☉ Basauri
Lege eta Lan Aholkularitza Zerbitzuak hogei bat kontsulta jaso ditu lehen hilabetean
Behargintza Basauri-Etxebarri erakundeak urriaren amaieran jarri zuen martxan doako Lege eta Lan Aholkularitza zerbitzu berria, lan izaerako gai jakin batzuei buruzko informazioa eta aholkularitza emateko asmoz. Besteren kontura lan egiten dutenei eta langabeei dago zuzenduta zerbitzua, eta interesdunek abokatu espezializatuekin konpon dezakete euren lan-bizitzari eragiten dion edozein zalantza juridiko. Hala nola, eskubideei eta betebeharrei buruzko informazioa, lan-baldintzen aldebakarreko aldaketak, SEPE prestazioak, kontziliazioa, eszedentziak, kontratuak edo nominekin lotutako gaiak argitzen dituzte, besteak beste. Laneko zalantzak direla-eta abokatu edo sindikatu batengana jotzea beharrezkoa eta zaila dela ikusita, zerbitzu publikoek “galdera horiei erantzun behar zietela” ulertu zuten: “Enpleguaren alde lan egiten badugu, izan ekintzailetzari buruzko ikastaro, prestakuntza edo aholkularitzarekin, enpleguaren kalitateari dagokionez ere lan egin behar genuela pentsatu genuen”, dio Belen Diaz enplegu teknikariak: “Hemen informazioa eta tresnak ematen dizkiegu eta gero beraiek erabakitzen dute erreklamatu ala salatu. Fase horretan gu ez gara sartzen, baina aholkatu, informatu eta lagundu egiten ditugu hona datozenak”, dio Diazek.
Adin guztietako erabiltzaileak
Zerbitzua urrian martxan jarri zutenetik hilabete igaro da. Tarte horretan hogei bat kontsulta egin dituzte, oso anitzak “prestazioen ordainketa bakarrari buruzko informazioa, kalte-ordainei eta kaleratzeei buruzko zalantzak, erretiro aurreratua edota lanaldi partzialetan onartutako atsedenaldiak”, dio Diazek. Gainera, erabiltzaileak adin guztietakoak dira: “Horrek hautsi egiten ditu hasieran aurreikusten genituen profil motak. Uste genuen gazte gehiago etorriko zela, baina errealitatea da nagusiagoak ere etorri direla gurera”.
“Esperientzia positiboa”
Hilabete honetan zerbitzua erabili duten pertsonen artean, 40 urteko emakume batek dio esperientzia “oso positiboa” izan dela: “Kontratu mugagabea nuen eta egun batetik bestera, produktibitate baxuagatik deuseztatu zidaten”, dio: “Ez nekien zer egin, ezta non galdetu ere. Erabateko babesgabetasun-egoeran sentitzen nintzen, baina zerbitzuaren berri izan eta bertara hurbildu nintzen. Zalantza guztiak argitu zizkidaten eta orain, antzeko egoera baten aurrean, badakit zelan jardun”. Lege eta Lan Aholkularitza zerbitzua erabili nahi duenak hitzordua eskatu beharko du 944 262 999 telefono zenbakira deituz edo Baskonia kaleko egoitzara bertaratuz.
Basauri Bonua kanpaina berria abiaraziko du Udalak apirilaren 22tik maiatzaren 19ra bitartean. Guztira herriko 140 saltoki atxiki dira kanpainara, iaz baino zazpi gehiago.
Aurreko urteetan bezala, bi bonu mota igorriko dituzte: bata 4 eurokoa, bezeroek 6 euro gastatu ahal izateko; eta bestea 10 eurokoa, 15 euro gastatzeko.
Aurrekoetan bezala, bonuak ez dituzte formatu fisikoan aterako. Bonuak kanpainari atxikitako establezimenduetan eskuratu behar dira, eta gehienez ere 60 eurora arteko bonuak erosi ahal izango dira NAN/IFZ/AIZ bakoitzeko. Ezin izango dira diru-truke aldatu eta, erabiltzen ez badira, ez da dirua itzuliko.
Kanpainara atxiki diren establezimenduen zerrenda apirilaren 22an bertan publikatuko dute bono.basauri.eus webgunean. Hala ere, saltoki bakoitzak Basauri Bonua identifikazio-eranskailua izango du.
100.000 euro gehiago
Basauriko Udalak 300.000 euro bideratu ditu aurtengo kanpainara, iaz baino 100.000 euro gehiago.
“Guztira 300.000 euro bideratuko ditugu ekimen honetara, baina udalerrian izango duen inpaktu ekonomikoa askoz ere handiagoa izango da, bezero bakoitzak bonua eskuratzean eta erosketa egitean ordaintzen duen kopurua gehitu behar baitzaio kopuru horri”, diote udal ordezkariek.
Basauriko Meeting Probak maiatzaren 5ean, igandez, izango dira Artunduagako kiroldegian 09:00etatik aurrera. Aurten 26. edizioa da eta guztira 40 proba izango dira, tartean kategoria paralinpikokoak.
Izan ere, proba Nazioarteko Batzorde Paralinpikoaren Nazioarteko Atletismo Egutegian sartuta dago, eta, beraz, meetingaren emaitzek errekorretarako eta KPIren rankingerako balioko dute.
Basauriko Meeting Probetan parte hartzeko izena emateko epea zabalik dago apirilaren 21era arte. “Beharrezkoa da atletek, gidariek eta entrenatzaileek izena emateko inprimakia betetzea”, diote batzorde antolatzailetik.
Meetinga Basauriko Merkatari Elkarteak antolatzen du, Udalaren laguntzarekin.
Arazo teknikoak direla eta, Etxebarri eta Basauri geltokien artean zerbitzua eten egin du Metro Bilbaok. Gainera, Basauri geltokia itxita egongo dela adierazi dute, “beste abisurik eman arte”.
Suhiltzaileek jakinarazi dutenez, “sute txiki bat” piztu da metro trenaren gainean, eta adierazi dutenez Metroko langileek eurek amatatu dute.
Pequeño incendio @metrobilbaoeus #Basauri extinguido x operarios #Metro #Bomberos revisan y regresan
Basauri, metron izandako sute txikia metro langileek amatatu dure #Suhiltzaileek errebisatu eta bueltan https://t.co/vMvxPNmsL8 pic.twitter.com/O1naiK59l1— Bomberos y Bomberas Bizkaia (@BomberosBizkaia) April 18, 2024
Alex Garcia Galas basauriarra (Basauri, 36 urte) pankreatitisak jota gaixorik dago Bangkokeko (Thailandia) ospitale batean.
Otsailaren 25ean ospitaleratu zuten Zainketa Intentsiboetako Unitatean (ZIU) eta ordutik bere senideak Euskal Herriratzeko ahaleginetan dira.
Alexen ingurukoek zabaldu dutenez, familiak, “etsi-etsian”, hegazkin medikalizatu bat kontratatu zuen bertara ekartzeko, baina ez zioten hegan egiten utzi, “barne-odoljario larria izateko arriskua” baitzegoen.
Familiak 221.000 euro jarri zituen hegazkin medikalizatu hori kontratatzeko, baina ezin izan dutenez erabili, diru hori galdu dute.
Gauzak horrela, crowfunding kanpaina bat abiarazi dute Alexen lagunek eta senideek. Momentuz 91.371 euro bildu dituzte.
Defentsa Ministerioarekin harremana
Alexen senideak Margarita Robles Defentsa ministroarekin harremanetan jarri ziren aste hasieran eta horrek egoera aztertuko zuela adierazi zien.
Orain, Eitb-k jakinarazi duenez, Defentsa Ministerioak baieztatu du pankreatitisa duen gaztea Espainiaratzeko (Madrilera eramango lukete) hegazkin medikalizatua prestatzen hasi direla, baina oraingoz ez dutela datarik zehaztu.
Diru bilketa Basaurin
Estatuko zein Euskal Herriko hainbat herritarrek dohaintzak egin dituzte. Momentuz 91.371 euro bildu dituzte eta asmoa da 221.000 eurora iristea.
Basaurin El Maño Basozelaiko Auzo Elkarteak kanpaina bat jarri du martxan dirua biltzeko: “Basozelaiko Auzo Elkartetik gure babesa adierazi nahi diogu gure bizilagun Alexen familiari eta datozen egunetan zehaztuko ditugu egingo ditugun ekitaldi solidarioak”, diote.
“Basozelaiko saltokietan itsaulapikoak jarriko ditugu Alexen familiari dohaintzak egiteko, eta diru-sarrerak egiteko kontu-zenbaki bat zehaztuko dugu”, adierazi dute.
Ikastetxeetako jolastokiak ikuspegi feministarekin eraldatzeko prozesua hasi dute Basaurin. Horretarako Udaleko Berdintasun Arloak jardunaldi bat antolatu du eskoletako jolastokiak ikuspegi feministarekin eraldatzearen garrantziari buruzko gogoeta bultzatzeko.
‘Patioetan hamaika aukera. Jolastokiak konpon eta berdintasuna lor’ lemapean, apirilaren 23an mahai-inguru ireki bat antolatu dute Basauriko Udalak eta Marieneak 1era2kain egitasmoaren barruan.
Jardunaldia Ibaigane Kultur Etxean izango da 17:30etik 20:00etara bitartean, eta Basauriko jolastokiak eraldatzeko prozesuan parte hartu duten Lehen Hezkuntzako ikastetxeen esperientziak aurkeztuko dituzte, “haien zailtasun, erronka eta aukerekin”.
Ildo horretan, etorkizuneko erronkak jasoko dituzte “eskola-ingurune inklusibo, genero-estereotiporik gabekoa eta ingurunearen eta pertsona guztien zaintzaz arduratutako baterantz urratsak egiten jarraitzeko”.
Jardunaldian parte hartu nahi duten herritarrek izena eman behar dute esteka honen bitartez edo 605 173 119 telefono zenbakira deituz apirilaren 22a baino lehen.
Autobus zerbitzu osagarria jarri du Metro Bilbaok Etxebarri eta Basauri artean
Basauri Bonua kanpaina berria martxan izango da apirilaren 22tik maiatzaren 19ra arte
Urreta kiroldegia handitzeko lanak udan hastea aurreikusi du Galdakaoko Udalak
Hego Uribeko dozenaka pentsiodun Gasteizen batu dira 1080 euroko gutxieneko pentsioa aldarrikatzeko
⚪️🔴 GABARRA | Argazkiak | Aupa Aitor Paredes! Talde zuri gorria Kopako txapelketa ospatzen!
