☉ Galdakao
Gorozibain 9,3 hektareako lursaila 1,6 milioi euroan erosiko du Galdakaok energia berriztagarrietarako
Gorozibai auzoan dagoen 93.000 metro karratuko lursaila erosiko du Galdakaoko Udalak 1,6 milioi euroan. Iaz Eraikuntza eta Eraispen Hondakinen (EEH —gaztelaniaz RCD—) lantegia bertan eraikitzeko asmoa agertu zuen Moyua enpresak GEURIAk azaldu zuen bezala, lursailaren jabeak, baina Udalak atzo osoko bilkuran hartu zuen erabakiarekin asmo hori bertan behera geratu da. Udal ordezkarien helburua da lursail horietan eguzki energia ekoizteko plakak jartzea.
“Lur eremu hau eskuratzeko beharra energia jasangarriak sortzeari lotutako eremu baten sorkuntzan oinarritzen da. Horrez gain, energia biltegiratzeko plantak ingurumen-hezkuntza-prestakuntza eremuak eta herritarren aisialdirako eremuak barne hartuko ditu. Horretarako hitzarmena eta gastu proposamena onartu ditugu osoko bilkuran”, dio Asier Egiraun Hirigintza arloko zinegotziak. EH Bilduren, Usansolo Herriaken, Podemosen eta Auzoaken bi zinegotzien aldeko botoarekin, EAJren eta PSEren abstentzioarekin, eta Auzoaken zinegotzia baten eta atxiki gabeko zinegotziaren aurkako botoekin onartu dute hitzarmena eta gastu proposamena.
Eguzki-ortu bat Gorozibain jartzea da udal gobernuaren asmoa. “Horretarako aukeratu den gunea egokitasun berezikoa da. Hegoalderantz ematen duen leku bat da, bertan zenbat eguzki ordu eduki daitezkeen aztertzen ari gara, baita orduko zenbat megawatt sor daitezkeen eguzki-ortuetan jartzen den hektarea bakoitzeko ere. Gainera, lursailaren ondoan autohornitu daitezkeen alokairuko eraikinak eraikitzea aurreikusita dago”, dio Egiraunek: “Eguzki-ortuen modalitate desberdinak egiteko lekua dago: kooperatiba egiteko lekua dago, ondoko etxebizitzen hornikuntza-eremuak, eta, gainera, udalerri osoa udal instalazioetarako hornitzeko lekua izango genuke”. Horretarako lehiaketa publikoa zabalduko luke Udalak.
Momentuz egoera honakoa da: Udalak erosi egingo du lursaila eta, hortaz, EEH lantegirik bertan eraikitzea behin betiko baztertu dute. “Auzokideon balorazioa ona da. EEH lantegia Gorozibain ez jartzea albiste oso ona da. Eskertuta udal gobernuari, batez ere hirigintza zinegotziari eta gure alde egon diren talde politiko guztiei ere”, adierazi diote GEURIAri RCD Hemen Ez plataformako kideek. Iaz hainbat mobilizazio deitu zituen plataformak eta horren berri eman zigun Igor Amarika herritarrak bideo honetan. Gainera, iazko apirilean EEH lantegiaren kontra azaldu ziren Galdakaoko talde politiko guztiak, atxiki gabeko zinegotzia izan ezik.
Udaltaldeen iritziak
Galdakaoko EAJk honakoa adierazi zuen atzo osoko bilkuran: “Denok ados gaude ez dugula EEH plantarik nahi Gorosibain, eta lursail hori erosi behar dugula, beste erremediorik ez dugulako. Jarduera aldatu behar zaio. Plaka fotovoltaikoak jartzearen aldekoak gara, baina ez gaude ziur udal gobernu taldeak proposatutako aukera bideragarria den. Proposatzen duzuen jarduerak ondare-murrizketa dakar. Burtotzarako bidean udal-orube bat dugu, altuera handiagoko orientazio bera duena, eta horregatik argi gehiago. Bertan plaka fotovoltaikoak jar daitezkela uste dugu. Ez gaude plaka fotovoltaikoen aurka; ez gaude ziur Gorozibaiko lursail horretan aukera bideragarria denik. Horregatik jo dugu abstentziora”, dio Aintzane Urkiza EAJko bozeramaileak.
PSEk ere abstentziora jo zuen: “Egia esan, lurzoru horietan EEH plantako jarduera hori nahi ez bazen, hasieratik atzera bota behar zen. Hitzarmen honek ingurumen-jarduera jasangarriago batekin bat datozen alternatibak sustatzeko borondate politikoa betetzen du. Planteatzen den alternatibari dagokionez, zalantza asko sortzen zaizkigu eguzki-ortuak ezartzeko ideiaren bideragarritasunaz. Uste dugu proposamena gehiago landu behar dela”, dio Txema Larrabazal bozeramaile sozialistak.
UHk eta Podemosek aldeko botoa eman zuten, eta bi alderdiak ados daude hitzarmena sinatzea onuragarria dela bai auzotarrentzat, enpresarentzat eta Udalarentzat. Azkenik, Miguel Angel Matas atxiki gabeko zinegotziak kontran bozkatu zuen eta honakoa adierazi zuen: “Lursailen erosketa onartuz eta proiekturik ez dagoela berretsiz, arazo bera mantenduko dugu eta gainera Udalaren diru asko xahutuko dugu: ia bi milioi euro. Benetako erabilerarik gabe, lursailak zabortegi bat bihurtuko dira berriro”, dio. Auzoakeko ordezkariek ez zuten hitza hartu eztabaida horretan.
☉ Galdakao
Galdakaoko PSEk ez du 2026ko aurrekontua negoziatuko, “2025eko proposamen gehienak bete gabe dauden bitartean”
Aurrekontua negoziatzeari uko egin dioten arren, emendakinak aurkeztuko dituztela esan dute alderdi sozialistako ordezkariek
Galdakaoko Udalak oraindik ez du 2026ko aurrekontua onartu, baina PSEk dagoeneko aurreratu du ez duela negoziaziorik egingo gobernu taldearekin.
Arrazoia, honakoa: “Udal Talde Sozialistaren aldetik ezinbestekotzat jotzen dugu, 2026ko aurrekontuari buruzko edozein elkarrizketa eduki baino lehen, gobernu taldeak 2025eko aurrekontuan sartzea onartu zituen gure taldearen proposamenen egoeraren buruzko informazioa ematea”, diote talde sozialistatik.
“Ez zaigu oso serioa iruditzen 2026ko aurrekonturako proposamen berriei buruzko eztabaida hasteko planteamendua bultzatzea, 2025eko proposamen gehienak bete gabe dauden bitartean”, diote.
Eta adibideak eman dituzte: “Galdabusari buruzko edo negoziazioa azterlana, Ibaizabalen inguruko jarduketak, Maximo Moreno parkea eraberritu eta egokitzea edo Elexaldeko igerilekuak estaltzeko proiektua”.
“Beraz, jakinarazi nahi dugu ez dugula aurrekontu-negoziaziorik egingo Gobernuarekin, aurrez aipatutako gaiak konpontzen ez diren bitartean”, diote.
Negoziazioa ez, emendakinak bai
Alderdi sozialistako zinegotziek aurrekontua negoziatzeari uko egin dioten arren, emendakinak aurkeztuko dituztela esan dute.
“Bidezkotzat jotzen ditugun enmendakinak ohiko bideetatik erregistratuko ditugu, udalerriaren onerako zuzenketa horiek herritarrei ekar diezazkiekeen onuren arabera baloratuko direlakoan, eta ez jarrera errebantxisten, interes alderdikoien edo kontakizun politikoaren beharren arabera”, diote.
☉ Galdakao
Eskailera margoketa egingo dute gaur Galdakaon, Euskal Selekzioren eta Palestinaren arteko partidaren atarian
Ekintza Zizpa Gazte Konpartsak antolatu du: irekia da eta Iturrondo plazan izango da
Euskal Selekzioaren eta Palestinaren arteko futbol partida jokatuko da bihar, azaroak 15, San Mamesen.
Eta, partida horren atarian, Galdakaon, elkartasun ekitalkia antolatu du Zizpa Gazte Konpartsak gaur, azaroak 14, ostiralez.
Eskailera margoketa irekia antolatu dute Iturrondo plazan 17:00etatik aurrera.
“Herrialde askeen aldeko elkartasun keinua egin nahi dugu. Bi herri, borroka bakarra”, diote.
☉ Galdakao
Ganguren Mendi Taldeak hamaika ekitaldi antolatu ditu Galdakaon bere sorreraren 80. urteurrenean
Ekitaldi nagusia abenduaren 4an izango da, baina azaroan Mendi Astearen barruan erakusketa, dokumentalak eta hitzaldiak antolatu dituzte
Ganguren Mendi Taldeak 80 urte bete ditu aurten, eta azaroa eta abendua bitartean ekintza bereziak antolatuko dituzte.
Ekitaldi nagusia abenduaren 4an izango da. ‘Iragana bihotzean, etorkizuna bidean’ lelopean, topaketa egingi dute Torrezabal Kultur Etxean (19:00).
Topaketa horretan, iraganeko pasadizoak gogoratuko dituzte, oraina ospatuko dute eta etorkizunera begiratuko dute.
“Topaketa xumea baina sentitua izango da. Bertan, klubaren azken 30 urteak laburbiltzen dituzten liburua eta bideoa aurkeztuko ditugu, eta ekitaldia mokatu baten bueltan bukatuko da”, diote.
Mendi Astea
Bestetik, ekitaldia nagusia baino lehen, Mendi Astea antolatuko dute.
Erakusketak, proiekzioak eta hitzaldiak eskainiko dituzte, mendizaletasunaren arloan aditu diren profesionalen parte hartzea barne.
Pou anaiek, Txomin Uriartek, Elixabete Arbek, Joanna Maluendak eta Bego Gonzalezek hartuko dute parte jardunaldietan.
Hona hemen Mendi Asteko egitaraua:
Azaroak 3-28
Erakusketa Ganguren MTren egoitzan: ‘Everesterako lehen euskal espedizioa’
11:30-22:00
Azaroak 13, osteguna
MendiTour Mendi Film zirkuitua: ‘Hiru Haundiak. Taupadak eta Gailurrak’ eta ‘Of a Lifetime’ film luzeak eta ‘Red Rock Revolution’ film laburra
19:00 Torrezabal
Azaroak 20, osteguna
Dokumentala eta hitzaldia: GR11 ibilbidea. Elixabete Arbe, Joana Maluenda eta Bego Gonzalez
19:30 Ganguren MTren egoitza
Azaroak 29, larunbata
Dokumentala eta hitzaldia: ‘Bizitzari sokaz lotuta’. Eneko eta Iker Pou anaiak
19:00 Torrezabal
☉ Galdakao
Etxebizitza prefabrikatuak Urretan eraikitzeko lanek trafikoan eta aparkalekuetan izango du eragina, Galdakaon
Ganguren eta Ramon Rubial kaleak trafikoari itxita egongo dira abenduaren 19ra arte. Gainera, ezin izango da aparkatu eskuineko lerro osoan
Etxebizitza prefabrikatuak eraikiko ditu JIT Housing enpresak Galdakaon. Ekintza pribatua da eta Urreta auzoan eraikiko dituzte, Ganguren eta Ramon Rubial kaleen artean.
Moduluka eraikitzen dituzte etxebizitza mota hauek eta lanak azaroaren 14an, ostiralez, hasiko dituzte. Materialak ekarri eta jarriko dituzte, eta Galdakaoko udal ordezkariek adierazi dutenez, trafikoan eta aparkalekuetan eragina izango dute obrek.
“Lehenengo fasea hilabete batez luzatuko da, abenduaren 19ra arte. Epe horretan, Ganguren eta Ramon Rubial kaleetan trafiko mozketak eta aparkatzeko murrizketak izango dira, makineria instalatzeko beharrezkoa den espazioa eta izango diren kamioien joan etorriak direla eta”, diote.
Zehazki ,Ramon Rubial kalearen sarreratik eta Ganguren kaleko 7. zenbakiraino sarbidea itxita egongo da abenduaren 19ra arte, astelehenetik ostiralera, 07:30etik 15:00etara.
Era berean, ezin izango da aparkatu zirkulazioaren norabideko eskuineko aparkaleku lerro osoan.
“Bizkai kaleko 92, 94 eta 96. zenbakietako bizilagunei pasabidea baimenduko zaie. Horretarako, seinale emaileak egongo dira ibilgailuen pasabide txandakatua koordinatzeko, muntaketa lanen faseen arabera”, diote udal arduradunek.
Herritarren joan etorriak ahalik eta gehien errazteko, gunea behar bezala babestuklo eta seinaleztatuko dute.
☉ Galdakao
Galdakaoko Bengoetxe auzoan etxebizitzak egitea adostu dute aho batez: % 40a babes publikokoak izango dira
Eremu komertzial izatetik bizitegi izatera igaroko da, eta etxebizitzen %40a babes publikokoak izango dira
Galdakaoko udalbatzarrak ostiral goizean egindako ez ohiko osoko bilkuran puntu bakar bat eztabaidatu eta onartu zuen: Bengoetxeko lur eremu batean etxebizitzak eraikitzeko hitzarmena egitea.
Eremu hori, orain arte komertzial gisa izendatua egon den arren, bizitegi eremu bihurtuko da aurrerantzean. Horrela, Galdakaoko Udalak Durruti XXI, Saema, Zeletxe 2005 eta Zuatzaurre enpresekin hitzarmena sinatuko du, etxebizitza libreak eta babes publikokoak eraikitzeko. Egingo diren etxebizitzen % 40a etxebizitza babestuak izango dira.
Asier Egiraun Hirigintza zinegotziak azaldu duenez, “helburua da UEBE-2 egikaritze unitateko eremu komertziala bizitegi eremu lez kalifikatzea, herritarren etxebizitza beharrizanei erantzuteko eta bizigune berriak sortzeko”. Egiraunek nabarmendu du, gainera, metroaren etorrerak bultzada eman diola egitasmoari, mugikortasun eta irisgarritasun behar berriak sortuko direlako.
Udalak adierazi du proiektuaren bideragarritasun ekonomikoa bermatuta dagoela, urbanizazioaren eta eraldaketa urbanistikoaren kostu guztiak enpresek bere gain hartuko dituztelako. Horrez gain, lanen garapenarekin batera sortuko diren plusbaliak direla eta, 2,8 milioi euro inguru jasoko ditu Udalak, eta diru hori beste proiektu publiko batzuetan inbertituko du.
Egiraunek gogorarazi du neurriak udal gobernuak bultzatzen duen etxebizitza politikarekin bat egiten duela: “Gure helburua da Galdakaon babes publikoko etxebizitza gehiago sortzea eta gazteei zein familiei bizitzeko aukera errealak eskaintzea”.
Osoko bilkuran ez da kontrako iritzirik jaso, eta talde guztiek adostasuna adierazi dute. Koldo Goioagak, EAJko zinegotziak, egitasmoaren garrantzia nabarmendu du, eta etxebizitza politiketan denok “bultza” egiteko beharra azpimarratu du.
Galdakaoko PSEk ez du 2026ko aurrekontua negoziatuko, “2025eko proposamen gehienak bete gabe dauden bitartean”
Eskailera margoketa egingo dute gaur Galdakaon, Euskal Selekzioren eta Palestinaren arteko partidaren atarian
Korrika 2026 | Martxoaren 19tik 29ra izango da 24. Korrika, Atharratzetik Bilbora
Argazkiak | Basauriko bi bizilagunen etxegabetzea eta herritarren elkarretaratzea, argazkitan
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
Bideoa | El Kangri: «Egiten dudan rap-ak nire bizitza du oinarri, inor kaltetzeko asmorik gabe»
Bideoa | Basaurin etxegabetzea gauzatu ostean: “Beste etxebizitza bat hutsik, negozioa egiteko”
