→Galdakao

June Oleaga: “Euskara gutxi erabiltzen dutenek maiztasun gehiagorekin hitz egitea lortu nahi dugu”

Galdakaok izena eman du Euskaraldian. Dinamika hori zeinen garrantzitsua den azaldu digu Jone Oleaga dinamizatzaileak

Ezkerrean, June Oleaga, Euskaraldiako dinamizatzailea Galdakaon. Eskuman, Ariguneen aurkezpenean / Euskaraldia Galdakao

Euskaraldiaren bigarren edizioa 2020ko azaroaren 20tik abenduaren 4ra bitartean ospatuko da. Aurreko edizioan baino lau egun gehiago izango ditu ariketak eta oraingoan ere belarriprestak eta ahobiziak izango ditu protagonista. Gainera, ariguneak agertuko dira: entitateetan euskara sustatzeko guneak, alegia. Edizio berriak aurreko dinamika zabaldu eta sakontzea du helburu.

“Portaeran dago gakoa, eta ez euskaraz hitz egiteko gaitasunean”, diote sustatzaileek. Lehen Euskaraldian herri batzordeek garrantzi zentrala izan zuten Euskaraldia antolatzeko garaian, herriz herri eraiki baitzen ekimena. Aurten ere herri batzordeek garrantzia bera izango dute. June Oleaga (Galdakao, 1986) Galdakaoko Euskaraldia dinamizatzailea da. Dagoeneko, Ahobizi eta Belarripresten izen-emateak izenematea.euskaraldia.eus estekan online egin daitezke, baita herrian bertan zabaldutako lokalean ere.

Galdakaoko herri batzordea martxan da. Noiztik ari zarete lanean?
Otsailaren amaieran hasi ginen martxan, eta ia martitzenero batzartzen ginen, martxa hartzeko. Ezustean, konfinatu gintuzten eta online batzartu izan gara. Orain bueltan, ikasturte hasierarekin bultzada berri bat eman nahi diogu. Aurreko edizioko batzordekideek eta udal batzordeak osatzen dugu herri batzordea. Egia da konfinamenduaz geroztik parte hartzeak behera egin duela, eta laster batzar zabal bat egingo dugu Herri Batzorde anitz bat osatzeko.

Konfinamenduak zuen lanean erabateko eragina izan du.
Bai. Konfinamenduak, edozein arlotan moduan, ez digu batere lagundu. Gure egunerokotasuna hankaz gora ipini eta ostera ere egunerokotasun berri bat eraiki eta moldatu behar izan genuen; kontuan hartu gabe norberarengan zelango eragina izan duen egoera berri honek.
Hala eta guztiz ere, Etxealditik Euskaraldira dinamikan ibili izan gara eta kontzientzia txiki bat sortu izan dugula uste dugu. Etxean eta etxetik ditugun harreman-komunikatiboetan euskara gehiago, gehiagorekin eta gehiagotan egiteko helburua izan zuen dinamika horrek.

Galdakaoko Euskaraldiaren lokala Ganekogorta 3 kalean / Euskaraldia Galdakao

Eskualdeko gainerako batzordeekin harremanik izan duzue?
Euskaltzaleen Topagunekook astero batzen gara eta bertan Arrigorriagako koordinatzailea ere badago. Eskualdetik aparte, Txorierri, Leioa eta Zaldibarrekoekin astero batzartzen gara.

Ariguneak agertuko dira lehen aldiz bigarren Euskaraldian. Sektore jakin batean gehiago eta sakonago eragiteko asmoa duzue?
Ez daukagu sektore jakin batean sakonago eragiteko asmorik. Baina egia da, azkenean herrigintzari indar gehiago ematen diogula eta merkataritza eta ostalaritza, irakaskuntza eta kultur eta kirol elkarteak eskurago ditugula.

Baduzue dagoeneko herrian entitaterik arigune moduan aritzeko?
Bai, jada 120 entitatek baino gehiagok eman dute izena. Eta era askotako Ariguneak daude: bai handiak, bai txikiak.

Ariguneen aurkezpen ekitaldia / Euskaraldia Galdakao

Eragin kualitatiboa bilatzen da aurten, agian kuantitatiboaren gainetik.
Hala da. Hau da, Ariguneak gutxi badira ere, onak izan daitezela, dinamika bete eta denboran iraun dezatela. Gure erronka handienetakoa da hori, euskararen garrantziaren kontzientziazio maila areagotzea, alegia.

Gaur egun zein da euskararen egoera Galdakaon?
Gutxi gorabehera % 65a euskaldunak edo ia euskaldunak gara baina erabilera % 11koa izango da Galdakaon. Berez euskaldun zaharrak eta berriak badaude; beste kontu bat da gure egunerokotasunean zein jarrera daukagun euskararekin. Kontzientziazio hori lortu nahi dugu. Hizkuntza erabiltzen dutenak ekiteko, gutxi erabiltzen dutenek maiztasun gehiagorekin erabiltzeko eta ez dakitenek pausoak emateko, txikiak badira ere, euskararen aldeko bidean jar daitezen.

Ohiko txapa banaketaz gain, ekintza zehatzen bat antolatuko duzue Galdakaon?
Nahiko genuke. Baina ezin dugu ezer aurreratu. Orain erdigunean osasuna dago eta hilabete barru ez dakigu nola egongo garen eta egoera zein izango den. Gauzak ondo bidean, ekintzen berri aurrerago emango dugu.

Zuk zeuk parte hartu zenuen lehen Euskaraldian?
Aurreko edizioan Bilbon egiten nuen nire bizitza eta bertan parte hartu nuen. Hala ere, nire egunerokotasunean egunero bai ahobizi bai belarriprest izateko jarrera izaten saiatzen naiz. Proiektu oso polita izan zela iruditu zitzaidan. Hamaika egun berezi izan ziren. Aurtengoan lau egun gehiago izango ditu dinamikak, beraz, gogotsu.

Zer behar du Galdakaok euskaraz gehiago aritzeko?
Euskaraldiako dinamikan egunero jardutea (kar, kar, kar). Kontzientziazio maila hori ez ahaztea eta ekitea!

Gora

Geuria Laguntzaileak Geuria Laguntzaileak