Sareak

☉ Galdakao

37 milioi euroko aurrekontua izango du Galdakaok, iaz baino 4 milioi gehiago

Azken 10 urteetako aurrekonturik altuena izango du aurten Galdakaoko Udalak. Guztira inbertsioetarako 6,4 milioi euro bideratuko dituzte.

|

Atzo aurkeztu zuen 2019ko aurrekontu proiektua Galdakaoko udal gobernu taldeak // Argazkia: Geuria

Azken 10 urteetako aurrekonturik altuena izango du aurten Galdakaoko Udalak. Guztira inbertsioetarako 6,4 milioi euro bideratuko dituzte

Galdakaoko udal gobernu taldeak (EAJ eta PSE) 2019ko aurrekontu proiektua aurkeztu du otsailaren 26an. Guztira, 37.175.292 euro izango ditu Udalak, iaz baino 4 milioi euro gehiago (% 11,8 gehiago). “Azken 10-11 urteetako aurrekonturik altuena izango da 2019koa eta asmo handiko proiektuak egitea ahalbidetuko digu”, dio Ibon Uribe Galdakaoko alkateak.

Aurtengo aurrekontuko zati handi bat (% 17,37) inbertsioetarako izango da, 6.455.525 euro bideratuz (iaz baino 3 milioi euro gehiago). Guztira, 39 izango dira inbertsioak. Besteak beste, inbertsioen artean nabarmentzekoak dira auzoetan hobekuntzak egitea eta bestelako inbertsio estrategikoak gauzatzea. Inbertsio estrategikoetarako guztira 4,6 milioi euro bideratuko dituzte eta horiek dira: Antenna zentroa eraikitzeko obrak abiaraztea (1.243.389 euro); Aperribain lehenengo bi igogailuak eraikitzea (1.495.708 euro); N-634 errepidean, Urretan (Petardos CM dendaren ondoan), biribilgune bat egitea (1.208.528 euro); eta Andraenea Emakumeen Etxea eraikitzen hastea (697.000 euro).

Antenna zentrorako dagoeneko 1,8 milioi euro bideratu ditu Udalak: aurtengo 1,2 milioi euroak eta iazko aurrekontuan sortu zuten 557.000 euroko partida. 2018 urte bukaeran Antennako lehen harria jartzea aurreikusi zuten iaz, baina atzeratu behar izan zuten. “Urte honetan ejekuzioa martxan jartzea espero dugu. Proiektua gauzatzeko konpromiso finkoa dugu”, dio Uribek.

Aperribaiko igogailuei dagokienez, lehenengo biak jarriko dituzte aurten: lehenengo igogailuak Aperribaiko sarbidea eta Osakidetzako kontsultategia lotuko ditu eta bigarrenak kontsultategia eta frontoi ondoko etxebizitzak. N-634 errepideko biribilguneak Donostiarako bidea erraztuko du -Bengoetxeraino joatea ekidingo du- eta Zuhatzurekin eta Formica zegoen eremuarekin lotzeko aukera emango du. Eta azkenik, Andraenea Emakumeen Etxea Agirre Lehendakaria plazan eraikitzeko faseari ekingo diote aurten, Haurreskola berriarekin paraleloki. Azken hiru proiektu hauek dagoeneko kontratazio fasean daude eta aurreikuspenen arabera, datozen hilabeteetan abiatuko dituzte obrak.

Auzoetan hobekuntzak

Inbertsioen beste zati bat auzoetan hobekuntzak egiteko bideratuko dute. Guztira 1,8 milioi euro: Tximiolarren haurrentzako ekipamendua (42.000 euro); Usansolon Meatzetako ikastetxeko parkean jolas berriak jartzea (25.000 euro) eta Iturritxu Ludotekako kanpoaldea egokitzea (25.000 euro); Gorosibain parke bio-osasungarria eraikitzea (43.000 euro); Bengoetxen Kultura eta Kirol Zentroaren proiektuaren erredakzioa egitea (60.000 euro); Urreta eta Urtebieta auzoetara zabor-bilketaren sare pneumatikoa hedapena (192.000 euro) eta Aperribaiko igogailuak (1.495.708 euro).

Era berean, beste esku-hartzeak izango dira Zuhautzuko futbol zelaian aldagelak berregokitzea (55.000 euro), Egia ikastetxean jolastokiko estalkia aldatzea (172.000 euro), asfaltatzeak (150.000 euro), argiteria publikoa aldatzea (75.000 euro) edota Smart City azterketa egitea (15.000 euro).

Oposizioaren zuzenketak

Galdakaoko udal gobernu taldearen aurrekontu proiektuari zuzenketak aurkeztu dizkiete oposizioko taldeek. Guztira 70 emendakin baino gehiago aurkeztu dituzte EH Bildu, Galdakao Orain, Galdakao Bizirik eta PP alderdien artean.

EH Bilduk hiru emendakin proposatu ditu: autobus geltoki guztietan markesinak jartzea, Galdakaon alokairu sozialeko 200 etxebizitzen poltsa sortzeko azterlana egin, eta Bizkai kalean gorakako aparkalekua eraikitzea. Bestetik, Galdakao Orain eta Galdakao Bizirik udaltaldeek elkarrekin 63 zuzenketa aurkeztu dituzte. Tartean, nabarmentzekoak dira: eskola materiala erosteko laguntzak ematea, alokairu sozialerako plana egitea, musika taldeentzako entsaiatzeko lokalak erraztea, auzoen arteko autobusa, puntu beltzen azterketa egitea, zebrabideen irisgarritasuna hobetzea, migratzaileei zuzendutako bulegoa irekitzea, edota Maximo Moreno parkea hobetzea. Eta PPk 9 emendakin aurkeztu ditu. Besteak beste, gazteen emantzipazioa errazteko alokatzeko diru-laguntzak ematea, edota pertsona helduei katering soziala etxez etxez banatzea eta zerga baxuak kentzea proposatzen du. Usansolo Herriak ez du emendakinik aurkeztu.

Aurrekontu proiektua otsaileko osoko bilkuran eztabaidatu eta onartuko dute, EAJ eta PSEren aldeko botoekin.

☉ Galdakao

Metroko tunelak egiteko zulatze-lanak Aste Santua ostean hasiko dituzte Galdakaon

|

Suhiltzaileen eraikina zena eraitsiko dute eta tunelak egiteko makina bat bertan hasiko da lanean // Geuria

Metroaren 5. Linea eraikitzeko lanak hasi dituzte Basaurin, Galdakaon eta Usansolon. Momentuz langileak lurra aztertzen eta prestaketa lanak egiten ari dira. Usansoloren kasuan, Puentelatorre Bidea erabat itxita egongo da lau urtez ibilgailuentzat eta oinezkoentzat, “Puentelatorre zubitik Unkinara arteko tartean”.

Galdakaon, tunelak egiteko lanak Aste Santuan hasiko dituztela adierazi du Udalak: “Orduan hasiko dira lurra zulatzen, bideak ixten eta kamioien joan-etorria handitzen”.

Hain zuzen ere, suhiltzaileen eraikina zenaren ondoan, Lapurdiko aparkalekuan eta Agirre Lehendakaria plazaren inguruan, Bengoetxeko Ostalaritza Eskolaren atzealdean, eta Olabarrietan izango du eragina obrak.

Suhiltzaileen eraikina zegoen gunea izango da lanerako eremu handietako bat, “baina, kasu honetan, ez du eragin handirik izango herritarrengan”, diote udal ordezkariek. Hasteko suhiltzaileen eraikina zena eraitsiko dute, eta tunelak egiteko makina bat bertan hasiko da lanean, “Usansoloko makinak egindako zuloarekin bat egin arte”.

Galdakao erdigunean, Lapurdiko aparkalekuan eragina izango dute lanek, eta baita Agirre Lehendakaria plazaren inguruan Metroak izango dituen bi sarreren guneetan ere: plazan bertan haurreskola ondoan, eta Euskadi kaleko etxe berrien ondoan.

“Eragin handiena, halere, Bengoetxen izango da. Metroak Ostalaritza Eskolaren atzealdean geltokia izango du eta beraz, eraikitze lanak nabarituko dira. Baita hortik gertu, Sixta Barrenetxea ondoko aparkalekuan ere, lanek irauten duten artean bertan egongo baitira obren beharretarako kasetak. Lurra ateratzea eta kamioien joan-etorria etengabea izango da inguru horretan zulatze lanak hasten direnean. Errail bat moztu egingo da kamioiak N-634tik sartu eta irten daitezen, herrira sartu barik, eta horrek asko txikituko ditu kalteak”, diote udal ordezkariek.

Aperribaiko geltokia Olabarrietan egongo da. Lanak egiten diren bitartean N-634 errepidera zuzenean joateko bidea moztuta egongo da eta oinezkoek altueran jarritako pasabide bat izango dute autobus geltokira joateko.

Osorik irakurri

☉ Galdakao

Aperribai / Korrika 23 / 2024

|

Aperribaitik agurtu dute 23. Korrika Galdakaon. Hauek furgonetatik atera dituzten argazkiak:

Osorik irakurri

☉ Galdakao

Galdakao / Korrika 23 / 2024

|

Usansolotik galdakaora iritsi da 23. Korrika. Jendetza batu da lekukoari ongi etorria emateko eta hainbat argazki publikatu ditugu GEURIAn. Eta hauek furgonetatik atera dituzten argazkiak:

Osorik irakurri

☉ Galdakao

Argazkiak / Galdakaon jendetza batu da 23. Korrikari ongi etorria emateko

|

Usansolok lekukoa eman dio Galdakaori 23. Korrika. Euskararen aldeko lasterketa iritsi artean bertan izan gara!

Osorik irakurri

☉ Galdakao

Argazkiak / Korrika Txikiak Galdakaoko kaleak hartu ditu zirrara betean

Korrika Txikia egin dute gaur goizean Galdakaon Urreta, Aperribai, Gandasegi eta Eguzkibegiko ikasleek

|

23. Korrikak hasi du bere bidea Euskal Herrian. Bigarren egun honetan Iparralden jarraitzen du lekukoak eta Nafarroara igaroko da arratsaldean. Bitartean, Hego Uribe eskualdean, euskararen aldeko lasterketa erraldoiarekin bat egiteko ekimenak antolatu dituzte. Gaur goizean Korrika Txikia egin dute Galdakaoko Urreta, Aperribai, Gandasegi eta Eguzkibegiko ikasleek, eta hauek GEURIAn jaso ditugun irudiak:

 

Ver esta publicación en Instagram

 

Una publicación compartida de Geuria (@geuria.eus)

Osorik irakurri