☉ Basauri
Irantzu Ibañez: «Guztiz sinetsi eta bultzatu behar dugu parte-hartze erreala dela etorkizuneko hirigintzaren oinarria»
Hirigintzaren eraldaketak markatzen du hiri eta herrien etorkizuna. Hirigintza berrien erronkei buruz edota hirigintza arloko parte-hartze prozesuei buruz hitz egin dugu Irantzu Ibañez arkitektoarekin.
Geuria #087 Monografikoan argitaratutako elkarrizketa
“Gure Gerrak. Hego Uribe eskualdean ditugun aldarrikapen, hausnarketa eta ekintza ezberdinen solasaldiak”
Irakurri osorik PDFan
Herriak eta hiriak etengabe ari dira aldatzen. Hirigintza eta arkitekturaren aldetik nabarmena da hori. “Herri zein hirien forma zehazteaz gain, hauek bizitzeko modua ere bideratzen du arkitekturak”. Horrela definitzen du arkitektura Irantzu Ibañez Espinosa (Basauri, 1987) arkitektoak. Halo Arkitektura estudioa ireki zuen Irantzuk 2015ean, Andoni Duque Ingunza (Bilbo, 1984) lankidearekin batera. Gizarteak herri eta hirien espazioak eratzeko dituen tresna bezala ulertzen ditu arkitektura eta hirigintza. Hiri eta hirigintza berrien erronkei buruz, prozesu parte-hartzaileei buruz, Agenda 2030ari buruz, berdegune naturalen garrantziari buruz edota hiri-ortuei buruz aritu gara berarekin.
Zein garrantzi dauka arkitekturak gaur egungo hiri eta herrietan?
Arkitektura espazio ezberdinak antolatzen dituen diziplina konplexua da; izan ere, eraikuntza-teknikak, funtzionaltasuna, diseinua, jasangarritasuna, erabiltzaileen erosotasuna eta haien arteko erlazioak uztartu behar ditu. Esango nuke, gainera, arkitektura eraikiak momentuko errealitate politiko, sozial, ekonomiko eta teknologikoarekin lotura zuzena duela.
Arkitektura eta hirigintza diziplinak ezberdindu ditzakegu, eta bien arteko batuketa bizigarri ditugun espazioen eraketarako gizarteak duen tresna bezala ulertzen dut. Horregatik da garrantzitsua. Herri zein hirien forma zehazteaz gain, hauek bizitzeko modua ere bideratzen duelako.
Hiri eta hirigintza berriaren erronkei buruz galdetuko banizu.
Gizartearen produktu bat bezala ikus dezakegu hiria, baina aldi berean, hiriak berak gizartearen nondik norakoak bideratu ditzake. Horrela, hiriek zein hirigintzak izango dituzten erronkek lotura zuzena dute erronka sozialekin. Esate baterako, jasangarritasuna eta klima aldaketa, ezberdintasun sozialak deuseztatzea, talde edo partaide izatearen sentimenduak dakarren mobilizaziorako gaitasuna berreskuratzea edota lekuan lekuko historiarekin adiskidetzea lirateke kontutan hartu beharreko puntu batzuk. Gainera, eta erronka konkretuagoetara joz, espazio publikoa berreskuratzea, hiriak hiritarrekiko duen sinbolismoa berreskuratzea eta partaidetza-kulturaren eta herritarron erabakitzeko ahalmenaren garapena aipatuko nituzke.
Hori guztia Hego Uribe eskualdera ekarrita, zein erronka ikusten dituzu?
Bizi dugun globalizazioak homogeneizazioa dakar nahitaez berarekin. Beraz, eskualdeak hirigintzak berak era orokorrean landu beharreko erronkei aurre egin beharko die. Hego Uribe historia zein izaera guztiz ezberdina duten herriek osatzen dute eta, honenbestez, hirigintzak izango duen erronkarik nabarmenena bakoitzaren ezaugarriak azpimarratzea izango da. Era lokalago batean, mugikortasuna modu jasangarriago batean bideratzea legoke edota Bilborekiko gertutasunak dakarren eraginaren menpe ez egoteko landu beharreko tokian tokiko ekonomiaren garapena aipa nezake.
Zaratamo eta Zeberio bezalako herriak ere baditugu eskualdean, naturarekin lotura handiagoa duten herriak.
Landa eremuetako hirigintza oraindik ere delikatuagoa iruditzen zait eta gai horretan ez naiz batere jaioa. Hala ere, izaera propio hori mantentzea ezinbestekoa dela esango nuke, horren bitartez aberastasuna eta lan eskaintza erakargarria erakutsiz, bestelako bizimodua bultzatzen dutelako.
Gurean, adibidez, prozesu parte-hartzaileak bultzatu dira hirigintzaren alorrean. Beharrezkoa da herritarren partaidetza hirigintzaren arloan erabakiak hartzeko?
Herritarrok ditugun ideiak ez dira teknikariek edota politikariek dituztenak baino okerragoak. Guztiz kontrakoa: bizigarri dugunetik eta esperientzia propiotik asko dugu emateko. Hala ere, herritarron partaidetza gai konplexua da, erabakiak hartu ahal izateko informazioa eta ezagutza behar ditugulako. Helburua talde lana eta informazio mordoa elkartuko dituen prozesu parte-hartzaile konplexua izan behar da. Eta horretara heltzeko oraindik asko dugu garatzeke, herritarron zein instituzioen aldetik. Bien bitartean, zenbait prozesu parte-hartzaile jartzen dira martxan, baina aurretik aipatu bezala, helburua aipatutako talde identitatearen berreskurapena eta hiriarekin zein bizilagunekin bestelako esfera batean konektatuko gaituen prozesua izan behar da.
Herritarrek benetan parte hartzen dute horrelako prozesuetan?
Makillaje itxura izan dezaketen prozesuak badaude baina partaidetza era aberasgarriago batean emateko hazia ere izan daitezke; konplexuagoa eta aberasgarriagoa den partaidetza baten abiapuntua agian. Ulertu beharra dugu apurka-apurka aldatzen den pentsamolde edota kultura dela, baina guztiz sinetsi eta bultzatu behar dugu parte-hartze erreala etorkizuneko hirigintzaren oinarria dela.
Klimaren krisian hiriek paper erabakigarria izango dute Agenda 2030en arabera.
Duela hamar bat urtetik munduko biztanleriaren % 50 baino gehiago hirietan bizi da. Beraz, hiria errekurtso naturalak zein energia bera zurrupatzen duen makina dela argi dago. Hau horrela izanda, klima aldaketaren aurka hiriek egin dezaketen edozein ekintzak berebiziko garrantzia du. Gainera, hasieran genion moduan, hiriak gizartearen nondik norakoen bidea markatzen duenez, gai honetan ere aldaketaren sustatzaile izan daitezke.
Berdegune naturalak hiriko funtsezko elementu bezala ulertu behar ditugula adierazi duzu aurten artikulu batean.
Honetan bi puntu garrantzitsu aipatuko nituzke. Lehenak bizi kalitatearekin du zerikusia. Lehen berdeguneak hirietatik kanpo baina gertu ikusten genituen. Hirien hazkundearekin, zerbitzu zein bizimodu “osoagoen” eskaintza handituz joan zenean, berdegune horiek aldenduz joan ziren eta hiritarrek horien falta sentitu zuten. Arazo honekin 50 urte baino gehiago daramatzagu. Bigarren puntua klimarekin lotuko nuke. Espazio berdeek CO2a kontsumitzeko balio dute, atmosfera bera garbitzeko, eta hiriak “hoztea” zein zoruen iragazkortasuna hobetzea ahalbidetzen dute.
Hego Uribe eskualdean berdegune gutxi dagoela esan dezakegu, batez ere herri handietan. Kasu honetan zer egin beharko litzateke hirigintzaren aldetik? Badago alternatibarik edo estrategia zehatzik?
Berdearen presentzia bisuala badugula esango nuke, topografiak era positibo horretan baldintzatzen duelako. Baina esan bezala, hirien traman berdeguneak integratu beharko genituzke. Horretarako, geratzen diren espazio libre apurrak, hiri eta herriak eraldatu eta berreraikitzen doazelarik, espazio berdeen onurarako ustiatu beharko genituzke. Erabilera aldetik ere aisialdi aktibo eta alternatibo bezala planteatu beharko lirateke, hala nola, kirola egiteko espazio gisa edota hiri-baratzeak proposatuz.
Hiri-baratzeak aipatu dituzu. Halakoak ezartzen ari dira eskualdean.
Espazio libre hauek funtzio ekologiko, paisajistiko eta sozio-kulturalak dituzte. Alde batetik, balore paisajistikoari dagokionez, hiri lurren eta sistema naturalen trantsiziorako gradazio espazio bezala ulertu daitezke. Gainera, alboratutako espazioak berreskuratzeko aukera ezin hobea aurkezten dute eta hiriaren idiosinkrasiaren barruan identitate berri bat har dezakete. Izan ere, duela gutxi arte pobrezia edota beharrizanekin lotura zuten baratze hauek, gaur egun, kontsumo jasangarri eta aberasgarri batekin sinbolikoki identifikatu ditzakegu. Bestetik, eta duten balore sozialarekin erlazionatuz, aisialdi aktibo baterako alternatiba dira. Naturarekin harremanetan egoteko eta jarduera komunitarioak bultzatzeko aukera paregabea dira. Eskaintza pedagogiko eta ekologiko gisa, erabiltzaile ezberdinen artean sozializatzeko aukera berriak sortzen ditu. Are gehiago, kasu batzuetan, nekazaritza ekologikoaren lanerako teknika berriak ikastearekin bat, lan orientazio berriak jorratu ditzakeen ekimena ere bada.
Iaz etxebizitzen barne antolaketan globalizazioak duen eragina aztertu zenuten Aldiri aldizkari espezializatuan publikatutako artikuluan: ‘Globalizazioaren doktrinamendua espazio domestikoan’. Zehazki, zer da aztertu zenutena?
Lehen esan dugun moduan, arkitektura bizi dugun momentuko errealitatearen isla izan badaiteke, kapitalismoaren, kontsumo gizartearen eta indibidualtasunaren ezaugarriak bere baitan izango ditu. Hiri eskalan ematen diren joerez gain, aipatzen duzun artikuluan eskala domestikora salto egin genuen, etxebizitzen barne antolaketen inguruko gogoeta eginez. Azkenean, barne antolaketek erabiltzaileon bizitzeko modua eta pentsatzeko era bideratzen dute.
Gure lana dela eta, etxebizitzen barne antolaketa gertuko gaia dugu. Jolas moduko bat planteatu genuen analisia egin ahal izateko. Webgune ezberdinen artean, zenbait herrialdetako etxebizitza promozio berrien eskaintzak begiratu genituen. Horrela, aukeren murriztasuna badagoela ikusi genuen. Etxebizitzen barne antolaketa klonatuak munduan zehar hedatu dira, lekuan lekuko kultura zein espazio tradizionalak desagerraraziz.
Nolakoak dira gaur egungo etxebizitzak?
Eredu arrazionalista jarraitzen dute: gauaren eta egunaren arteko banaketa argia agertzen da; publiko eta pribatuaren arteko ezberdintasun espaziala dago. Eguneko guneak, publikoak direnak, sukaldea eta egongela hartzen ditu eta gero eta bateratuago agertzen dira. Egongelan, gainera, telebista-sofa binomioa espazio horren ardatz bihurtu da. Espazio pribatuak, edo gauarekin erlazioa dutenak, logelak lirateke, eta hauetan guztietan etxeko hierarkia azpimarratzen da. Logela nagusia, bikoitza, familiako buruentzat (bikote izan behar dute) eta bainugela propioarekin. Bigarren logelak –zein ondotik datozen guztiek-, erabilera-unitate independente moduan funtzionatzen du. Lo egiteko espazioa izateaz gain, jantzi, ikasi, telebista ikusi… egin daiteke bertan etxeko besteekin harremanik izateko beharrik gabe: indibidualismoa bultzatzen du. Globalizazioak markatutako doktrinamendu horrek kultura ezberdinen berezitasunak ezabatu ditu etxebizitzen barnealdeetan eta heterogeneoagoak zein bakoitzaren ideia, helburu, errutinak islatuko lituzkeen espazio domestikoak faltan botatzen dira.
Etxebizitza eta berdintasunari buruzko mahai inguru batean parte hartu zenuen iaz. Zein harreman du etxebizitzak berdintasunarekin?
Aipatu berri ditugun distribuzio normatiboek, gaur egungo sistema kapitalistaren produktu izanik, indibidualtasuna, hierarkizazioa eta desparekotasunak eragin eta azaleratzen dituzte. Horrela, barne antolaketa hauek tradizionalki emakumeok egiten ditugun zaintza lanak ostendu dituzte.
Emakumeok espazio pribatuan lan egin izan dugu, etxebizitzen barnealdeetan, gizonek espazio publikoa hartu duten bitartean. Egoera honi buelta emateko garaia da eta zaintza lanak azaleratzen lagunduko duten tresna berriak jarri behar dira martxan: pertsona batek baino gehiagok sukaldean aldi berean lan egiteko espazioa eskaintzea, atsedena hartzeko ordua denean lana ezkutatzeko aukera izatea, arropak garbitzea ikustaraztea…
Etorkizuneko hiriak nola ikusten dituzu hirigintzari dagokionez?
Hiriak gizartearen produktua dira, eta gizartea bera bezala ikusten ditut. Klima aldaketari, desberdintasun sozialei edota globalizazioak markatutako identitate propioen faltari aurre egiteko eta merkatuen doktrinetatik ihes egiteko tresna gisa imajinatzen ditut.
☉ Basauri
Argazkiak / 2.000 ikasletik gora egin dute Korrika Txikia Basaurin
Kolore uholdea izan da gaur arratsaldean Basaurin. Arrazoia? Korrika Txikia! Ikusi GEURIAn atera ditugun 60 argazki (eta zuzenekoa!)
Kolore uholdea izan da gaur arratsaldean Basaurin. Arrazoia? Korrika Txikia! Herriko 2.000 ikasletik gora egin dute bat euskararen aldeko ekimenarekin.
Aurten Bizkotxalde ikastetxeko ikasleek eraman dute lekukoa, eta euren atzetik herriko beste ikastetxeetako ikasleak, irakasleak eta baita gurasoak ere!
Ikusi GEURIAn atera ditugun 60 argazki! Topatu zaitez (edo zure seme-alaba)!
Ver esta publicación en Instagram
☉ Basauri
Foruak eta Kareaga Goikoa kaleen arteko igogailua martxan dago jada Basaurin
Igogailua bertikala da eta lau geraleku ditu. Guztira 13 lagunentzako lekua du
Foruak eta Kareaga Goikoa kaleen arteko igogailua martxan dago gaurtik. Lanak iazko martxoan hasi zituzten eta urtebete ondoren bukatu dituzte.
Igogailua bertikala da eta lau geraleku ditu: behekoa, Foruak kalean; hurrengoa Kareaga Goikoa kaleko 105. atarira sarbidea ematen duena; bestea garajeetara sartzeko geralekua; eta, azkenik, goiko geralekua, Kareaga Goikoa kalean. Guztira 13 lagunentzako lekua du igogailuak.
“Igogailuak beirazko estaldura du aurrealdeetan eta aluminiozko panelak alboetan, aurrez aurre dauden etxebizitzei pribatutasun handiagoa emateko”, diote udal ordezkariek, eta gaineratu dute 13,24 metroko desnibela saihestu eta irigarritasuna hobetzen duela.
Basauriko Udalak milioi bat euroko inbertsioa egin du esku hartze honetan. Udalerriko zortzigarren hiri-igogailua da.
Udal arduradunen arabera, laster bederatzigarren igailua jarriko dute martxan: San Migel mendebaldekoa, alegia. Era berean, pasa den astean iragarri zuen Udalak lau igogailu eraikitzeko asmoa duela Kareaga eta Basozelai auzoak lotzeko.
☉ Basauri
Argazkiak / Herriko Taldeak eta Sofia Otero omendu dituzte 25. Ixatxak Sarietan, Basaurin
Ixatxak Sarien 25. edizioa izan da gaur, martxoak 17. Aurten Herriko Taldeak eta Sofia Otero omendu dituzte. Ekitaldian Basauri Koral Elkarteak, Danbolin Txistulari Elkarteak eta Edurre Dantza Taldeak parte hartu dute, aurreko edizioetan bezala.
San Jose ikastetxeko Ikasle Ohien Elkarteak banatzen ditu sariok; iaz azken sariak banatu zituztela esan zuten, baina elkarteko batzordea berritu eta sariak errepikatu dituzte.
☉ Basauri
Lau igogailu eraikiko ditu Basauriko Udalak Kareaga eta Basozelai auzoak lotzeko
Bosgarren igogailu bat eraikitzea ere aurreikusten du Basauriko Udalak. Igogailuak hiru urte eta erdian eraikita egon litezke eta inbertsioa 5 eta 7 milioi euro artekoa izango da
Kareagako bizilagunek urteak daramatzate auzoko irisgarritasuna hobetzeko igogailu eske. Zehazki, 2018tik.
Urte hauetan zehar zenbait proposamenen berri izan dute, baina gaur, bost urte ondoren, egingarri izan daitekeen proiektu baten berri izan dute.
Basauriko udal gobernu taldea Kareaga eta Basozelaiko bizilagunekin bildu da bi auzoak modu irisgarrian lotuko dituen konponbide teknikoaren berri emateko. Bilera irekia izan da Kareagako parrokian. Bertan izan dira gobernu taldeko zinegotziak, Unai Pomposo Udaleko ingeniaria, oposizioko ordezkariak eta auzotarrak.
Kanpoko ingeniaritzako enpresa batek alternatiben bideragarritasun teknikoak aztertu ditu azken hilabeteetan, eta azterlan horren ondorioak aztertu ondoren, Basauriko Udalak gutxienez lau igogailu eraikiko ditu lursail publikoan.
Lau igogailu horien kokapena izango da: lehen igogailuak Karmelo Torre kaleko haurren parkea (parrokia ondokoa) eta bidegorria lotuko ditu; bigarrenak bidegorria eta Bidasoa Ibaia kalea; hirugarrenak Iparragirre eta Jazinto Benabente kaleak; eta laugarrenak Jazinto Benabente eta Axular.
“Lehen igogailua Karmelo Torreren haur-jolasen eta elizaren arteko gunetik aterako da, eta, horren ondoren, beste hiru igogailu igoko dira bidegorritik Jazinto Benabenteren atzealdera, eta hortik Basozelaiko Axular kalera”, dio Unai Pomposo udal ingeniariak. Igogailu bakoitza pasabide batek lagunduko du.
Bosgarren igogailu bat
Lau igogailu horiez gain, bosgarren bat eraikitzea ere aurreikusten du udal gobernu taldeak: “Elizaren atzeko aldeko bidegorria (lursail pribatua) eta Karmelo Torreren 19. eta 21. atariak lotuko lituzte bosgarren igogailuak, baina horretarako jabeen baimena beharko genuke”, dio Zuriñe Goikoetxea Hirigintza arloko zinegotziak, eta gaineratu du aukera horrek ere “hobekuntzak” ekarriko lituzkeela bidegorrian.
Bost igogailu hauen kokalekua zehatza ez dela jakinarazi du Asier Iragorri alkateak: “Hau azterketa baten aurkezpen publikoa izan da. Ondoren, proiektuaren idazketa lizitatu beharko genuke, eta gero hasiko ginateke obrekin”.
Epeez galdetuta, gaurtik hasita gutxienez lehen lau igogailuak hiru urte eta erdian eraikita egon litezke; hau da, 2027rako. “Gauzak ondo bidean, urte eta erdian proiektu zehatz bat izan genezake, eta ideia da lehen lau igogailuen obrak aldi berean hastea”, dio Iragorrik.
Basauriko Udalak 5 eta 7 milioi euro arteko inbertsioa egingo du esku hartze honetan.
Kareaga Auzo Elkarteko kideak “pozik” agertu dira Udalak aurkeztutako proposamenarekin: “Bost urtetan geldirik egon da gaia, eta orain urrats garrantzitsu bat eman da. Azterketa sakon aztertu behar dugu balorazio bat eman aurretik, baina aurrerapauso bat eman dela uste dugu”, diote.
Baztertutako proposamenak
Hainbat proposamen baloratu dituztela adierazi du Unai Pomposo udal ingenariak aurkezpen publikoan. “Horietako bat arrapala mekanikoak jartzeko aukera zen, baina ondorioztatu da aukera horrek ez duela irisgarritasun unibertsala ematen, igotzeko baino ez liratekeelako izango. Gainera, Karmelo Torre kaleko espaloi bakoitiko aparkalekuak kendu beharko lirateke”, dio Pomposok.
Igogailu inklinatu bat jartzea ere baloratu dute, baina kostua handiagoa dela eta egitea “zailagoa” izango litzatekeela azaldu du Pomposok, “mendi-hegalaren zati bat kendu eta lur pribatuan eraiki beharko litzatekeelako”.
Etxebizitzen atzealdetik igogailu bertikalak jartzeko proposamenari dagokionez, atarietarako sarbide zuzenik ez luketela izango adierazi du Pomposok: “Herritarrek jende gutxi dabilen eremuak zeharkatu beharko lituzkete, eta hori segurtasun-arazo litzateke. Aukera hori ez da oso funtzionala, egiteko konplexua da, eta, gainera, igogailuak lur pribatutik joango lirateke”.
“Anbulatorioaren eta Karmelo Torreko goiko aldean dauden etxebizitzen arteko irisgarritasuna hobetzeko aukerarik egokiena igogailu bertikala litzateke, erabilera publikoko plaza pribatuan sortuko liratekeen bi pasabiderekin. Baina aukera hori baztertu egin da, jabeen erkidegoaren baimenik ez dagoelako”, dio udal ingeniariak.
“Ingeniaritzaren txostenaren ondorioetan zehazten da igogailu bertikalek irisgarritasun unibertsala konponduko luketela, eta hainbat proposamen jaso dira, eremu desberdinetarako sarbidea ematen dutenak eta banaka edo konbinatuta egin daitezkeenak”, dio.
☉ Basauri
Unai Arroita basauriarra entrenatzaile onena izendatu dute Bizkaia Kirol Sarietan
Arroitak urrezko 14 domina eta zilarrezko hiru irabazi izan ditu Euskadiko txapelketetan 2008tik 2020ra artean kadete, junior, sub21 eta absolutu kategorietan
Unai Arroita Larrinaga Basauriko The Masters gimnasioko kideak entrenatzaile onenaren saria jaso du Bizkaiko Kirol Sarietan. Sari-banaketa joan den martxoaren 11n egin zuten eta Arroita harrituta agertu da aintzatespen honen aurrean: “Oso pozik jaso dut sari hau, eta egia esan, ez nuen espero”, aitortu dio GEURIAri Basauriko kirolariak. Bigarren aldia da Federazioak sari hau jasotzeko gomendatzen duela: “Aurreko aldian saria jasotzeko proposatu ninduten baina boxeoko entrenatzaileak jaso zuen saria”.
Joan den astean Diputaziotik deitu zuten Arroita, saria jasoko zuela iragarriz. “Ilusio handiagoa egiten dit argazkietan kirolariekin euren garaipenak ospatzen agertzea sari indibidualak jasotzea baino; oraingo honetan, ordea, kirolariek nire saria ospatu eta nirekin agertu dira argazkian”, azaldu du pozik Basaurikoak.
Unai Arroita: “Oraingo honetan, kirolariek nire saria ospatu eta nirekin agertu dira argazkian”
Arroitak kargu ugari bete izan ditu kirolaren esparruan lanean hasi zenetik: Basauriko The Masters gimnasioko entrenatzailea izateaz gainera 2017an Espainiako Selekzioko entrenatzailea izan zen Egipton; 2017tik gaur egun arte Euskadiko selekzioko kadete eta junior kategorietako hautatzailea da; 2020tik Euskadiko hautatzaile absolutua da eta Euskadiko Unibertsitate selekzioko hautatzailea 2019tik gaur egun arte.
Basauriarrak marka nagusi bi hautsi ditu: alde batetik, selekzio nazional batekin mundu mailako txapelketa batera joan den entrenatzaile gazteena izan da 21 urterekin. Beste alde batetik, Euskadiko lehen entrenatzailea izan da Euskadiko Txapelketako kategoria guztiak irabazten.
Kirolari modura, Espainiako selekzioko junior kategorian debutatu zuen 2012an eta zilarrezko domina bi eta brontzezko beste bi irabazi ditu Espainiako junior kategorietako txapelketetan. 2015ean zilarrezko domina irabazi zuen 21 urte azpiko Espainiako txapelketan. 2016an brontzezko domina irabazi zuen Espainiako txapelketa absolutuan. Euskadiko txapelketei dagokienez, Arroitak urrezko 14 domina eta zilarrezko hiru irabazi izan ditu 2008tik 2020ra artean kadete, junior, sub21 eta absolutu kategorietan.
Apirilean, Estoniara
Arroitaren hurrengo erronka Estonian dago. Apirilean bertara joango da The Masterseko kirolariekin taekwondoko Presidente Kopa jokatzera. Txapelketa horretan lehen hiru postuak lortuko dituzten kirolariak Europako Txapelketarako sailkatuko dira zuzenean.