Sareak

☉ Basauri

Iker Bizkarguenaga: “Sinesgarritasuna, hausnarketak eta informazioa ulertzeko gakoak eskaini behar ditugu kazetariok”

Ogibidez kazetaria, izatez Enpresen Administrazio eta Zuzendaritzan lizentziatua, Iker Bizkarguenagak (Basauri, 1978) Gara egunkarian egiten du lan.

|

Iker Bizkarguena / Utzitakoa

Ogibidez kazetaria, izatez Enpresen Administrazio eta Zuzendaritzan lizentziatua, Iker Bizkarguenagak (Basauri, 1978) Gara egunkarian egiten du lan. Hainbat urtetan sail desberdinetan arduradun izan ondoren (Euskal Herria, Ekonomia eta Iritzia), orain Eguneko Gaiak deritzonak idazten ditu, “politika arlokoak eta gizarte-gaiei buruzkoak, batez ere. Orain, egia esan, gehiago gozatzen ari naiz lanarekin, gustuko dudana egiten dudalako: idaztea, alegia”, dio. Gara egunkariaren gaur egungo egoeraz, prentsa lokalaz edota prentsa askatasunaz aritu gara berarekin.

Gara egunkariko kazetari basauriarra zaitugu.
Hala da. 2003ko martxoan hasi nintzen Garan lanean. Egia esan, oso modu bitxian heldu nintzen bertan lan egitera, ni berez Enpresen Administrazio eta Zuzendaritzan lizentziatua naizelako. Baina Gara beti izan dut oso gertuko. Egin egunkaria irakurtzen nuen, txikitatik, eta haren itxierak sekulako mina eragin zidan, Euskal Herriko jende askori bezala. Horregatik Gararen jaiotza zirraraz bizi izan nuen, eta unibertsitate ikasketak bukatutakoan, Gararen Gasteizko erredakzioan praktiketan lan egiteko pertsona bat behar zutela irakurri nuenean, izena eman, azterketa egin eta hautatu ninduten. Eta horrelaxe hasi nintzen, Gasteizen, praktikak egiten. Gertuko batzuei zaila egin zitzaien orduan erabaki hura ulertzea, baina nik argi neukan nahiago nuela GARAn lan egin banku, kutxa edo horrelako beste lekuren batean aritu baino.

Beste hedabide batzuetan izan zara lanean?
Lanean ez, lanean GARAn bakarrik ibili naiz. Baina kolaborazioak egin izan nituen bere garaian Basauriko El Social-en. Kataluniako L’Accent aldizkarian ere artikulu batzuk idatzi izan ditut. Eta prentsa idatziaz aparte, Radio Vitorian, Info7 Irratian, Bizkaia Irratian, Hamaika Telebistan eta Euskal Telebistan kolaboratu dut, tertuliakide bezala. Gaur egun ETB1eko Egun On Euskadi saioan aritzen naiz noizean behin.

Zure ustez, kazetari batek non du erantzukizun gehien: komunikabide handietan ala txikietan?
Nire ustez hedabide handietan edo txikietan lan egiteak ez du erantzukizuna aldatzen, azken finean, norberak bere lanarekin duen ardura neurtu behar duelako. Errespetua, lehenik eta behin, bakoitzak bere buruarekiko izan behar du, bere profesionaltasuna zaindu behar du, hori delako kazetari batek duen gauzarik preziatuena. Profesionaltasunik gabe ez dago sinesgarria izaterik, eta sinesgarritasunik gabe, akabo kazetari ibilbideari. Hortik aurrera, hobe ahalik eta jende gehiagorengana heltzea, noski, baina erantzukizuna berdina da The Guardianen, Garan edo Geurian.

Kazetari bezala jardun duzun hedabideen artean zein da gehien bete zaituena?
Hedabide bakoitzak badauka xarma berezia. Irratia beti izan dut oso gustuko, etxean beti izan dugulako irratia piztuta, haurra nintzenetik. Telebistak duen irismena, eta zuzeneko emanaldiek eragiten duten urduritasun gozo hori, ez dute beste hedabideek eskaintzen, oso polita da. Baina ni egunkariarekin geratzen naiz, paperarekin. Agian niri idaztea asko gustatzen zaidalako izango da. Batez ere, kronikak idaztea izugarri gustatzen zait, literatura egiteko aukera ere ematen baitizu.

Zein da gaur egun zure eginbeharra Gara egunkarian?
Hainbat urtetan sail desberdinetako arduraduna izan ondoren (Euskal Herria, Ekonomia eta Iritzia) orain Eguneko Gaiak deritzen horiek idazten ditut, politika arlokoak eta gizarte-gaiei buruzkoak batez ere. Orain, egia esan, gehiago gozatzen ari naiz lanarekin, nik idaztea gustuko dudalako, eta lehen, nuen ardurarekin, sailetako kudeaketa lanak egiten nituelako gehiago. Norbaitek egin behar ditu lan horiek, noski, eta tokatzen zaizunean tokatzen zaizu, baina aukeran, hobeto nago horrela. Lasaiago ere bai.

Zelan aldatu da kazetaritza eta kazetarion lana azken urteotan?
Kazetaritza asko aldatu da urte hauetan, ni hasi nintzenetik izugarri. Interneten aroak, eta hedabide digitalen sorrerak eta garapenak, sekulako astindua eman diote sektoreari, prentsa idatziari batez ere, eta aldaketa horretara egokitu behar izan dugu denok. Horretan ari gara oraindik, egunetik egunera gauzak aldatzen ari direlako. Argi daukagu etorkizuna transmedia izango dela, egunkarietan ere bai, eta gu geu ere, paperean idazteaz gain dagoeneko hasi gara formatu digitalean idazten (Naizen, gure kasuan), irratian parte hartzen (Naiz Irratian) eta bideoak ekoizten. Prentsaren sektoreak krisia bizi du, aspalditik, baina ni baikorra naiz eta aurrera aterako garela uste dut. Azken finean, jendeak informatzeko beharra izaten jarraituko du, eta gure egitekoa da besteek ematen ez dutena eskaintzea: sinesgarritasuna, hausnarketa, sakontasuna, kritika…

Teknologia berriek eta sare sozialek kazetarion lana oztopatzen dute?
Teknologia berriak eta sare sozialak tresnak dira, eta tresna gisa ondo edo txarto erabil daitezke. Kazetariok ere bai. Ni sare sozialen zalea naiz, besteak beste nire lana errazten dutelako, baina sareetan nola aritu jakin behar da. Ez dut txarto ikusten herritarrek eurek informazioa sareetara igotzea, alderantziz, kazetariontzat erronka da zerbait gehiago eskaini behar izatea, herritar horiek eskainiko ez dutena. Eta hor daude lehen aipatzen nituen kontuak: sinesgarritasuna, hausnarketak eta informazioa ulertzeko gakoak eskaini behar ditugu guk, profesional gisa. Izan ere, batzuetan informazio «gehiegi» ere egon daiteke eskuragai, eta jendeari zaila egin dakioke albiste askoren artean diskriminazio lana egitea. Zer sinetsi, zer ez… Hor kazetariok gure papera jokatu behar dugu, sinesgarriak bagara erreferenteak izango gara eta jendeak gugana joko du. Baina hori gure lana da, eta ez badugu lortzen ezin diegu errua sareei edo teknologiei bota.

Prentsa lokalaz galdetuko banizu…
Prentsa lokalari dagokionean ere, lehen aipatutako teknologia berriek eta ingurune digitalak baliabide asko eskaini dituzte azken urteetan egitasmo berriak abiatzeko. Euskal Herri osoan tokiko hedabide digital asko sortu dira, eta zorionez horietako asko, gehientsuenak akaso, euskaraz. Paperezkoak ere bai, batzuk. Egoera, noski, ez da leku guztietan berdina, eta tamalez, askotan, hedabide hauek lan boluntarioak ateratzen ditu aurrera, instituzioen babesik gabe. Baina oro har sektorea norabide onean ikusten dut. Gure eskualdeari dagokionean, nik uste dut Geuriak lortu duela erreferente bihurtzea, eta euskaldunon artean ezinbesteko tresna bilakatzea. Hego Uriben horrelako tresna bat izateak berebiziko garrantzia duela uste dut. Gauza bera esan daiteke Bidebieta Irratiaz.

Enpresen ondorengotza ideologikoa egotzita ordaindu behar du Garak Egin egunkariaren gain zegoen zorra.
Bai, Gararen kontrako jazarpen estrategia bat badagoela uste dut, egunkaria sortu zenetik martxan dagoena gainera. Gogoratu behar dugu orduan Jaime Mayor Oreja Barne Ministroak oso hitz gogorrak erabili zituela jaio berria zen egunkariaren kontra, eta Baltasar Garzon epailea 2000. urtean hasi zela Garari Eginen zorra ezartzeko saiakera egiten. Azkenean 2003an lortu zuen zor hura gure gainean jartzea, eta ordutik 16 urte eman ditugu zor horren aurka borrokatzen. Horrek gure lana erabat baldintzatu du urte hauetan guztietan, eta orain, zorra ordaintzeko agindua eman dutenean, egunkariaren bideragarritasuna kolokan jarri dute. Egoera oso larria da, eta horregatik gaude babesa lortzeko kanpainan murgilduta. ‘Ondorengotza ideologikoa’ terminoa bera ere izugarria da, gure ildo editorialagatik zigortu baikaituzte. Bestetik, kontuan hartu behar dugu Gararekin batera, proiektu berdinean, beste hainbat hedabide daudela, hala nola Naiz, Kazeta, Mediabask, Naiz Irratia, Hamaika Telebista, Zazpi Haizetara… eta honek guztiak eurei ere eragiten diela.
Gararen egoerak, oro har, prentsa askatasunari eta adierazpen askatasunari eragiten die, eta beste hedabide batzuentzat ere abisua izan daiteke, ziurtzat ematen diren gauza batzuk auzitan gera baitaitezke agintean daudenek hala erabakitzen badute.

Prentsa askatasuna kolokan dagoela ondoriozta dezakegu askotan.
Tamalez adibide asko ditugu Euskal Herrian prentsa askatasuna kolokan dagoela ondorioztatzeko. Lehen aipatu dugu Egin eta Egin Irratiaren itxiera, baina beste hedabide batzuk ere itxi dituzte azken bi hamarkadetan: Euskaldunon Egunkaria, Ardi Beltza, Kale Gorria, Ateak Ireki… Gainera, gaur egun ere, duela aste batzuk, Argia aldizkariko kazetari bat eta Hala Bedi Irratiko beste bat auzipetuak izan dira beren lana egiteagatik. Mozal Legeak bere aldetik izugarri murrizten du adierazpen askatasuna… Ez dira garai onak gure ogibiderako, baina aurrekoak ere ez ziren izan, eta guri bidea ireki zigutenak ez ziren horregatik kikildu. Eta gizarteak erasoei aurre egiteko modua argi dago zein den: adi egotea, behar denean kalera ateratzea eta, tokatzen denean, elkartasuna adieraztea.

☉ Basauri

Argazkiak / Basauritik Medellinera iritsi da Korrika Ane Ibarrola eta Aitor Aburto herritarren eskutik

Korrika, euskara eta euskal kultura zabaldu dute Ane Ibarrolak eta Aitor Aburtok Medellinen, Kolonbian. Bertako Euskadi ikastetxean daude lanean

|

Ane eta Aitor, behean eta eskuman, Medellingo Euskadi ikastetxeko Korrika Egunean // Aitor Aburto

Medellingo (Kolonbia) Euskadi ikastetxean lanean daude Ane Ibarrola eta Aitor Aburto basauriarrak. Global Training bekari esker heldu ziren urtarrilean eta uztailera bitartean izango dira bertan.

Ane psikologoa da eta Aitor musika eta euskal kulturako irakaslea da eta horretan dihardute ikastetxean.

“Ikastetxe oso txikia da, inklusio-ikastetxe bat da, eta beharrizan bereziak dituzten haur eta gaztetxoak daude, dibertsitate funtzionalekoak zein jokabidekoak”, adierazi digu Aitorrek.

Narciso Larrea López de Luzuriaga euskal misioilariak sortu zuen Euskadi ikastetxea Medellinen 1987an. “Hezkuntza ez da euskaraz ematen, eta normalean ez da euskara irakasgairik ematen. Orain bai, gu bertan gaudelako”, dio Aitorrek.

Anerekin eta Aitorrekin batera Eider Urkiola ormaiztegiarra ere badago bertan lanean. “Global Training bekarekin, duela hiru urtetik hona euskal herritarrak datoz ikastetxera lan egitera, eta euskara eta euskal kulturari buruzko eskolak emateko aprobetxatzen da”, dio Aitorrek.

Tipi tapa, Korrika!

Medellingo Euskadi ikastetxean euskara eta euskal kultura hedatzearekin batera, aurten Korrika ere antolatu dute hiru gazteek: “Medellingo Euskadi ikastetxean ospatzen duten hirugarren Korrika izan da”, dio Aitorrek.

Martxoaren 20an egin zuten Korrika: “Egun tematikoa izan zen: egun horretan ez zen eskolarik egon. Hainbat ekintza antolatu genituen: goizean ikasle batzuek Euskal Herriari buruzko gaiak azaldu zituzten, zazpi probintzietakoak, ikastetxe osoaren aurrean, eta gero Korrika egin genuen ikastetxeko ikasle guztiekin. Gainera, Herri Kirolak ere egin genituen, eta azkenean erromeria bat egin genuen dantza plaza batekin”.

“Oso egun polita izan zen. Umeek primeran pasa zuten, asko ikasi zuten euskal kulturari eta Korrikari buruz. Guretzat oso hunkigarria izan zen, egun tematikoa izan zenez, Korrika eta euskara landu genituelako. Gainera, ikasle eta irakasle horiek euskararen inguruan kontzientziatzea oso garrantzitsua izan zen”, dio Aitorrek.

Osorik irakurri

☉ Basauri

Tximeleta Ludoteka Ibaigane Kultur Etxera lekualdatuko dute urritik aurrera, Basaurin

Ludoteka Ibaiganeko KZGuneko prestakuntza-gelan egokituko du Udalak. Eta KZGuneko prestakuntza Arizko Dorretxean eskainiko dute maiatzetik aurrera

|

Agirre Lehendakaria kaleko lokala "kontserbazio-baldintza onenetan" ez dagoela adierazi du Udalak // Google Maps

Tximeleta Ludoteka Agirre Lehendakaria kaletik Ibaigane Kultur Etxera lekualdatuko du urritik aurrera Basauriko Udalak, “zentroko erabiltzaileei zerbitzu hobea eskaintzeko”, diote udal ordezkariek.

“Agirre Lehendakaria kaleko lokala ez da Udalarena eta ez dago kontserbazio-baldintza onenetan”, zehaztu dute udal arduradunek: “Udal Brigadak konponketa txikiak egin baditu ere, ezin da obra handiagorik egin, ez baita Udalaren jabetzakoa”.

Gauzak horrela, hainbat kokalekuren egokitasuna aztertu eta ondorioztatu dute “baldintza guztiak betetzen dituen espazio bakarra” Ibaiganeko Kultur Etxea dela.

Ibaigane Kultur Etxean KZGuneko prestakuntza-gelan ezarriko dute Ludoteka, -1 solairuan eta haur liburutegiaren ondoan. “Horri esker, modu kordinatuan lan egin ahal izango da antolatzen diren jardueretan, bi zertbitzuak adin bereko erabiltzaileentzat izan baitaitezke”, diote.

KZGunea, Arizko Dorretxera

Lekualdaketa honek beste lekualdaketa bat dakar: KZGuneko prestakuntza-gela Arizko Dorretxera eramango du Udalak, Eusko Jaurlaritzaren oniritzia jaso ostean.

“Maiatzaren 6tik aurrera Arizko Dorretxeko KZGuneak gaur egun Ibaiganen eskaintzen diren bi zerbitzuak izango ditu: prestakuntza eta nabigazioa”, diote Udaletik.

Herriko beste KZGunea Basozelaiko Gizarte Etxean dago.

Osorik irakurri

☉ Basauri

Kareagako eta San Migeleko pediatriaren “kalitate okerra” salatu dute herritarrek Basauriko osoko bilkuran

Kareagako eta San Migeleko pediatria zerbitzuaren egoera salatzeko 4.600 sinadura entregatu dizkiete Osakidetzako zuzendaritzari, Gotzone Sagardui osasun sailburuari eta Barrualde ESIari

|

Osoko bilkuran agerraldia egin ostean manifestazioa egin dute udaletxetik Kareagako anbulatoriora // Utzitakoa

Osakidetzako egoera salatzeko, eta batez ere pediatria zerbitzuaren egoera salatzeko, Kareagako eta San Migeleko herritarrek agerraldia egin dute gaur goizean Basauriko osoko bilkuran.

“Engainatzen saiatu dira guraso guztiei esanez gauza bera dela bi pediatra izatea edo hiru izatea, bi pediatra modu berean arituko direla lanean, eta kalitate bera bermatuko dutela gure seme-alaben arretan eta osasunaren zaintzan. Lehen gezurra”, adierazi du Monica Rey auzotarrak eta 12 urteko alaba baten amak.

“Gure seme-alaben osasuna zaintzeaz profesionaltasun handiz arduratzen diren bi pediatra handi baditugu ere, bi pediatrek ezin dute arreta osoa eman, eta ez dituzte modu berean eta denbora berarekin artatzen lehen hiru pediatraren artean artatzen ziren 1.500 haur baino gehiago. Gainera, pediatretako batek lanaldi murriztua du eta bi osasun-zentroetan lan egin behar du, Kareagan eta San Migelen. Eta pediatriako lehen mailako arretako zerbitzuaren kalitateak okerrera egingo zuela susmatzen bagenuen ere, errealitateak gainditu egin du”.

Maria Larrinaga EAJko zinegotziaren arabera, “oso gai sentikorra” da, “gure herritarrei eragiten diena, eta, hain zuzen ere, horregatik egin ditugu gestioak Osakidetzak zerbitzua hobe dezan.

“Ez dugu inolako gaitasunik egoera aldatzeko. Egin dezakegun gauza bakarra tematzea eta tematzen jarraitzea da. Eta horixe egiten ari gara”, adierazi du Larrinagak, eta gaineratu du: “Otsailaren 14an alkatea eta biok bilera bat izan genuen Gotzone Sagardui sailburuarekin, eta egoera konpontzeko eskatu genion. Udalak ez du gai honi buruzko autoritate legalik edo administratiborik, baina gure herriko herritarrek duten sentimendua eta beharra adierazi genion”.

4.600 sinadura

Zentzu horretan, irailetik aurrera egoera “kaosa” dela adierazi du Monicak: “Pediatren lan-bolumena handitzeaz gain, osasun-zentro batetik bestera mugitu behar izaten baitute. Horrez gain, gurasoen ziurgabetasuna ere areagotu da, baldin eta seme-alabak gaixotzen bazaizkie, ez badakite zein auzotara eraman beharko duten artatuak izateko”.

“Pediatria zerbitzuaren kalitatea okertu egin da San Migeleko eta Kareagako anbulatorioetan. Horregatik, herriko 4.600 bizilagun baino gehiagoren sinadurak bildu ditugu, pediatren murrizketarekin eta ondorioz zerbitzuak okerrera egitearekin ados ez daudenak”, dio.

Sinadurak Osakidetzako zuzendaritzari, Gotzone Sagardui osasun sailburuari eta Barrualde ESIko arduradunei bidali dizkiete.

Pentsiodunen manifestazioa

Osasungintza publikoa indartzeko manifestazioa egin dute gaur eguerdian Basaurin, herriko pentsiodunen mugimenduak deituta. Manifestazioa Basauriko udaletxetik Kareagako anbulatoriora egin dute eta 115 lagun batu dira.

Basauriko pentsiodunek deitutako manifestazioa udaletxetik Kareagako anbulatoriora // Utzitakoa

“Osasun publikoaren narriadurak, desegiteak eta pribatizazioak gora egiten jarraitzen dute, eta ondorio kaltegarriak dituzte herritarren osasunean”, salatu dute Basauriko pentsodunek.

“Osasun-sistema bat behar dugu, arreta mediko presentziala bermatuko diguna, etengabeko aldaketarik gabe, itxaronaldi eskandalagarririk gabeko sistema bat, langileak aktibo hoberentzat hartuko dituen sistema bat”, diote.

Ildo horretan, Osakidetza “birsortzea” eskatu dute Basauriko pentsiodunek: “Osasun-sistema publiko baten barruan, Lehen Mailako Arretatik hasita, Lehen Mailako Arreta osasuna sustatzera eta gaixotasunaren prebentzioara bideratuta, gaixotasuna sendatzera soilik bideratutako eta sistema dual publiko-pribatu batera bidertatutako egungo ereduaren aurrean”.

Osorik irakurri

☉ Basauri

Osasun publikoa indartzeko manifestazioa egin dute ehun herritarrek gaur Basaurin

Osakidetza “birsortzea” eskatu dute Basauriko pentsiodunek: “Osasun publikoaren narriadurak, desegiteak eta pribatizazioak gora egiten jarraitzen dute, eta ondorio kaltegarriak dituzte herritarren osasunean”, salatu dute

|

Osasungintza publikoa indartzeko manifestazioa egin dute gaur eguerdian Basaurin, herriko pentsiodunen mugimenduak deituta. Manifestazioa Basauriko udaletxetik Kareagako anbulatoriora egin dute eta 115 lagun batu dira.

“Osasun publikoaren narriadurak, desegiteak eta pribatizazioak gora egiten jarraitzen dute, eta ondorio kaltegarriak dituzte herritarren osasunean”, salatu dute Basauriko pentsodunek.

“Osasun-sistema bat behar dugu, pertsonalaren arreta mediko presentziala bermatuko diguna, etengabeko aldaketarik gabe, itxaronaldi eskandalagarririk gabeko sistema bat, langileak aktibo hoberentzat hartuko dituen sistema bat”, diote.

Ildo horretan, Osakidetza “birsortzea” eskatu dute Basauriko pentsiodunek: “Osasun-sistema publiko baten barruan, Lehen Mailako Arretatik hasita, Lehen Mailako Arreta osasuna sustatzera eta gaixotasunaren prebentzioara bideratuta, gaixotasuna sendatzera soilik bideratutako eta sistema dual publiko-pribatu batera bidertatutako egungo ereduaren aurrean”.

“Pediatriako kalitate okerra”

Osakidetzako egoera salatzeko, eta batez ere pediatria zerbitzuaren egoera salatzeko, pentsiodunen manifestazioa baino lehen, Kareagako eta San Migeleko herritarrek agerraldia egin dute gaur goizean Basauriko osoko bilkuran.

Osoko bilkuran agerraldia egin ostean manifestazioa egin dute udaletxetik Kareagako anbulatoriora // Utzitako

“Engainatzen saiatu dira guraso guztiei esanez gauza bera dela bi pediatra izatea edo hiru izatea, bi pediatra modu berean arituko direla lanean, eta kalitate bera bermatuko dutela gure seme-alaben arretan eta osasunaren zaintzan. Lehen gezurra”, adierazi du Monica Rey auzotarrak eta 12 urteko alaba baten amak.

“Gure seme-alaben osasuna zaintzeaz profesionaltasun handiz arduratzen diren bi pediatra handi baditugu ere, bi pediatrek ezin dute arreta osoa eman, eta ez dituzte modu berean eta denbora berarekin artatzen lehen hiru pediatraren artean artatzen ziren 1.500 haur baino gehiago. Gainera, pediatretako batek lanaldi murriztua du eta bi osasun-zentroetan lan egin behar du, Kareagan eta San Migelen. Eta pediatriako lehen mailako arretako zerbitzuaren kalitateak okerrera egingo zuela susmatzen bagenuen ere, errealitateak gainditu egin du”.

Maria Larrinaga EAJko zinegotziaren arabera, “oso gai sentikorra” da, “gure herritarrei eragiten diena, eta, hain zuzen ere, horregatik egin ditugu gestioak Osakidetzak zerbitzua hobe dezan.

“Ez dugu inolako gaitasunik egoera aldatzeko. Egin dezakegun gauza bakarra tematzea eta tematzen jarraitzea da. Eta horixe egiten ari gara”, adierazi du Larrinagak, eta gaineratu du: “Otsailaren 14an alkatea eta biok bilera bat izan genuen Gotzone Sagardui sailburuarekin, eta egoera konpontzeko eskatu genion. Udalak ez du gai honi buruzko autoritate legalik edo administratiborik, baina gure herriko herritarrek duten sentimendua eta beharra adierazi genion”.

4.600 sinadura

Zentzu horretan, irailetik aurrera egoera “kaosa” dela adierazi du Monicak: “Pediatren lan-bolumena handitzeaz gain, osasun-zentro batetik bestera mugitu behar izaten baitute. Horrez gain, gurasoen ziurgabetasuna ere areagotu da, baldin eta seme-alabak gaixotzen bazaizkie, ez dakite zein auzotara eraman beharko duten artatuak izateko”.

“Pediatria zerbitzuaren kalitatea okertu egin da San Migeleko eta Kareagako anbulatorioetan. Horregatik, herriko 4.600 bizilagun baino gehiagoren sinadurak bildu ditugu, pediatren murrizketarekin eta ondorioz zerbitzuak okerrera egitearekin ados ez daudenak”, dio.

Sinadurak Osakidetzako zuzendaritzari, Gotzone Sagardui osasun sailburuari eta Barrualde ESIko arduradunei bidali dizkiete.

Osorik irakurri

☉ Basauri

Athletic Jaia antolatu dute Basaurin apirilaren 6an: tailerrak, musika eta pantaila erraldoia

|

2012ko finala Bizkotxalde parkean bizi izan zuten basauriarrek // Utzitakoa

Apirilaren 6an Athleticek Kopako finala jokatuko du Sevillan Mallorcaren aurka. Hego Uribe eskualdean hamaika jarduera antolatu dituzte egunaz gozatzeko.

Basaurin, esaterako, Udalak programazio berezia antolatu du Zirt Zart Gazte Zerbitzuaren eskutik 17:00etatik aurrera.

Hala nola, txapak eta kartelak egiteko ekintza, tailerrak eta musika izango dira arratsaldean zehar Basozelain eta San Fausto plazan. Eta 22:00etan finala ikusteko pantaila erraldoia jarriko du Udalak.

Era berean, aurpegiak margotzeko jarduera, marrazki-tailerrak eta Athleticen inguruko bestelako jarduerak antolatu dituzte Arizko Ikastolan eta Sofia Taramona ikastetxean.

Osorik irakurri