edota, San Jose ikastetxeko jolastokian.

“Bat egiten dugu Herriko Taldekoek ez ospatzeko egindako eskaerarekin. Hala ere, gogoratu nahi izan dugu gaur San Fausto dela, egun garrantzitsua basauriarrentzat”, diote Edurre Dantza Taldetik.

Gora

Geuria Laguntzaileak Geuria Laguntzaileak