☉ Galdakao
Iskander Sagarminaga: “Mantxako kanala zeharkatzeko erronka atzeratu behar izan dut, Ingalaterran ezarri dituzten neurriengatik”
Aste honetan burutu behar zuen Mantxako kanala igerian zeharkatzeko erronka, baina Ingalaterran ezarri dituzten neurri berriengatik, ezin izan du bertara bidaiatu.
Mantxako kanala zeharkatzeko asmoa du Iskander Sagarminaga igerilariak (Galdakao, 1983). Aste honetan burutu behar zuen erronka, baina Ingalaterran ezarri dituzten neurri berriengatik (15 eguneko koarentena bete behar dute bertara doazenek), ezin izan du bertara bidaiatu.
Mantxako kanala zeharkatzeko asmoa duzu. Ideia zelan otu zitzaizun?
Mantxako kanala berez distantzia luzeetako zeharkaldietan froga esanguratsuena da. Gogorrenetarikoa eta erronka oso handia. Umetan izan nuen honen berri, eskolako liburu batean irakurri eta erronkak liluratu ninduen. Orain dela bost urte igerian eta itsas zeharkaldiak egiten hasi nintzenean Mantxako kanala egiteko gogoa piztu zitzaidan.
Aste honetan egin behar zenuen zeharkaldia, baina bertan behera utzi behar izan duzue.
Hala da. Aste honetan egiteko asmoa geneukan, baina Ingalaterran ezarri dituzten azken aldaketak direla eta, ezin gara bertara joan. Dena geneukan prest bertara atzo bidaiatzeko baina larunbat gauean berrogeialdia ezarri zuten, Ingalaterran 14 egun etxetik irten barik. Ordu batzuengatik ez genuen bidaiatu. Itxaroten gaude ea noiz biadaiatu ahal den.
Erronka burutuko duzun eguna, zeren arabera erabakitzen da?
Erronka egiteko astebete egoten da, marea hilen arabera, zazpi egun tarte horretan, zure alboan doan barkuko kapitainak erabakitzen du noiz irten behar den. Berak, haizea, korronteak, olatuak, eguraldia eta abar izaten ditu kontuan. Baliteke aste guztia bertan egotea eta ezin irten izatea.
13 ordu inguru egingo dituzu igerian, gainera, neopreno barik.
Neopreno barik egitea derrigorrezkoa da. Tradizioa da, lehenengo biderrez zeharkatu zeneko baldintza berdinak bete behar ditugu. Neoprenoa laguntza handia da hotza kentzeko, flotagarritasuna gehitzeko eta abiadura emateko. Beraz, erronka ez zen berdina izango.
Zein tenperaturatan egoten da Mantxako kanaleko ura?
Uztaila amaieran 17 gradu ingurutan egoten da, hainbeste ordu egoteko gorputza hotzera egokitu behar da.
Eta gorputza egokitzeko, zelan prestatu zara?
Entrenamentuak batez ere itsasoan egin ditut, Ur Irekiak Galea taldearekin. Neguan neopreno barik ibili naiz, 10-11 graduko uretan. Gero igerilekuan, Galdakaoko igeriketa taldeko gazteekin ibili naiz ahal izan dudanean, baita Andrea de la Hera herrikidearekin ere. Andrearekin itsasoan zein igerilekuan ibili naiz entrenatzen.
Aurten Iker Lopez Torre, Kirolene-ko lankideak indarrezko ariketa berezi batzuk ipini dizkit. Arlo horretan erreferente bat da Iker. Makina espezifiko batzuk behar nituen eta Galdakaoko Elexalde Zentruan bazeuzkaten, beraz aurten aspaldiko partez indarra landu dut. Gogor gainera.
Ur Irekiak Galea taldearekin entrenamenduak egin ditu Iskanderrek // Iskander Sagarminaga
Psikologikoki ere gogorra izango da.
Psikologikoki badakit gogorra izango dela, sufrituko dudala, baina badakit horretaz gozatzen. Asko disfrutatzen dut itsasoaz eta igeri egiteaz, beraz momentuaz gozatzen dut eta ez dut zenbat falta den eta zer etorriko denataz asko pentsatzen. Egiten bada bikain eta ezin bada, ba beste batean ahalegintzen da eta listo.
Noiz hasi zinen entrenamenduekin?
Bereziki aurten egiteko ez dut prestatu, baina bai hasita nuela gerorako begira prestakuntza. 2021 edo 2022-an egiteko. Uste baino hobeto egokitu naiz hotzera, distantzia luzeko hainbat itsas-zeharkaldi egin ditut, gainera, taldekide bik (Jose Ramon Sanz eta David Ryan) Kanala zeharkatu zuten. Hauek aurten egitera animatu eta lagundu didate, gainera Jose Ramon Sanz barkuan laguntza moduan etorrika da, Eider Eibar ilustratzailearekin batera.
Eiderrek esperientzia honen ilustrazio batzuk egingo ditu bidaia eta erronkari buruz eta kokoak.eus webgunean ikusgai egongo dira. Bidaiaren eguneroko grafiko bat izango da. Kokoak Eiderrek eta biok sortu dugun proiektu personala da eta bertan gure lanak erakusten ditugu.
Williams sindromeari ikusgarritasuna eman nahi diozu zeharkaldi honekin.
Bai, lagun bat dut, Igor, eta horregatik erabaki genuen Williams sindromeari ikusgarritasuna ematea. Jaiotzen diren 20.000 umeetatik batek izaten du sindromea, zazpigarren kromosoman material genetikoa galdu delako. Oso hurbilekoak eta irekiak dira normalean, fisikoki ebakuntzaz konpontzen den bihotzeko berezitasuna da aipagarriena. Ea erronka honekin lortzen dugun zeozer gehiago Williams sindromea ezagutaraztea.
Koronabirusaren pandemiak zure prestaketan eraginik izan du?
Egia esan, orain inoiz baino hobeto nagoela uste dut. Konfinamenduan hainbat igerilarik Zoom bitartez indarrezko ariketak burutzen genituen eta indarra ondo landu dugu eta aktibo mantendu gara. Gero itsasora joan ahal ginenetik ez naiz gelditu igeri egiteaz. Lehenengo eguneko sentsazioak arraroak ziren, baina hirugarren egunerako ondo ikusi nuen nire burua eta lankide batekin, bera Paddle-ean eta ni igerian, Lekeitio-Ogella-Lekeitio egin nuen 10 kilometro baino gehiago, oso erritmo onean eta sentsazio onekin. Etxean ariketak egiteak ondo mantendu nau. Kirol maila ez profesionalean ez dut uste bi hilabete hauek min handiegia egin dutenik. Etxean aktibo mantendu bazara, noski.
☉ Galdakao
Herritarrek identifikatutako beharrei modu kolektiboan erantzuteko sarea eratu dute Galdakaon
Zaintza modu kolektiboan erdigunean jartzeko Zeugaz izeneko foro soziosanitarioa martxan jarri dute Galdakaon
Galdakao Zeugaz foro soziosanitarioa aurkeztu dute gaur herrian. Ekimenaren helburua da zaintza erdigunean jartzea eta herritarren ongizatea bilatzea, elkarzaintza oinarri hartuta. Eta horretarako, ekintza komunitarioak bultzatuko dituzte.
“Ekimenak zaintzaren eredua eraldatzea eta ongizatearen eredu ezberdin bat sustatzea du helburu, herritarren parte hartzea, eragileen arteko lankidetza eta zaintza ardatz gisa balioan jarriz”, dio Edurne Espilla Galdakaoko jarduneko alkateak.
Zentzu horretan, herritarrek identifikatutako beharrei erantzuna eman nahi diote ekintza komunitarioen bidez: “Gauza txikietatik, indibidualismotik, kolektibotasunera”, dio Amets Iturbe Gizarte Ekintzako eta Berdintasunerako zinegotziak.
“Elkarri entzuteko eta elkarrekin ongizate arloan ditugun beharrei eta nahiei erantzun bateratua emateko espazioa da Galdakao Zeugaz”, dio Iturbek, eta zeregin horretan dinamika berritzailea abian jarri dutela adierazi du: “Herria eraldatzeko dinamika berritzailea jarri dugu martxan eta zaintza inoiz baino gehiago erdigunean jarri dugu”, dio Iturbek.
Eginkizunak eta erronkak
Proiektu honetan elkarlanean ari dira Udala eta Agirre Lehendakaria Center (ALC), herriko eragileekin batera.
ALCk gizarte-berrikuntzako prozesuak sustatzen ditu, sare komunitarioak, erakunde publikoak eta enpresak lotzen dituen lurralde-ikuspegiarekin. “Galdakaon harreman oso bereziak zeuden kolektibo desberdinen artean gu etorri baino lehen, baina bakoitzak modu isolatuan lan egiten zuten. Gure lana izan da herrian egiten diren hainbat ekimen sistematizatzea eta perspektiba komunitarioa indartzea”, dio Gorka Espiau Agirre Lehendakaria Centerreko zuzendariak.
“Talde sendoa eratu dugu, helburu komun batekin: Galdakaon denok eroso, osasuntsu, oparo eta ondo bizitzea”, esan du Espillak, eta gaineratu du: “Aukerak biderkatu egingo dira: batzuek ezagutza eskainiko dute, beste batzuek esperientzia, hurbiltasuna eta herritarrekin harreman zuzena”.
Galdakao Zeugaz proiektuko talde motorra honakoek osatzen dute: Etxez etxeko laguntza zerbitzuko langileak, Adinekoen Dinamizazio Zerbitzua, Erabide Emakume Elkartea, Kabia, herriko hainbat farmazia, Udaleko hainbat arlo, guraso elkarteak, pertsona nagusien elkarteak, EISE Zerbitzu Psikosoziala, Osakidetza, Caritas eta hainbat norbanako, hala nola, Kepa Lizarraga.
Talde motorra martxoan bildu zen lehenbizikoz, eta lehen eginkizuna mapeo bat egitea izan zen, Agirre Lehendakaria Centerrek bultzatuta.
Herritarrekin elkarrizketak egin zituzten euren beharrak ezagutzeko. “Entzute prozesua indartu genuen, zer egin behar genuen eta zergatik zehazteko”, dio Espiauk: “Prozesu oso dinamikoa izan zen”.
Eta, elkarrizketak egin eta herritarrak entzun ostean, hurrengo urratsa da ekimen berriak martxan jartzea era kolektibo batean.
Naroa Azurmendi Galdakaoko Udaleko Adineko Dinamizazio Zerbitzuko langilea da eta nabarmendu du “ehunka” proiektu eta erakunde daudela herrian. “Zeugazen lehenengo erronka izan da dagoeneko martxan dauden proiektu horiek eta elkarte eta erakundeak koordinatzea. Eta oraindik ere lanean ari gara arlo horretan”.
“Askotan modu isolatuan lan egiten dute herriko elkarte eta erakundeek eta proiektu honen helburua da denon artean lan egitea kolektibotasunaren mesedetan”, dio Azurmendik. Eta bide horretan, beste erronka bat dutela adierazi du: “Herritarrei informazio guztia helaraztea”.
Leyre Olabarrieta Osakidetzako medikua da eta talde motorreko parte ere bada: “Oso pozik gaude proiektu hau sortu delako. Izan ere, irtenbideak bilatzeko eta gure existentziari zentzua bilatzeko eratu da. Arazo, beldur eta sentimendu askori erantzuna emango die”.
Galdakao Zeugaz proiektuaren barruan Death Kafeak aipatu ditu Olabarrietak. Heriotzaren inguruan berba egiteko taldeak dira, eta Galdakaon dagoeneko talde bat eratu dute. Hileko azken ostegunetan batzen dira. “Talde bakarra dago Galdakaon, baina herritar gehiagok izena eman nahiko balu, talde gehiago sor ditzakegu”, dio Olabarrietak.
Eta, abenduan beste jarduera bat antolatuko du Galdakao Zeugaz proiektuko taldeak: ‘La silla vacia’ hitzaldia. “Doluaren ingurukoa izango da hitzaldia. Gabonak ate joka, gure etxeko mahaietan aulki bat hutsik egongo da, hil egin den gure senitartekoak betetzen zuena. Angel Pascual psikologoak eskainiko du hitzaldia”. Abenduaren 9an, asteartez, izango da hitzaldia Gandasegi ikastetxean 18:30ean.
Galdakao Zeugaz “garrantzia handiko” proiektua dela nabarmendu du Edurne Espilla jarduneko alkateak eta herriko kolektiboen ekarpena eskertu eta aitortu du.
Euskal selekzioaren eta Palestinaren arteko lagunartekoa jokatuko dute gaur San Mamesen. Hori aitzakia hartuta, Zizpak elkartasun ekintza antolatu du Galdakaon: eskailera margoketa. Malen Agirre Espilla zizpakidearekin berba egin genuen atzo ekintza honen inguruan.
☉ Galdakao
Galdakaoko PSEk ez du 2026ko aurrekontua negoziatuko, “2025eko proposamen gehienak bete gabe dauden bitartean”
Aurrekontua negoziatzeari uko egin dioten arren, emendakinak aurkeztuko dituztela esan dute alderdi sozialistako ordezkariek
Galdakaoko Udalak oraindik ez du 2026ko aurrekontua onartu, baina PSEk dagoeneko aurreratu du ez duela negoziaziorik egingo gobernu taldearekin.
Arrazoia, honakoa: “Udal Talde Sozialistaren aldetik ezinbestekotzat jotzen dugu, 2026ko aurrekontuari buruzko edozein elkarrizketa eduki baino lehen, gobernu taldeak 2025eko aurrekontuan sartzea onartu zituen gure taldearen proposamenen egoeraren buruzko informazioa ematea”, diote talde sozialistatik.
“Ez zaigu oso serioa iruditzen 2026ko aurrekonturako proposamen berriei buruzko eztabaida hasteko planteamendua bultzatzea, 2025eko proposamen gehienak bete gabe dauden bitartean”, diote.
Eta adibideak eman dituzte: “Galdabusari buruzko edo negoziazioa azterlana, Ibaizabalen inguruko jarduketak, Maximo Moreno parkea eraberritu eta egokitzea edo Elexaldeko igerilekuak estaltzeko proiektua”.
“Beraz, jakinarazi nahi dugu ez dugula aurrekontu-negoziaziorik egingo Gobernuarekin, aurrez aipatutako gaiak konpontzen ez diren bitartean”, diote.
Negoziazioa ez, emendakinak bai
Alderdi sozialistako zinegotziek aurrekontua negoziatzeari uko egin dioten arren, emendakinak aurkeztuko dituztela esan dute.
“Bidezkotzat jotzen ditugun enmendakinak ohiko bideetatik erregistratuko ditugu, udalerriaren onerako zuzenketa horiek herritarrei ekar diezazkiekeen onuren arabera baloratuko direlakoan, eta ez jarrera errebantxisten, interes alderdikoien edo kontakizun politikoaren beharren arabera”, diote.
☉ Galdakao
Eskailera margoketa egingo dute gaur Galdakaon, Euskal Selekzioren eta Palestinaren arteko partidaren atarian
Ekintza Zizpa Gazte Konpartsak antolatu du: irekia da eta Iturrondo plazan izango da
Euskal Selekzioaren eta Palestinaren arteko futbol partida jokatuko da bihar, azaroak 15, San Mamesen.
Eta, partida horren atarian, Galdakaon, elkartasun ekitalkia antolatu du Zizpa Gazte Konpartsak gaur, azaroak 14, ostiralez.
Eskailera margoketa irekia antolatu dute Iturrondo plazan 17:00etatik aurrera.
“Herrialde askeen aldeko elkartasun keinua egin nahi dugu. Bi herri, borroka bakarra”, diote.
☉ Galdakao
Ganguren Mendi Taldeak hamaika ekitaldi antolatu ditu Galdakaon bere sorreraren 80. urteurrenean
Ekitaldi nagusia abenduaren 4an izango da, baina azaroan Mendi Astearen barruan erakusketa, dokumentalak eta hitzaldiak antolatu dituzte
Ganguren Mendi Taldeak 80 urte bete ditu aurten, eta azaroa eta abendua bitartean ekintza bereziak antolatuko dituzte.
Ekitaldi nagusia abenduaren 4an izango da. ‘Iragana bihotzean, etorkizuna bidean’ lelopean, topaketa egingi dute Torrezabal Kultur Etxean (19:00).
Topaketa horretan, iraganeko pasadizoak gogoratuko dituzte, oraina ospatuko dute eta etorkizunera begiratuko dute.
“Topaketa xumea baina sentitua izango da. Bertan, klubaren azken 30 urteak laburbiltzen dituzten liburua eta bideoa aurkeztuko ditugu, eta ekitaldia mokatu baten bueltan bukatuko da”, diote.
Mendi Astea
Bestetik, ekitaldia nagusia baino lehen, Mendi Astea antolatuko dute.
Erakusketak, proiekzioak eta hitzaldiak eskainiko dituzte, mendizaletasunaren arloan aditu diren profesionalen parte hartzea barne.
Pou anaiek, Txomin Uriartek, Elixabete Arbek, Joanna Maluendak eta Bego Gonzalezek hartuko dute parte jardunaldietan.
Hona hemen Mendi Asteko egitaraua:
Azaroak 3-28
Erakusketa Ganguren MTren egoitzan: ‘Everesterako lehen euskal espedizioa’
11:30-22:00
Azaroak 13, osteguna
MendiTour Mendi Film zirkuitua: ‘Hiru Haundiak. Taupadak eta Gailurrak’ eta ‘Of a Lifetime’ film luzeak eta ‘Red Rock Revolution’ film laburra
19:00 Torrezabal
Azaroak 20, osteguna
Dokumentala eta hitzaldia: GR11 ibilbidea. Elixabete Arbe, Joana Maluenda eta Bego Gonzalez
19:30 Ganguren MTren egoitza
Azaroak 29, larunbata
Dokumentala eta hitzaldia: ‘Bizitzari sokaz lotuta’. Eneko eta Iker Pou anaiak
19:00 Torrezabal
San Esteban etorbideko obrak faseka egingo dituzte Etxebarrin eta aldi baterako murrizketak iragarri ditu Udalak
Udaltzaingoaren egoera konpontzeko negoziatzeko prest agertu da Basauriko Udala
Emakume bat harrapatuta geratu da Basauriko etxebizitza batean
Argazkiak | Basauriko bi bizilagunen etxegabetzea eta herritarren elkarretaratzea, argazkitan
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
Bideoa | “Euskal selekzioa-Palestina partida aitzaki, gure kaleak aldarriz bete ditugu”
Bideoa | El Kangri: «Egiten dudan rap-ak nire bizitza du oinarri, inor kaltetzeko asmorik gabe»
