☉ Basauri
Leire (Erizaina Italian): “Fisikoki hobeto gaude, baina burua leher eginda dugu”
Leire Zatón basauriarrak hogei urte damara Turinen. 2004an erizain ikasketak bertan bukatu zituen eta ordutik bertan bizi da. Italiako ospitale garrantzitsuenetako batean egiten du lan, Turineko Molinette ospitaleko larrialdi zerbitzuetan.
Zein da Molinette Ospitaleko egoera? Nahiko kritikoa da. Kutsatu asko ditugu ospitaleko solairuetan, ez soilik koronabirusak jota, bestelako patologiak dituztenak ere baditugu. Tumore eta transplante ebakuntzetan eta zaintzetan erreferente da gure ospitalea. Bigarren mailako zentroa da, hala sailkatzen ditugu hemen, eta horrek esan nahi neurozirujauak eta kardiozirujauak ditugula, besteak beste.
Eta nolakoak dira zure egunak? Estres handikoak. Familia medikuen kontsultak asko jaitsi dira, baina arnasteko arazoak dituzten gaixoak izugarri igo dira. Azken egunotan, fisikoki deskantsatuago gaudela esango nuke, baina buruari kostatzen zaio gertatzen ari den honekin guztiarekin aurrera jarraitzea, eta lan egiteko fresko mantentzea. Ez jakitea bisitatzen ari naizen pertsona kutsatuta dagoen edo ez gogorra da. Antsietate handia sortzen du horrek eta zure buruari etengabe galdetzen diozu ea dena ondo egin dudan, ea begiak edo aurpegia ikutu ditudan babesteko materiala kendu dudan bitartean, zerbait gaizki egin badut birusa nire etxera eraman dezakedala eta bertakoak kutsatu. Eta egunero ospitaletako gaixoekin gaude. Eurek ezin dute familia ikusi. Ikaragarria da, tristea eta gogorra.
Zuen gaixoen babeserako material nahikoa al duzue? Ospitaleak berak ematen dizkigu norbanakoarentzako babes materiala. Ahalik eta ondoen zaintzen saiatzen gara, den-dena ondo aprobetxatuz, bestela ez genuke guztiontzako materialik edukiko. Eskularru eta maskara bakoitza ondo zaindu behar dira.
Zenbat ordu ari zarete lanean? Zortzi orduko txandak egiten ditugu. Hori da gure ohiko ordutegia. Baina osasun langileen artean baja asko dago eta zerbitzu osoa mantendu ahal izateko lanean ari garenok guardia bereziak egitea beharrezkoa da. Hortaz, hamabi orduko txandak egin ditzakegu, segidan edo tartean atseden hartuta. Birusa uste genuena baino askoz gehiago zabaldu da osasun langileon artean, osasun zentro eta solairu gehienetan. Nire lankideen erdia, esaterako, berrogeialdian egon da.
Leirek hogei urte darama Italian bizitzen / Utzitakoa
Molintette Ospitalean egoerak gainezka egin al du? Ez. Hasiera batean egoera oso larria izango zela uste genuen, baina ez du gainezka egin eta zerbitzua eman dugu. Martxoan, birusa zabaltzen hasi zenean, herritar asko zetorren larrialdi zerbitzura, sintomari arinekin edo sintomarik eduki ez arren. Ikaratuta zeudelako etortzen ziren gurera. Orduan bai pentsatu genuela honek guztiak gainezka egingo zuela eta osasun zerbitzuak ezingo ziola krisi honi behar bezala erantzun. Baina ordutik egoera lasaitu egin da. Kutsatu eta hildakoen datuak onak izan ez arren, jendeak informazio gehiago zuen, gomendioak eta betebeharrak ezarri ziren eta familia medikuek sintoma arineko kasuak euren gain hartu zituzten. Hala ere, Italiako ZIUak beteta daude, oraindik beteta daude, ez dago toki gehiagorik.
Gizarteak nola bizi du krisia? Hasiera batean errespetu handiz bete genuen itxialdia, baina asteak aurrera joan ahala, lasaitu egin garela esango nuke. Gero eta jende gehiago ikus daiteke kalean, binaka eta babes neurriak bete barik. Ulertzekoa da nekea, umeak etxetik atera gura izatea, diabetikoen eta arazo psikikoak dituztenen egoera… Gizarte osoa eduki behar dugu buruan eta, ahal dela, ez dugu hutsik egin behar. Ez ohiko egoera batean gaude, ez dugu ahaztu behar, etxean geratu behar dugu eta funtsezkoa denerako bakarrik atera. ZIUetan toki librerik ez badugu, egoera larria izaten jarraitzen duenaren seinale, ezin ditugulako Covid19ak edo bestelako patologiak sufritu ditzaketenak, bihotzekoak kasu, behar bezala artatu.
Estatuek hartu dituzten neurriak nahikoak al dira? Uste dut neurriak berandu hartu direla, baina eraginkorrak izan direla. Gaur egun, segurtasun-indarren kontrola handiagoa izan beharko lukeela uste dut. Izan ere, italiarrek zalantzak dituzte orain: kalera ateratzen gara eta ikusten dugu ez zaigula ezer pasatzen, birusari beldurra galdu diogula esango nuke, eta hori arriskutsua da oso. Kontu handiz ibili behar dugu.
Italiaren atzetik goazela diote gurean. Aholkurik ematera ausartuko zinateke? 65 urtetik gorakoak, onkologikoak eta patologia asko dituztenak dira birusarekin kutsatu eta oso larri gaixotu daitezkeenak. Oro har, inmunodeprimituak, gorputzaren babesak ahul dituztenak, horiek dira aldebiko pneumonia azkarregi garatu dezaketenak eta ZIUn ingresatu behar ditugunak, bai ala bai, eta ZIUn ez dago nahi beste ohe. Hortaz, itxialdian jarraitu behar dugu, maskarak erabili, gure arteko segurtasun tartea zaindu eta etorriko dira txertoak edo tratamendu eraginkorrak. Pazientzia eduki behar dugu, baina aurrera egingo dugu.
–
Jatorrizko elkarrizketa hemen irakurgai.
Basauriko Herri Krosaren 43. edizioa izango da azaroaren 2an, igandez.
Irteera eta helmuga Artunduaga kiroldegia izango dira eta kategoriaren arabera irteera-ordutegi eta distantzia desberdinak egongo dira:
- 10:15. 2020-2025 urteetan jaiotakoak: 400 metroko lasterketa
- 10:30. Kategoria absolutua: 11 kilometro
- 10:35. 2014-2015, 2012-2013 eta 2010-2011 urteetan jaiotakoak: 3,5 kilometroko lasterketa
- 10:40. 2018-2019 eta 2016 eta 2017 urteetan jaiotakoak: 1,2 kilometroko lasterketa (atletismo pistari 3 itzuli)
Basauriko Herri Krosean parte hartzeko izena ematea zabalik dago kirolprobak.com webgunean gaur arte, urriaren 29ra arte, 23:59ak arte.
San Jose Ikastetxeko Ikasle Ohien Elkarteak eta Kukurrustu Kirol Klubak antolatzen dute Basauriko Herri Krosa.
☉ Basauri
Azeituna con huesos, Keax, Reeler, Jaimones, Kruddö eta Silkat lehiatuko dira larunbatean, Rockeineko finalean
Rockeinen 2025eko edizioan 196 artistak eman dute izena, 10. urtez jarraian parte hartze marka gaindituz
Larunbat honetan, azaroaren 1ean, izango da Rockein lehiaketako finala, Basauriko Social Antzokian. Bertan, Azeituna con huesos, Keax, Reeler, Jaimones, Kruddö eta Silkat bandak lehiatuko dira. Sarrera doakoa izango da eta gonbidapen bidez egingo da, Social Antzokiko webgunetik eskuratuz.
Basauriko Udalak, Bizkaiko Foru Aldundiaren Kultura, Euskara eta Kirol sailaren laguntzaz, antolatu eta Euskadiko eta Nafarroako talde eta bakarlariei zuzendutako Rockein musika-lehiaketaren 13. edizioaren finala izango da aurtengoa.
Azeituna con Huesos talde gipuzkoarra (elektronika, popa, jazza); Keax hirukote bizkaitarra (The Owl Project taldeko kide ohiak, LCD Soundsystem edo Ratatat bezalakoen eraginekin); eta Bilbon egoitza duen Reeler rock alternatiboko laukotea, Bizkaiko, Poloniako, Ingalaterrako eta Irlandako musikariek osatua, dira Rockeinen 13. edizioko sari nagusia irabazteko hiru hautagaiak.
Eskualdeko hautagaiak
Beste hiru talde finalistak Jaimones (70-80 hamarkadako rock amerikar laukotea, Basauriko kide batekin), Kruddö, rock gogor eta stoner bikotea, Jon Ander Santamaría bermeotarrak eta Txaber Miravalles etxebarriarrak osatua; eta dira Silkat, indie rock hirukotea, Bilbo eta Galdakaoko musikariekin eta The Cure edo Radiohead taldeen eraginekin.
Azken hiru talde hauek Hego Uribeko artistarik onenari saria lortzeko aukera izango dute, Basaurin, Arrigorriagan, Etxebarrin, Galdakaon, Ugaon, Usansolon edo Zaratamon erroldatutako kide bat gutxienez duten proiektuak saritzen baititu.
“Ohi bezala, Rockeineko 5 kategorien irabazleen izenak (‘Bizkaia saria’, ‘Artistarik onena euskaraz’ eta ‘Eskarabilera saria’, barne) finalean bertan jakinaraziko ditu epaimahaiak”, azaldu dute antolaketa taldetik. Rockeinen 2025eko edizioan 196 artistak eman dute izena, 10. urtez jarraian parte hartze marka gaindituz.”
Emakumeen esperientziaren hitzaldia
Azaroaren 6an, MAZ Basauri jaialdiaren bezperan hain zuzen ere, ‘Emakumeak eta industria musikala’ topaketaren bigarren emanaldia hartuko du Marienean Basauriko Emakumeen Etxeak (Kareaga Goikoa, 54).
Iaz lehen edizioa izan zen eta Rockeinek, MAZ Basaurik eta Marieneak urtero antolatzen duten hitzaldia da, eta helburua musikaren industriako emakumeen esperientziak beste emakume batzuekin partekatzea da, “sektorean eta eszenatokietan emakumeen presentzia handiagoa sustatzeko”, hain zuzen ere.
Aurtengo gonbidatuak La Furia artista nafarra, Ibone Iza BIME Proko edukien arduraduna eta Maite Alaña MAZ Basauri eta Rockeineko zuzendaria izango dira eta Emilia Arias kazetari eta idazleak (TVE, Pikara Magazine) gidatuko du hitzaldia.
Egitaraua | Rockein finala 2025
Larunbata, azaroak 1
20.30 (ateak irekitzea)
Hego Uribeko artistarik onenaren kategoria
21.00 Silkat
21.30 Kruddö
22.00 Jaimones
Kategoria nagusia
22.40 Azeituna con huesos
23.10 Reeler
23.40 Keax
00.15 Sari-banaketa
☉ Basauri
Basauriko Social Antzokiko zubia itxiko dute ibilgailuentzat, San Faustoko obrengatik
Urriaren 28tik (asteartetik) azaroaren 9ra bitartean ibilgailuen trafikoa moztuko dute zubian
Urriaren 28tik (asteartetik) azaroaren 9ra bitartean ibilgailuen trafikoa moztuko dute Social Antzokiko zubian, San Fausto plaza berria eraikitzeko lanak direla eta.
“Egun horietan zehar, zubiko galtzada handituko dute, eta Autonomia kalekoa ere bai, elizaren eta A25 plazaren aurreko zatian”, azaldu dute udal ordezkariek. Hori dela eta, denbora tarte horretan ezingo da Autonomia kaletik udaletxerantz biratu, eta udaletxe eta Kareaga Goikoa kaleen arteko bidegurutzetik Arizgoitira jaitsi ere ez.
Gainera, Basauriko Udaletik iragarri dute azaroaren 4tik 9ra Autonomia kalean itxita egongo dela Begoñako Andra Mari eta Nagusia kaleen arteko zatia.
☉ Basauri
Sidenorreko presidentea ikertzen ari da Espainiako Auzitegi Nazionala, Israelgo arma enpresa bati altzairua saltzeagatik
Jose Antonio Jainaga ikertzeaz gain, zuzendaritzako beste bi kide ikertuko dituzte, kontrabandoagatik eta gizateriaren aurkako delituan parte hartzean konplize izateagatik
Jose Antonio Jainaga Sidenor enpresako zuzendaria eta beste bi kide ikertzen ari da Espainiako Auzitegi Nazionala, Israelgo arma enpresa bati altzairua saltzeagatik.
Zehazki, kontrabandoagatik eta gizateriaren aurkako delituan parte hartzean konplize izateagatik ikertuko dituzte hiru enpresariak.
Ikerketa Francisco de Jorge epaileak zabaldu du, Comunitat Palestina de Catalunya-Terra Santa elkartearen kereila baten ondorioz.
Hain zuzen ere, Sidenorrek Israel Military Industries (IMSI) konpainia israeldarrari altzairua saldu diolakoan zabaldu du epaileak ikerketa.
Epailearen ustez, Basauriko enpresako zuzendaritzako kideak “erabat jakitun” ziren saldutako materiala armak ekoizteko erabiliko zela.
Momentuz, ez dute Sidenor Aceros Especiales enpresa osoa ikertuko. Gertakariak Clerbil SL merkataritza-sozietateari ere egotz dakizkioke, sozietate horrek baitu Sidenor Holdings Europa sozietatearen administratzaile bakarraren kargua.
Hala ere, epaitegiak uste du oraingoz ez dela bidezkoa Sidenor Aceros Especiales SLU merkataritza-sozietatea pertsona juridiko ikertu gisa hartzea. Alegatutako arrazoia da enpresa horretako langileek zeregin aktiboa dutela eta salaketa publikoa egiten laguntzen dutela, bai eta ustezko delitu-jarduerarekin jarraitzea eragozten dutela ere.
Kasu horretan, epaileak Europako zuzentaraua eta arauhausteei eta ustelkeriaren aurkako borrokari buruzko informazioa ematen duten pertsonen babesa arautzen duen legea aplikatzen ditu erabaki hori hartzeko.
Harremana etetea
Sidenorrek uztailean adierazi zuen salmentak eten zituela Israelekin. BDZ mugimenduaren (Boikota, Desinbertsioa eta Zigorrak) eta sindikatuen kritiken ostean eten zuen harremana Sidenorrek Israelekin.
Hain zuzen ere, ekainean GEURIAn eta beste hedabide batzuetan zabaldu genuenaren arabera, Sidenorrek 1.207 tona altzairu saldu zizkion IMI Systems armagile israeldarrari, 2024ko abuztutik.
Enpresaren arabera, Israelekin salmentak eten zituen, “joan den apirilean Espainiako Gobernuak herrialde horri salmenta-kontratua etetea erabaki ondoren”. Aurretik, ordea, Sidenorrek, epailearen autoaren arabera, ez zion salmentarako beharrezko baimenik eskatu Espainiako Gobernuari.
☉ Basauri
La Basconiako nabeen birgaitze-proiektua idazteko kontratazio-prozesua hasi du Basauriko Udalak
Nabeak birgaitu ondoren, parte-hartze prozesua jarriko du martxan Udalak zehazteko zein jarduera kultural edo artistiko egin bertan
La Basconiako industria-nabeak birgaitzeko proiektua idazteko kontratua lehiaketa publiko bidez adjudikatzeko lizitazio-prozesua hasi du Basauriko Udalak.
Lizitazioaren oinarrizko aurrekontua 220.825 eurokoa da, eta exekuzio-epea sei hilabetekoa. Birgaitze-lanek Kultura Ministerioaren dirulaguntza jasoko dute; 4 milioi euro, zenbait urtetan banatuta.
“Nabeen eraikuntza-antolamendu egokia dela eta, proiektuak egitura metaliko errematxatua mantentzea aurreikusi beharko du. Zoladurari dagokionez, berria egingo dute. Eta, bestalde, fatxadak desmuntatu, eta berriak jarriko dituzte”, diote udal arduradunek.
Obren lehen faseari dagokionez, nabeak birgaituko dituzte: egitura sendotu, eta orubea zolatuko dute, plaza publiko estalia bihur dadin.
“Gero, analisi tekniko eta herritarren parte-hartze prozesu baten ostean, zehazkiago erabakiko da eremu hartan zein jarduera egingo diren, baina, edozelan ere, jardun kulturalak edota artistikoak izango dira”, diote udal ordezkariek.
Hiru gune
Hiru nabe birgaituko ditu Udalak: 125 metro luze eta 57 metro zabal. “Hiru nabeen azalera 7.125 metro karratu da, ia-ia San Mames futbol-zelaiaren bestekoa (7.140 metro karratu); beraz, azpiegituran gune desberdinak egon ahalko dira, erabilera kolektiboetarako”, diote.
Udalaren helburua da nabeak birgaitu ondoren sortuko den espazio berria lotunea izatea eremu hartan eraikiko dituzten etxebizitzen eta ekonomia-jarduerako gunearen artean, “eta basauriarrentzako erreferentziazko tokia ere bihurtu dadila”.
La Basconiaren industria-nabeak SEPESen lurretan daude. Erakunde horrek orubeok erosi zituen erabilera mistoko hirigintza-jarduketa abiarazteko, eta, horren barruan, eremu bi garatuko dituzte: ipar-mendebaldekoa, ekonomia-jardueretarako, eta ipar-ekialdekoa, etxebizitza- eta merkataritza-erabilerarako.
2024ko martxoan, SEPESek doan laga zizkion nabeak Basauriko Udalari. Erakunde biek sinatutako lagapen-kontratuak ezartzen du nabe horiek erabilera publikoko edo gizarte-intereseko xedeetara bideratuko direla. “Adibidez, tokiko artearen eta kulturaren zabalkundea, euskara, hezkuntza-jarduerak, gizarte-izaerakoak eta enplegua sustatzera zuzendutakoak”, diote.
Ertzain batek drogetan positibo eman du Etxebarri parean izandako istripu batean
Igerilekuan liburutegi bat sortzeko proposamena landuko du Haurren Kontseiluak Galdakaon
‘Katana’ bakarrizketa eta ‘Azkena eta bagoaz’ euskarazko obra eskainiko dituzte Ugaoko ‘Ostiralero antzerkiarekin bat’ zikloan
Argazkiak | Ehun arrigorriagar baino gehiagok Heidelberg enpresan gertatutako heriotza-istripua salatu dute herriko plazan
Argazkiak | Aldatxa eta Urbiko Lagunak, Basauriko jaietako buruhandienak!
Argazkiak | Jaietan etenaldia egin dute ehunka basauriarrek Palestinari elkartasun keinu bat egiteko
Bideoa | Dozenaka pertsona elkartu dira Arrigorriagan Heidelberg enpresan gertatutako lan-heriotza salatzeko
Bideoa | Berbalagun egitasmoa martxan da Basaurin eta Galdakaon, nobedade askorekin
