☉ Galdakao
Galdakaoko Udalekuetan 550 leku eskainiko dituzte eta lehen aldiz jantoki zerbitzua egongo da
Galdakaoko Udalekuetan parte hartzeko izena emateko epea gaur zabaldu du Udalak, apirilaren 27ra arte.
Udalekuak antolatuko dituzte uztailean Galdakaon. Guztira 550 plaza eskainiko dituzte eta orain arte hiru gunetan banatzen ziren ekitaldiak lautan banatuko dira aurten. Aperribain eta Usansolon 4 eta 11 urte arteko umeak batuko dira; Gandasegin 4 eta 7 urteko umeak egongo dira; eta Urretan 8 eta 11 urte bitartekoak. “Aurten pandemiaren eraginak ahalik eta gehien saihestearren erdigunean eremu bitan banatzea egokiago ikusi dugu”, dio Edurne Espilla hizkuntz normalkuntzarako zinegotziak.
Txanda desberdinak eskainiko dituzte Udalekuek: uztaileko lehen hamabostaldia, bigarren hamabostaldia, edo uztailaren 5etik 30era bitartekoa. Gainera, lehen aldiz jantoki zerbitzua eskainiko dute: “Familiek urtatean errepikatu duten eskaerari erantzungo diogu horrela”, dio Espillak. Beste hobekuntza bat izango da harrera zerbitzuaren ordutegia; izan ere, 08:30etik 14:30era egon ahal izango dira umeak udaleku eremuan. “Udalekuak 09:30etik 13:30era izango diren arren, lana eta familia bateragarri egiteko lagungarriak izago diren hautazko zerbitzu bi eskainiko dira. Bata, harrera zerbitzua, goizeko 08:30etik 09:30era izango da eta dohainik eskainiko da hori eskatzen duten familia guztientzat. Bestea, jantoki zerbitzua, eguerdiko 13:30etik 14:30era”, dio Miren Atutxa Euskara teknikariak.
Edurne Espilla eta Miren Atutxa // Galdakaoko Udala
Aurtengo Udalekuetan prezio estandar bat zehaztu du Udalak, “egokia eta neurrizkoa”: hamabostaldi bakoitzean, jantoki barik, prezioa 60 eurokoa izango da, eta jantoki zerbitzuarekin 114 euro; uztailaren 5etik 30era arteko txandan 120 euro (jantoki barik) edo 228 euro (jantokiarekin) ordainduko dira. Hala ere, familien errentan oinarrituta hobari sistema ezarriko du Udalak: % 30, % 50 edo % 85 artean txikitu daitezke kostuak elkarbizitza unitatearen diru-sarreren arabera. “Hobari horien helburua da aukera berdintasuna erraztea, eta horregatik, egoera zaurgarrienean dauden familieek eta errenta baxuena duten familiek % 85erainoko hobaria lortu ahal izango dute. Halaber, lekuen % 5 gordeta egongo da babes berezia merezi duten kolektiboetarako”, diote. Azken kolektibo horien artean daude: gutxienez ere % 33ko desgaitasuna duten haurrak edo ofizialki aitortutako mendetasun-gradua dutenak; Diru-sarrerak Bermatzeko Errenta (DBE) edo Gizarte-larrialdietarako laguntzak (GLL) jasotzen dituzten familietako haurrak; eta genero indarkeria jasan izana familian edota gizartebazterkeria jasateko arriskuan dauden haurrak.
Galdakaoko Udalekuetan parte hartzeko izena emateko epea gaur zabaldu du Udalak, apirilaren 27ra arte. Interesdunek udal webgunetik (hemen sakatuta) eman beharko dute izena, baina horretarako laguntza behar dutenek 944 010 540 telefono zenbakira (Euskara arloa) deitu dezake. Onartutako behin-behineko zerrenda maiatzaren 7an argitaratuko dute. “Izen emate gehiagi egonez gero, zozketa egingo genuke maiatzaren 14an Udaleko Osoko Bilkura aretoan, 17:30ean”, diote udal ordezkariek. Onartutakoen behin betiko zerrendak webgunean argitaratuko dituzte.
Galdakaoko Elkarlaguntza Sarearen barruan Erosketa Kolektiboak talde dinamika sortu zuten duela bost urte.
“Kolektiboki elikagai desberdinak erosten ditugu ekoizpenaren jatorria, prezioa, lan baldintzak, genero perspektiba edota agroekologia kontutan izanda”, diote Galdakaoko Elkarlaguntza Saretik: “Ardurak eta erabakiak taldean hartzen dira”.
Besteak beste, ogia, esnekiak, okelak, kontserbak, lekaleak, pastak, frutak, arrautzak, jaboiak, teak eta sarean ekoiztutako ortuariak erosten dituzte modu kolektiboan Galdakaoko Elkarlaguntza Saretik.
Egitasmoaren helburua da “kalitate eta prezio hobeak” lortzea, “banan-banan supermerkatura joan beharrean, kantitate handiak erosita”, diote.
Talde dinamikaren aurkezpena gaur, maiatzak 16, 18:30ean egingo dute Ganguren Mendi Taldearen egoitzan. Hala ere, Tximelarre Goikoa auzoan daude Galdakaoko Elkarlaguntza Sarekoak eta lokala ostegunetan zabaltzen dute 19:00etatik 21:00etara bitartean.
☉ Galdakao
Palestinaren aldeko elkarretaratzea deitu du gaur Galdakaon Hego Uribeko Kontseilu Sozialistak
Nakba Eguna edo palestinar exodoa gogorarazteko eguna da gaur: palestinar herriaren hondamendia gogorarazteko eguna, alegia. Horren harira, mobilizazioak deitu dituzte hainbat eragilek hainbat herritan.
Hego Uribe eskualdean, Kontseilu Sozialistak elkarretaratzea deitu du 19:00etan Galdakaon, Pontzi Zabala kaleko bidegurutzean.
“Azken egunetan Rafahen ematen ari diren Israelgo estatu genozidaren erailketak eta mendebaldeko gobernu, enpresa eta alderdi ezberdinek sionismoarekin dituzten konplizitateak saltzea ezinbestekoa iruditzen zaigu, palestinar erresistentziaren legitimitatearen defentsa eginez”, diote Hego Uribeko Kontseilu Sozialistatik.
Eskualdeko mobilizazio horrez gain, BDZ Bizkaiak (Boikota Desinbertsioak eta Zigorrak Israelentzat) manifestazioa deitu du Bilbon, 19:00etan, Moyua plazatik. Osasun langileek, suhiltzaileek, baserritarrek, kazetariek, guraso elkarteek, EHUk, herri mugimenduek eta sindikatuek bat egingo dute Bilboko deialdiarekin.
Era berean, Palestinarekin Elkartasunak mugimenduak manifestazio nazionala deitu du maiatzaren 19an, igandez, 12:30ean Iruñan.
☉ Galdakao
Bigarren eskuko merkatu solidarioa antolatu dute Galdakaoko institutuek Kurtzeko plazan
Maiatzaren 17an izango da merkatua Kurtzeko plazan. Bilduko duten dirua GBGE elkarteari emango diote Galdakaoko institutuek
Bigarren eskuko merkatu solidarioa antolatu dute Galdakaoko institutuek Kurtzeko plazan maiatzaren 17an, ostiralez, 09:30etik 13:30era.
“Herriko institutuetan arropa, liburuak, jostailuak eta bitxiak biltzen ari gara merkatuan saltzeko eta lortuko dugun dirua GBGEri emango diogu”, adierazi diote GEURIAri proiektuko arduradunek: “Erakunde honek hainbat proiektu sortzen eta gauzatzen ditu gizarte-egoera ahulean dauden pertsonekin lankidetzan arituz”.
Merkatuak bat egingo du Birziklapenaren Nazioarteko Egunarekin (maiatzak 17): “Agenda 30 proiektuaren testuinguruan, iaz hasi ginen pentsatzen bigarren eskuko merkatu solidarioa antolatzea, eta aurten antolatuko dugu lehen aldiz ekintza eraldatzaile hau. Animatu zaitezte proiektu solidario honetan parte hartzera!”, diote.
☉ Galdakao
Burdin Hesitik ibilaldi gidatua antolatu dute Galdakaon, bonbardeketen 87. urteurrenean
Ibilbide gidatuaz gain, maiatzaren 19an bertan ekitaldi nagusia antolatu dute Plazakoetxen. Gainera, maiatzaren 15ean Gurseko errefuxiatuen kanpamenduaren inguruko hitzaldia emango du Jabi Bilbaok
Maiatzaren 19an 87 urte beteko dira faxistek Galdakao bonbardatu zutenetik, eta urtero bezala, ekitaldia antolatu dute Galdakaoko Udalak eta Galdakao Gogora elkarteak.
Ekitaldi nagusia Plazakoetxen izango da 13:00etan. Ohi bezala sirena hotsak entzungo dira eta lore-sortak utziko dituzte bonbardaketen memorialean.
Aurretik, 09:00etan ibilbide giudatua izango da Burdin Hesitik. Galdakao Gogora talde memorialistako kideen gidaritzapean, zazpi kilometro inguruko ibilbidea egingo da basotik, bertako lubaki, babesleku eta metrailadoreen habiak ikusiz eta horien inguruko azalpenak entzunaz.
Bestetik, maiatzak 15ean ‘Gurs: camp des basques’ hitzaldia eskainiko du Jabi Bilbao irakasle eta adituak. Hitzaldia 19:00etan izango da Torrezabalen.
Egitaraua / Galdakaoko bonbardaketak – 87 urte
Maiatzak 15, asteazkena
Hitzaldia: ‘Gurs: camp des basques’, Jabi Bilbao
19:00 Torrezabaleko erakusketa gela
Maiatzak 19, igandea
Burdin Hesitik ibilaldi gidatua: 7 kilometroko ibilbidea basotik
09:00 Kurtzeko plazatik
Oroimen ekitaldia
13:00 Plazakoetxe
Hainbat erle erlauntza bat egiten agertu dira Galdakaon. Inocencio Goikuria Iturriotz galdakoztarrak Lapurdi eta Juan Bautista Uriarte kaleen arteko zuhaitz batean erlauntza egiten zeuden momentuko irudiak publikatu ditu bere sare sozialetan.
Bideoarekin batera honakoa publikatu du Goikuriak: “Udaberriaren amaieran eta udan, erleen koloniak banatu egiten dira erlauntza berriak sortzeko. Jatorrizko erlauntza erle erregina gazte baten ardurapean geratuko da, eta kolonia berriro jendeztatu beharko du. Erle erregina zaharrena, berriz, erle langileen laguntzarekin leku berri baten bila aterako da. Erle erreginak, erle langileek eta zenbait zantarrek osatzen duten talde migratzaile honi erlauntza deitzen diogu”.
Argazkiak / Rocio Jaia antolatu dute Basaurin, San Faustin erara
32. Ume Mendi Ibilaldia antolatu du Arrigorriagako Padura Mendi Taldeak
Bideoa / Jon Atxutegi, Geltokia Erdigunean: “Hau ez da hemen bukatzen; mobilizazioekin jarraituko dugu”
Argazkiak / Rocio Jaia antolatu dute Basaurin, San Faustin erara
Argazkiak / Usansolon metro geltokia erdigunean eskatzeko manifestazio goiztiarra egin dute herritarrek
Argazkiak / Clown eta Pailazoen Nazioarteko jaialdiaren bigarren egunak algara eta hausnarketa uztartu ditu
Bideoa / Jon Atxutegi, Geltokia Erdigunean: “Hau ez da hemen bukatzen; mobilizazioekin jarraituko dugu”
Bideoa / Sute batek zazpi auto kaltetu ditu Ugaoko Gernika enparantzako aparkalekuan
