→Galdakao

Galdakaoko Mugarriz Mugarri martxek 245 lagunetik gora hartuko dituzte

Galdakaoko Mugarriz Mugarri martxa izango da maiatzaren 22an, igandez. Bi ibilbide izango ditu: 20 eta 50 kilometrokoak.

Maiatzaren 22an izango da Galdakaoko IX. Mugarriz Mugarri // Ganguren Mendi Taldea

Bueltan da Galdakaoko Mugarriz Mugarri martxa. Aurten bederatzigarren edizioa da eta maiatzaren 22an, igandez, izango da. Aurrekoetan bezala bi ibilbidek osatzen dute martxa: ibilbide laburra (19-20 kilometro) —izaera herrikoia— eta ibilbidea luzea (50 kilometro) —Euskal Herriko Mendi Federazioaren ibilbide luzeen egitegiaren barne—. Ibilbideak 8 eta 12 ordu artean betetzekoak dira. 

Bi ibilbideen irteera zein helmuga leku berdinean izango da. Irteera Galdakaoko Ganguren Mendi Taldearen egoitzatik (Gipuzkoa kalea, 11) izango da eta helmuga Kurtzeko plazan. Irteera ordutegiei dagokienez, ibilbide luzeari hasiera emango diote 07:00etan eta ibilbide laburra 08:30ean hasiko da. Ibilbideen nondik norakoak Ganguren Mendi Taldearen webgunean kontsulta daitezke.

Momentuz 246 lagunek eman dute izena Mugarriz Mugarri martxetan: 106 ibilbide laburra egiteko eta 140 ibilbide luzea egiteko. Oraindik zabalik dago izena emateko epea, maiatzaren 21eko 23:59ak arte. Interesdunek izena eman behar dute sportmaniacs.com webgunearen bitartez. Bestela, mugarrizmugarri@gmail.com helbide elektronikora izena emateko orria bidaltzeko aukera dute interesdunek. Gehienez, 350 lagunek eman dezakete izena.

“Ibilbideak oso ondo markatuta daude eta zaila da galtzea”, diote udal ordezakariek. Hala ere, ibilbidean zehar hainbat kontrol puntu ezarri dituzte, “ibilbidean zehar segurtasun maila hoberena bermatzeko”. Kontrol puntu horiek dira: Ganguren Mendi Taldearen egoitza soziala; San Segismundo; Isisi; Kortederra; Artola; Elorritxueta; Jugo; eta frontoia.

Ganguren Mendi Taldeak antolatzen du Mugarriz Mugarri Galdakao martxa. Bi urterik behin antolatzen dute. Azken edizioa, zortzigarrena, 2018an izan zen; hurrengoa 2020an izan behar zuen, baina Covid-19aren pandemiak bertan behera uztea behartu zuen.

Gora

Geuria Laguntzaileak Geuria Laguntzaileak