☉ Galdakao
Maxameko langileek Udaleko ordezkariekin “aldian behin” bilerak izatea eskatu dute
Eusko legebiltzarreko eta Espainiako parlamentuko zenbait alderdiekin ere elkartu dira Maxam taldeko langileak. Bestetik, hitzarmen berria berretsi dute Estatu osoan.
“Barealdi tirabiratsuan” bizi dira Maxameko langileak. Hala adierazi diote GEURIAri Zuhatzuko langileek. “Badakigu zerbait etortzekoa dela, baina oraindik ez dakigu zer. Badakigu Maxam Outdoorsen salmenta aurrera doala, eta salmentarako sortutako enpresa bat eratu dutela: Sofiam Ibérica”, diote Zuhatzuko langileen ordezkari sindikalek. Kaleratzeen inguruan galdetuta, ziurgabetasuna oraindik nagusi dela diote: “Ez dakigu kaleratzerik egongo den ezta zenbat izango liratekeen. Gure zentroari dagokionez, eta Outdoorsen plantillak beste lantoki batzuetan duen xurgapen-gaitasunari dagokionez, zuzendaritzak ziurtatu du birkokatzeak egingo dituela, eta birkokatze horiek errenta-planari heltzen dion jendearen araberakoa izango dela. Hala ere, ez dakigu zenbat langile birkokatu ditzaketen Zuhatzuko lantegiko beste atal batzuetan”.
Zuzendaritzak borondatezko errenta-plan bat bultzatu nahi du, baldintza hauekin: planean sartzen den pertsonaren lanpostua amortizatuta egotea; gutxienez 60 urte izatea 2020ko abenduaren 31n; enpresan 13 urteko antzinatasuna izatea 2020ko abenduaren 31n; Outdoors-a Galdakaoko fabrikan baino ez litzateke aplikatuko, salbu eta Iruñeko salmenta egiten ez bada (orduan ere aplikatuko litzaieke); eta ez du eraginik izango 64 urtetik gorako langileengan. Errenta-plan horren arabera, 60 eta 61 urte bitartekoek soldata finko garbiaren % 70eko bermea izango lukete, aldagairik gabe, arrisku-plusa izan ezik, 64 urtera arte, gehi Gizarte Segurantzarekiko hitzarmen bereziaren zenbatekoa adin horretara arte; 61 eta 62 urte bitartekoek soldata finko garbiaren % 75eko bermea izango lukete, aldagairik gabe, arrisku-plusa izan ezik, 64 urtera arte, gehi Gizarte Segurantzarekiko hitzarmen bereziaren zenbatekoa adin horretara arte; eta 62 eta 64 urte bitartekoek soldata finko garbiaren % 80ko bermea izango lukete, aldagairik gabe, arrisku-plusa izan ezik, 65 urtera arte, gehi Gizarte Segurantzarekiko hitzarmen bereziaren zenbatekoa adin horretara arte.
Borondatezko errenta-planari heltzeko epea gaur arte, otsailak 8, iraungo du: “Konpainia osoan 40 pertsona inguruk betetzen dituzte errenta-planean sartzeko hasierako baldintzak eta Galdakaon 15 bat langilek. Otsaila erdialdera datu zehatzak izango ditugu eta horien arabera zalantzak luzatuko dizkiogu zuzendaritzari”. Hala nola, Galdakaon jarraituko duen negozio unitatean eta beste zentro batzuetan egindako birkokatze-kopurua, adostutako irteerak, errenta-plana handitzea edo Galdakaoko zentrorako beste formula batzuk.
Zuhatzuko langileek bilera izan dute jada Iñigo Hernando Galdakaoko alkatearekin eta udal gobernu taldearekin, eta asmoa agertu dute “aldian behin” eurekin elkartzeko: “Gure asmoa da Udalean dauden alderdi guztiekin elkartzea”. Era berean, Eusko Legebiltzarrean eta Espainiako Parlamentuan ordezkaritza duten Podemos eta EH Bildu alderdiekin batuko dira Maxam taldeko langileak.
Hitzarmena onartzea
Nahitaezko erretiroa; hitzarmenaren iraupena 2021eko abenduaren 31ra arte (2020an hitzarmenik gabe zeuden, horregatik V. Hitzarmena 2020koa eta 2021ekoa da); hitzarmena indarrean dagoen bitartean soldata igoerarik edo murrizketarik ez egotea; lanaldia mantentzea; edota enpleguaren egonkortasuna eta lantegien etorkizuna sustatzera bideratutako neurriak, enplegu-bolumena zentro bakoitzaren arazora egokitzea (erretiroak, irteera pizgarriak, lekualdatzeak). Aurreakordio hori lortu dute Maxam enpresako zuzendaritzak eta CCOO eta UGT sindikatuek Espainia osoko lantegietarako.
Urtarrilaren 7an enpresaren bosgarren hitzarmenaren negoziazioei berrekin zioten eta zuzendaritzaren eta ekintza sindikalaren arteko aurreakordioa lortu zuten. Ondoren, langileek izan dute hitza. Maxameko zentro guztiek berretsi dute aurreakordioa, eta Galdakaoko lantegiaren kasuan, jasotako 292 botoetatik 197 langilek hitzarmenaren alde bozkatu dute, 93k kontran eta bik boto zuria eman dute. “459 langileko erroldatik, akordioa berretsi egin da Zuhatzuko zentroan, botoen % 67,46 lortuta”, diote Zuhatzuko ekintza sindikal nagusietako ordezkariek (UGT eta CCOO): “Gure lehentasuna enpleguak mantentzea eta hitzarmena ixtea izan da, betiere gure eskubideak eta lan-baldintzak murriztu gabe”.
☉ Galdakao
Fernando Izagirre DYAko presidente izandakoaren aurkako epaiketa bihar hasiko da
Fiskaltzak zazpi urteko kartzela-zigorra eskatu du Izagirrerentzat: 4 urte eta erdi administrazio desleialeko delitu jarraituengatik eta 2 urte eta erdi dokumentuak faltsutzeagatik
DYAko presidente izan zen garaian (2016-2021) ustez egindako irregulartasunengatik ikerketapean egon da Fernando Izagirre galdakoztarra.
Ikerketa 2022an hasi zuten eta, hiru urte ostean, bihar hasiko da epaiketa.
Fiskaltzak zazpi urteko kartzela-zigorra eskatu du Izagirrerentzat: 4 urte eta erdi administrazio desleialeko delitu jarraituengatik eta 2 urte eta erdi DYAren egoera ekonomikoa islatu behar zuten dokumentuak faltsutzeagatik.
Izagirrez gain, Juan Diego Gallardo bere bazkidea ere epaituko dute. Gallardorentzat 4 urteko kartzela-zigorra eskatu du Fiskaltzak.
Era berean, bi inputatuek DYAri 4,75 milioi euro baino gehiagoko kalte-ordaina ematea eskatu du Fiskaltzak. Eta akusatuen “bizibideak” eta “ondasunak” ikertzeko agindu dio Poliziari, etorkizunean gerta daitezkeen enbargoei begira, kondena bete behar badute.
Ikerketa 2022tik
DYAko zuzendaritza batzorde berriak salaketa jarri zuen 2022an, barne-auditoria batek alarmak piztu ondoren. Zehazki, “gauza arraro askorerekin” egin zuten topo auditorian, besteak beste, “diru txartelen erabilera okerra”.
Salaketa publiko egin eta Izagirrek Eusko Jaurlaritzako Larrialdietako zuzendari karguari eta Galdakaoko Udaleko EAJren bozeramailetzari uko egin zuen.
1986an hasi zen boluntario gisa Izagirre DYAn eta 2016an izendatu zuten presidente. 2021ean kargua utzi zuen Larrialdiei Aurre Egiteko eta Meteorologiako zuzendaritza hartu ondoren.
☉ Galdakao
Gizon bat espetxeratu dute Galdakaon bere lehengusina adingabeari sexu abusu jarraituak egiteagatik
Gizona, 50 urtekoa, Basauriko espetxean sartu dute. Sei urteko zigorra ezarri diote adingabeari sexu-abusu jarraitua egiteagatik 2016tik 2020ra bitartean
Gizon bat espetxeratu dute Galdakaon bere lehengusina adingabeari sexu abusu jarraituak egiteagatik.
El Correo egunkariak publikatu duenaren arabera, gizona, 50 urtekoa (G.Y.I.), Basauriko espetxean sartu zuten urriaren 17an. Bizkaiko Auzitegiak 2022an ezarri zion espetxe zigorra, baina kondenatuak epai bakoitza errekurrituz joan da azken instantziara iritsi arte, Auzitegi Gorenera, hain zuzen.
Sei urteko zigorra ezarri diote adingabeari sexu-abusu jarraitua egiteagatik 2016tik 2020ra bitartean, haurrak 8 eta 12 urte artean zituenean. Kondenatuak 42 urte zituen sexu abusuekin hasi zenean.
Gertaerak biktimaren amak aurkitutako gutun batzuen bitartez azaleratu ziren.
Lehen sententziak adierazten duenez, “musuak ahoan eman ohi zizkion eta ipurdia ukitzen zion”. Gainera, “zakila praken gainetik ukitzeko eskatzen zion eta bideo pornografikoak erakusten zizkion”.
Era berean, gizonaren mugikorrean haurren argazki sexualak aurkitu zituzten, eta adingabearen deklarazioaz gain, froga nagusietako bat izan zen adingabeari bideo bat grabatu ziola, zinta batean biluzik korrika, kamerak genitalak fokatzen zituela.
Epaiketan gizonak alegatu zuen bere jarduerek ez zutela “konnotazio sexualik”, eta “zaintzaile rola nahastu” zuela.
“Xanduli-manduli kirrikiki, eman goxokiak guri!”. Horrela ospatu dute Gau Beltza Galdakaon. Aurten elkarlanean antolatu dute arimen gaua Eguzkibegi Ikastolako eta Gandasegi eta Urreta ikastetxeetako gurasoek, Udalarekin lankidetzan. Ikusi hemen argazkiak!
☉ Galdakao
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
Gau Beltza ospatzen ari dira Galdakaon. Aurten lehen aldiz elkarlanean aritu dira Eguzkibegi, Gandasegi eta Urreta ikastetxeetako gurasoak eta hamaika ekintza antolatu dituzte: aurpegi margoketa, tailerrak, antzerkia, edabe magikoa, gaztain erreak, taloak eta edariak.
☉ Galdakao
Galdakaoko bilketa pneumatikoko langileek grebari amaiera eman diote akordioa lortu ostean
Zortzi hilabete zeramatzaten greba mugagabean. Akordioari esker, besteak beste, % 40ko igoera lortu dute soldatan
Galdakao, Barakaldo eta Laudioko hondakinen bilketa pneumatikoko langileek greba mugagabeari amaiera eman diote, euren baldintzak hobetzeko akordio bat lortu eta gero.
Akordioaren arabera, Envac Iberia enpresak % 40ko igoera izango dute soldatan 16 langileek.
“Lau urtean 530 euroko plus finko eta xurgaezina kobratzera iristiko da plantilla osoarentzat: 150 euro aurten, 260 euro 2026an, 395 euro 2027an eta 530 euro 2028an”, zehaztu dute ELA sindikatuko ordezkariek.
Era berean, hobekuntza hauek ere jasotzen ditu hitzarmenak:; urteko lanaldia 200 ordu murriztea (1.789 orduko jardunaldia izatetik 1.591 ordu izatera); txanda-kontraturako eskubidea bermatzea; lan-erreformaren aurkako klausulak onartzea; eguneko 100 euro jasotzea hoditerian sartzeagatik; jaiegunetan eta igandeetan lan egindako orduaren prezioa bikoiztea; batzarretarako urtean ordainpeko 8 ordu; norberaren gauzetarako egun bat (ordaindua); eta lanpostu hutsen bat dagoenean enpresak plantillari eskaintzea lanaldi partzialean daudenei eta aldi baterako kontratuak dituztenei.
“Akordioa posible izan da antolaketa eta borroka sindikalari esker. Sindikatuaren erresistentzia-kutxa funtsezkoa izan da hilabete hauetan guztietan grebari eutsi ahal izateko”, esan dute ELAko ordezkariek.
Zortzi hilabete zeramatzaten greba mugagabean hitzarmen propioa aldarrikatzeko. Orain arte enpresak Ingeniaritzako Estatuko Hitzarmena aplikatzen zuen.
Fernando Izagirre DYAko presidente izandakoaren aurkako epaiketa bihar hasiko da
Gizon bat espetxeratu dute Galdakaon bere lehengusina adingabeari sexu abusu jarraituak egiteagatik
Tailer praktikoak, bideo-foruma eta gastronomia saioak antolatu dituzte Zaratamoko Elexalde eta Arkotxan
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
Argazkiak | Galdakao Gela TEk mendiko aulki egokitua entregatu dio Bizkaiko Mendi Federazioari
Bideoa | Xanduli-manduli kirrikiki… Gau Beltza ospatu dute Galdakaon!
Bideoa | Dozenaka pertsona elkartu dira Arrigorriagan Heidelberg enpresan gertatutako lan-heriotza salatzeko
