☉ Basauri
Lopez Garai: “Umeek kalean jolas dezatela futbolean, hori galtzen ari baita”
Indartsu Klubean hasi zen futbolean Aritz Lopez Garai (Basauri, 1980) eta ordutik hona hainbat taldetan ibili da: Athletic, Basconia, Gernika, Conquense, Salamanca, Castellon, Celta de Vigo, Cordoba eta Sporting de Gijón. Denboraldi honetan Lehenengo Mailara egin du salto Cordobarekin, baina urtarrilaren 29an talde uztea erabaki berri du. Erabaki hori hartu aurretik izan ginen berarekin.
Nolakoa izan da Lehen Mailan debutatzea?
Espainiako futbol ligako Lehenengo Mailan debutatzea momentu oso desiratua zen niretzat. Horren esperoan geunden familia eta biok. Izan ere, bizitza osoa daramat futbolean jokatzen. Gainera, debutatzeko Bernabeu zelaia baino eszenatoki hoberik aurkitzea zaila da.
Poztasun ikaragarria izango zenuen, Cordoba hiriarekiko sentimendu berezia baituzu…
Duda barik, hala da. Cordoba nire etxea da arrazoi askorengatik: lanagatik bertan bizi naiz, familia erdia bertan dut… Gainera nire semea Cordoban jaio da. Maitasun gehien eman didaten lekua da Cordoba.
Bertako futbol taldea urrezko kategorian da berriro 42 urteren ondoren. Ezin esan hasiera oso ona izan duzuenik, baina entrenatzaile aldaketarekin gauzak pixkanaka aldatzen doazela uste al duzu?
Argi nabari dugu munduko futbol ligarik onenera egokitzea oso konplikatua izan dela. Gainera horri gehitu behar zaio taldean hamalau jokalari berri ditugula eta entrenatzaile aldaketa izan dugula denboraldia hasi eta gutxira. Nire ustez, Djukic-ekin taldeak borroka egingo du ohorezko maila honetan beste denboraldi batez mantentzeko.
Cordoban “Vasco” ezizenez ezaguna zara, nahiz eta taldeko euskaldun bakarra ez izan…
Bai, kar kar… Mikel Saizar atezaina ere euskalduna da, baina ni bera baino urtebete lehenago etorri nintzen Cordobara. Beraz, “Vasco” ezizenarekin ezagutzen naute hemen.
Zeintzuk dira bigarren eta lehenengo mailaren arteko alderik nabarmenenak?
Lehenengo mailan jokoaren erritmoa azkarragoa da, eta egindako akatsak neurrigabe zigortzen dituzte. Era berean, jokoaren kalitatea altuagoa da zentzu guztietan. Hainbat urtez bigarren mailan egon ostean, Cordoba bezalako talde batentzat zaila da lehenengo mailan mantentzea; baina hori da helburua.
Lehen esan duzun bezala, bizitza osoa daramazu futbolean jokatzen eta hainbat klubetan izan zara. Bakoitzean momentu onak eta ez hain onak biziko zenituen…
Bai, noski. Klub edo hiri bakoitzean aurkitu ditudan pertsona bikainak ezagutzea eta, noski, lehenengo mailara igoera izan dira momenturik onenak. Balantzaren beste aldean, dudarik gabe, Xixonen bizi izan nuen egoera jarriko nuke; momentu oso gogorrak izan ziren.
INOIZ AHAZTUKO EZ DITUDAN IRUDIAK, LEHEN MAILARA IGO GINENEKOAK
Denbora luzez ahaztuko ez duzun anekdotarik ba al duzu kontatzeko?
Asko ditut, baina inoiz ahaztuko ez ditudan irudiak lehenengo mailara salto egin genuenekoak dira, bai Las Palmasen bai Cordoban bizitakoak: Utilleroak ileordeekin Las Palmaseko kaleetan barrena, jokalariak zerbitzariz mozorrotuta hotel bateko afaria zerbitzatzen… eta abar luze bat.
Athletic gertutik jarraitzeko aukera duzu ala Cordoban duzu burua etengabe?
Hemen, Cordoban, daukagunarekin nahiko dut, baina egia da asteburuetan tarte bat hartzen dudala Athleticen ibilbidea jarraitzeko.
Athleticeko eta Cordobako zaleak antzekoak omen dira…
Cordobako zaleak ikaragarriak dira: etengabe animatzen dihardute nahiz eta partida osteko emaitzak onak ez izan. Athleticeko zaleak ezagunak dira mundu osoan zehar oso leialak direlako, baita San Mamesen animatzen duten moduagatik ere.
Aholkurik ba al duzu futbolean hasiberri diren umeentzako?
Garrantzitsuena dibertitzea da, ahalik eta ondoen pasatzea. Eta kalean jolas dezatela; hori galtzen ari baita pixkana-pixkanaka, eta oso polita da.
BADAKIT NIRE FUTBOLARI IBILBIDEA AZKEN TXANPAN DAGOELA
Etorkizunari begira…
Badakit nire futbolari ibilbidea bere azken txanpan dagoela, baina ilusioa dudan bitartean eta fisikoki ondo sentitzen naizen bitartean futbolean jokatzen jarraitu nahiko nuke. Entrenatzaile izateko aukera ez dago, epe laburrera begira behintzat, nire asmoen artean.
_______________
«ONENA, LEHEN MAILARA IGOTZEA; OKERRENA, XIXONEKO SEI HILABETEAK»
Zer egiten duzu denbora librean? Nire emaztearekin eta semearekin pasatzen dut nire denbora librea
Beste kirolen bat? Saskibaloia. Bereziki, NBA
Amets bat futbolean? San Mamesen jokatu ahal izatea eta Cordoba lehenengo mailako taldea izaten jarraitzea
Bazkaririk gogokoena? Aitak prestatzen dute hegaluzea
Pelikula bat? El diario de Noah. Nire semearen izena Noah da, pelikularengatik
Liburu bat? El código Da Vinci
Futbolean momenturik onena? Lehenengo mailara igoera
Eta txarrena? Xixonen bizi izandako sei hilabeteak
Lopez Garai eta bereak, familia giroan, Basaurin
Basauri Bonua kanpaina berria abiaraziko du Udalak apirilaren 22tik maiatzaren 19ra bitartean. Guztira herriko 140 saltoki atxiki dira kanpainara, iaz baino zazpi gehiago.
Aurreko urteetan bezala, bi bonu mota igorriko dituzte: bata 4 eurokoa, bezeroek 6 euro gastatu ahal izateko; eta bestea 10 eurokoa, 15 euro gastatzeko.
Aurrekoetan bezala, bonuak ez dituzte formatu fisikoan aterako. Bonuak kanpainari atxikitako establezimenduetan eskuratu behar dira, eta gehienez ere 60 eurora arteko bonuak erosi ahal izango dira NAN/IFZ/AIZ bakoitzeko. Ezin izango dira diru-truke aldatu eta, erabiltzen ez badira, ez da dirua itzuliko.
Kanpainara atxiki diren establezimenduen zerrenda apirilaren 22an bertan publikatuko dute bono.basauri.eus webgunean. Hala ere, saltoki bakoitzak Basauri Bonua identifikazio-eranskailua izango du.
100.000 euro gehiago
Basauriko Udalak 300.000 euro bideratu ditu aurtengo kanpainara, iaz baino 100.000 euro gehiago.
“Guztira 300.000 euro bideratuko ditugu ekimen honetara, baina udalerrian izango duen inpaktu ekonomikoa askoz ere handiagoa izango da, bezero bakoitzak bonua eskuratzean eta erosketa egitean ordaintzen duen kopurua gehitu behar baitzaio kopuru horri”, diote udal ordezkariek.
Basauriko Meeting Probak maiatzaren 5ean, igandez, izango dira Artunduagako kiroldegian 09:00etatik aurrera. Aurten 26. edizioa da eta guztira 40 proba izango dira, tartean kategoria paralinpikokoak.
Izan ere, proba Nazioarteko Batzorde Paralinpikoaren Nazioarteko Atletismo Egutegian sartuta dago, eta, beraz, meetingaren emaitzek errekorretarako eta KPIren rankingerako balioko dute.
Basauriko Meeting Probetan parte hartzeko izena emateko epea zabalik dago apirilaren 21era arte. “Beharrezkoa da atletek, gidariek eta entrenatzaileek izena emateko inprimakia betetzea”, diote batzorde antolatzailetik.
Meetinga Basauriko Merkatari Elkarteak antolatzen du, Udalaren laguntzarekin.
Arazo teknikoak direla eta, Etxebarri eta Basauri geltokien artean zerbitzua eten egin du Metro Bilbaok. Gainera, Basauri geltokia itxita egongo dela adierazi dute, “beste abisurik eman arte”.
Suhiltzaileek jakinarazi dutenez, “sute txiki bat” piztu da metro trenaren gainean, eta adierazi dutenez Metroko langileek eurek amatatu dute.
Pequeño incendio @metrobilbaoeus #Basauri extinguido x operarios #Metro #Bomberos revisan y regresan
Basauri, metron izandako sute txikia metro langileek amatatu dure #Suhiltzaileek errebisatu eta bueltan https://t.co/vMvxPNmsL8 pic.twitter.com/O1naiK59l1— Bomberos y Bomberas Bizkaia (@BomberosBizkaia) April 18, 2024
Alex Garcia Galas basauriarra (Basauri, 36 urte) pankreatitisak jota gaixorik dago Bangkokeko (Thailandia) ospitale batean.
Otsailaren 25ean ospitaleratu zuten Zainketa Intentsiboetako Unitatean (ZIU) eta ordutik bere senideak Euskal Herriratzeko ahaleginetan dira.
Alexen ingurukoek zabaldu dutenez, familiak, “etsi-etsian”, hegazkin medikalizatu bat kontratatu zuen bertara ekartzeko, baina ez zioten hegan egiten utzi, “barne-odoljario larria izateko arriskua” baitzegoen.
Familiak 221.000 euro jarri zituen hegazkin medikalizatu hori kontratatzeko, baina ezin izan dutenez erabili, diru hori galdu dute.
Gauzak horrela, crowfunding kanpaina bat abiarazi dute Alexen lagunek eta senideek. Momentuz 91.371 euro bildu dituzte.
Defentsa Ministerioarekin harremana
Alexen senideak Margarita Robles Defentsa ministroarekin harremanetan jarri ziren aste hasieran eta horrek egoera aztertuko zuela adierazi zien.
Orain, Eitb-k jakinarazi duenez, Defentsa Ministerioak baieztatu du pankreatitisa duen gaztea Espainiaratzeko (Madrilera eramango lukete) hegazkin medikalizatua prestatzen hasi direla, baina oraingoz ez dutela datarik zehaztu.
Diru bilketa Basaurin
Estatuko zein Euskal Herriko hainbat herritarrek dohaintzak egin dituzte. Momentuz 91.371 euro bildu dituzte eta asmoa da 221.000 eurora iristea.
Basaurin El Maño Basozelaiko Auzo Elkarteak kanpaina bat jarri du martxan dirua biltzeko: “Basozelaiko Auzo Elkartetik gure babesa adierazi nahi diogu gure bizilagun Alexen familiari eta datozen egunetan zehaztuko ditugu egingo ditugun ekitaldi solidarioak”, diote.
“Basozelaiko saltokietan itsaulapikoak jarriko ditugu Alexen familiari dohaintzak egiteko, eta diru-sarrerak egiteko kontu-zenbaki bat zehaztuko dugu”, adierazi dute.
Ikastetxeetako jolastokiak ikuspegi feministarekin eraldatzeko prozesua hasi dute Basaurin. Horretarako Udaleko Berdintasun Arloak jardunaldi bat antolatu du eskoletako jolastokiak ikuspegi feministarekin eraldatzearen garrantziari buruzko gogoeta bultzatzeko.
‘Patioetan hamaika aukera. Jolastokiak konpon eta berdintasuna lor’ lemapean, apirilaren 23an mahai-inguru ireki bat antolatu dute Basauriko Udalak eta Marieneak 1era2kain egitasmoaren barruan.
Jardunaldia Ibaigane Kultur Etxean izango da 17:30etik 20:00etara bitartean, eta Basauriko jolastokiak eraldatzeko prozesuan parte hartu duten Lehen Hezkuntzako ikastetxeen esperientziak aurkeztuko dituzte, “haien zailtasun, erronka eta aukerekin”.
Ildo horretan, etorkizuneko erronkak jasoko dituzte “eskola-ingurune inklusibo, genero-estereotiporik gabekoa eta ingurunearen eta pertsona guztien zaintzaz arduratutako baterantz urratsak egiten jarraitzeko”.
Jardunaldian parte hartu nahi duten herritarrek izena eman behar dute esteka honen bitartez edo 605 173 119 telefono zenbakira deituz apirilaren 22a baino lehen.
Autobus zerbitzu osagarria jarri du Metro Bilbaok Etxebarri eta Basauri artean
Basauri Bonua kanpaina berria martxan izango da apirilaren 22tik maiatzaren 19ra arte
Urreta kiroldegia handitzeko lanak udan hastea aurreikusi du Galdakaoko Udalak
Hego Uribeko dozenaka pentsiodun Gasteizen batu dira 1080 euroko gutxieneko pentsioa aldarrikatzeko
⚪️🔴 GABARRA | Argazkiak | Aupa Aitor Paredes! Talde zuri gorria Kopako txapelketa ospatzen!
