☉ Hego Uribe
Bideoa / Hego Uribeko 58 pentsiodun Gasteizen izan dira Legebiltzarraren aurrean
Euskal Herriko Pentsidunen Mugimenduak elkarretaratzea egin du gaur Gasteizen, Legebiltzarreko atarian. Guztira Arabako, Bizkaiko eta Gipuzkoako 1.200 lagunek egin dute bat kontzentrazioan, eta Hego Uribe eskualdetik 58 pentsiodun bertaratu dira: Basauritik, Galdakaotik eta Ugaotik.
Gutxieneko pentsioa 1.080 eurora arte osatzeko eskaera egin dute beste behin ere pentsiodunek: “Gure ustez, osagarri horrek 1935etik 1960ra bitartean jaiotako belaunaldiekin egindako bidegabekeria konpontzen du, bereziki emakumeak baitira pentsio txikienak jasotzen dituztenak. Guretzat, funtsean, lehentasun eta borondate politiko kontua da. Pertsona guztiei, adinekoei eta pentsiodunei barne, bizi-baldintza duinak lortzeko aukera ematea gobernuaren edozein ekintzaren lehentasuna izan beharko litzateke. Horregatik, gutxieneko pentsioa 1.080 eurora arte osatzeko eskaria planteatzen dugu, Euskadiko Segurtasun Zentroaren diru-sarrera nahikoen irizpideak betetzeko lehen urrats gisa”, diote Euskal Herriko Pentsidunen Mugimendutik.
Bestetik, EAEko langile eta pentsiodunei “pentsio publiko duin eta nahikorrak” bermatzeko beharrezkoak diren ekimenak onartzea eskatu diote Eusko Jaurlaritzari eta Legebiltzarrari: “Urrats bat eman behar da eskaera horiek EHPMren aldarrikapen izateari utz diezaioten eta gizarte bidezkoagoa, gizon eta emakumeen arteko berdintasunean oinarrituta, eta solidarioa eraikitzeko oinarri bihur daitezen, bizi-baldintza duinak lortzeko eskubidea ez baita adinarekin iraungitzen”, diote.
Azkenik, Legebiltzarrean ponentzia bat sortzea proposatu dute pentsiodunek, “gure pentsioen murrizketak eta mehatxu berriak gelditzeko neurriak hartzeko”, diote. Ildo horretan, EHPMk bilerak izan ditu EAJrekin, EH Bildurekin, Elkarrekin-Podemosekin eta PSErekin. “Gure errebindikaziorik premiazkoenak dagoeneko onartu behar dira. Gobernatzen duenak pentsio publikoak defendatu egiten ditu”, aldarrikatu dute.
52 hilabete borrokan
Pentsiodunek 52 hilabete daramate kalean borrokan; lau urte baino gehiago. “Pentsio Solidarioen eta Banaketaren Sistema Publikoaren alde borrokan gaude, gaur egungo eta etorkizuneko pentsiodunentzat, eta gizarte osoaren babes irmoa eskatzen dugu, egia bihur daitezen”, diote Euskal Herriko Pentsiodunen Mugimendutik. Eskualdean astelehenero elkarretaratzeak egiten dituzte udaletxeen aurrean, esaterako, Basaurin eta Galdakaon.
Hauek Gasteiztik GEURIAra bidali dizkiguten argazkiak:
🤪 Esamoldea zertxobait moldatu dugu, baina uste dugu ondo baino hobeto ulertzen dela: dabilen harria… GEURIAri goroldiorik ez!
🥳 Urte berri on GEURIAko lantalde guztiaren partez!
[Inuzenteen eguneko albistea] Berri pozgarria Hego Uribeko gautxorientzat. Renfek ohar bidez jakinarazi duenaren arabera, ‘Gau Jaia’ tren-zerbitzua berrezarriko dute 2026tik aurrera.
Pandemian kendu zuten Basauriko, San Migelgo, Arrigorriagako eta Ugaoko parrandazaleei ostiral eta larunbat goizaldean zerbitzua ematen zien trena, eta ordutik hona asko izan dira erabaki honekin kexu agertu diren herritar eta arduradun politikoak.
2023an, kasurako, manifestazioa antolatu zuten Bilbon, baina orduko hartan antolatzaileek GEURIAri adierazitakoaren arabera ez zen inor agertu: “Manifestaziora aldirietako trenean joateko deia luzatu genien herritarrei, eta tamalez denak berandu heldu ziren, atzerapenak direla eta. Manifestaziora zihoan terraplanista, konspiraziozale eta cryptobro baten arabera, Renfek nahita egin zuen, protestak ekidin nahian; baina goizeroko atzerapenak ikusita, nork sinetsi behar du halakorik?”
Zerbitzu honen garrantziaz jabetze aldera, OkerIker taldeak inkesta egin zuen iaz Hego Uribeko 3.000 herritarren artean, eta emaitzak argigarriak izan ziren: Hego Uriben 50 urtetik beherako bikoteen % 45ek Gau Jaia trenean ezagutu zuten elkar, eta horietatik % 100 bananduta dago dagoeneko, baina hori ezin zaio Renferen zerbitzu kaskarrari egotzi, “balio kristauei eta familia tradizionalari uko egin dion gizarte hedonista eta indibidualistari baizik”, Ugaon etxez etxe dabiltzan Zazpigarren Zeruko Adbentisten arabera, betiere.
Berritasun ugari
Albiste pozgarri hau ezagututa, GEURIAk Adif-Renfeko arduradunarengana jo du. Oskar Zubiak indarrean sartuko diren berritasun guztietaz hitz egin digu: “Egia esan aurrekontu itzela dago proiektu honen atzean, eta herritarren zerbitzua zein errentagarritasun ekonomikoa uztartu nahi izan ditugu”.
Elkarlan publiko-pribatuan oinarritu dute proiektua, “badakizu, guk inbertsioa egiten dugu eta enpresek irabaziak pilatzen dituzte”. Horregatik, “bidaiariei ahaztuko ez duten esperientzia eskainiko zaie: DJak izango dituzte, food truckak, kuadrillen arteko olinpiadak, ardi txakurren lehiaketak…”.
Ekonomia zirkularra eta hondakinen kudeaketa beste lehentasunetako bat izango da, eta horregatik gonbitoekin konposta egitea aurreikusten dute: “Den dena pentsatuta dago, eta hasteko irrikitan gaude”.
Hiru txartel mota jarriko dituzte salgai, “ez dugu txartel hitza erabiliko, esperientzietaz hitz egitea nahiago dugu”, merkeena 300 eurotan bidaia bakoitzeko, eta garestiena 600 eurotan: “Merkatuari egokitutako prezioak dira” borobildu du Zubiak.
Abenduak 22 ditu gaur eta urtero bezala, Gabonetako Loteria izan da. Aurten, ordea, ez du sari nagusirik banatu Hego Uribe eskualdean.
Aurreko urteetan, baina, dirua utzi du zozketa handiak: duela lau urte, 2021ean 154 milioi euro utzi zituen Basaurin Gabonetako Loteriaren bigarren sariak; 2022an Galdakaon 11 milioi euro banatu zituen bosgarren sari batek; 2023an Gabonetako Loteriaren lehen sariaren dezimo bat banatu zuten Etxebarriko San Antonio auzoan eta 400.000 euro banatu zituzten; eta 2024an laugarren sari baten lau dezimo (80.000 euro) saldu zituzten Basaurin.
☉ Hego Uribe
Bizkaiko Trinkete Txapelketako finalak jokatuko dituzte Bidebideta eta Adiskide klubetako pilotariek
Bizkaiko Trinkete Txapelketako finalak jokatuko dira abenduaren 20an, larunbatez, Abadiñon, 10:00etatik aurrera.
Lau final jokatuko dira: emakumeak, kadeteak, gazteak eta nagusiak. Eta kategoria horietatik bitan Hego Uribe eskualdeko pilotariak arituko dira.
Emakumezkoetan, txapela Basauriko Bidebieta klubeko pilotari batek jantziko du bai ala bai; izan ere, partida Bidebietako bi pilotariren artekoa izango da: Amaia Zarrabeitia eta Eva Martinez.
Bestetik, nagusien 2. mailako kategorian Galdakaoko Adiskide klubeko Jon Gorostiagak jokatuko du finala, eta aurkari izango du Mungiako Danak Bat taldeko Eder Urresti.
☉ Hego Uribe
Hego Uribeko saltokietan polizia-zaintza indartuko dute Udaltzaingoek eta Ertzaintzak Gabonetan
Basauriko, Galdakaoko, Etxebarriko, Arrigorriagako eta Ugaoko saltokien zaintza indartuko dute Gabonetan
Aurreko urteetan bezala, Ertzaintzak eta Basauriko, Galdakaoko, Etxebarriko, Arrigorriagako eta Ugaoko Udaltzaingoek udalerri horietako saltokien zaintza indartuko dute Gabonetan.
Helburua da ebasketak eta lapurretak prebenitzea. Segurtasun Sailetik adierazi dutenez, “poliziaren presentzia areagotuko da leku jendetsuetan”.
Zaintzak “modu koordinatuan” egingo dituztela jakinarazi dute, “baliabideak optimizatzeko eta, horrela, segurtasuna areagotzeko Gabonetan”.
Errege Magoek kamioiz egingo dute kabalgata Galdakaon, Bengoetxetik Kurtzeko plazara
Argazkiak | Korrika eta giro apartarekin agurtu dute urtea Galdakaon San Silvestre lasterketan
Bideoa | Urte berri on!
Argazkiak | Korrika eta giro apartarekin agurtu dute urtea Galdakaon San Silvestre lasterketan
Argazkiak | Harrera beroa egiten diete Mari Domingiri eta Olentzerori Galdakaon
