→Zeberio

Zeberioko Agustin Aurrekoetxea parrokoak erretiroa hartu du herrian mende laurdena eman ostean

Eskualdeko hainbat herritako tenpluetan abade lanak egin dituen Agustin Aurrekoetxea Olabarrik (Dima, 1952) erretiroa hartu du

Meza // Iñaki García Uribe

Eskualdeko hainbat herritako tenpluetan abade lanak egin dituen Agustin Aurrekoetxea Olabarrik (Dima, 1952) erretiroa hartu du: Edurne Intxaurraga Beaskoetxea Zeberioko zinegotzia, Juan Manuel Etxebarria katedradun eta filologoa eta Iñaki Garcia Uriberen datuen arabera, Arrigorriaga, Arakaldo, Orozko, San Migel eta beste hainbeste lekutan lan egindakoa dugu. Zeberion 25 urtez egin du lan: 1996ko irailaren 2tik 2021eko irailaren 26ra, hain zuzen ere. Pasa den igandean, irailaren 26an azken meza santua eman zuen Ermitabarriko Olabarrietako Santo Tomasen, 13:00etan. Iñaki Garciak domekako argazkiak helarazi dikigu.

Bizkaiko Ermiten Lagunak taldeak deialdia egin zuen Ermitabarriko Taberna Zaharrera hurbildu eta bertatik parrokiara oinez joateko. “Aitzakia ezinhobea izan zen Olabarrietako Santo Tomas tenplua ezagutzeko, bertan inoiz izandako lagunentzat”, azaltzen zuen egun batzuk lehenago Iñaki García Uribe Ugaoko estankoko jabeak eta Bizkaiko Ermiten Lagunak taldeko kideak. “Meza bukatu ostean sakristia ikusteko aukera izan genuen”, eta museotxoa ikusteko momentu ezinhobea izan zen. Garcíaren hitzetan, Zeberioko eta zonaldeko eliztarrek agur berezia prestatu zioten Agustini: Juan Inazio Intxaurragak Agustinen bizitzaren ekintza nagusiak goraipatu zituen irakurriz. Gero, Juan Manuel Etxebarriak Etxepareren poesiaren metrikagaz sortutako bertsoak kantatu zizkion herriagaz. Horrez gainera, Zeberio eta inguruetako eliztarrek eskerrak eman zizkioten eta baita zenbait opari eman ere: plaka bat, organo elektroniko bat…

Olabarrietako Santo Tomas // Geuria

“Ekitaldia benetan polita izan zen”, izan dira Juan Manuel Etxebarria katedradunaren hitzak. Etxebarriak harreman estua du Agustinegaz: “Derioko Seminarioan 1960an hasi banintzen, Agustin 1963an sartu zan”, gogoratu du katedradun zeberioztarrak. Gertutik ezagutzen dute elkar gizon biek, eta domekako mezatik irten eta aterpeko luncha atzean utzi ostean Taberna Zaharrera joan ziren 16 laguneko taldeagaz, euren artean Patxi Malo apaiz berria eta Karlos Idirin alkatea egon zen, antzinako garaiak gogoraratzera: “Bazkaltzen hasi eta 20:00ak arte egon ginen bertan”, azaldu dio Etxebarriak GEURIAri irribarretsu. “Abaderaren lana txalogarria izan da. 25 urte eman ditu Zeberion, abadeen lan bakartia modu isilean egiten. Agustinek tratu berdina eman izan die herritar danei, bereizmenik gabeko tratua emanez”.

Meza santuaren momentua // Iñaki García Uribe

 

Nerbioiko Azken ‘moikanoa’

Agustin Aurrekoetxea Arratia eta Nerbioiko azken abadea dugu: “Oso zaila da gure zonaldeko abadeak izatea”, azaldu du Iñaki Garcia Uribek. “Praktikak egiten ari den gazte bilbotar bat dago Arrankudiagan”. Hitz gutxiko apaiza xumeak aldaretik berba egin arren, bere eliztarrak ondo baino hobeto ezagutzen zituela kontatu digu Garcíak eta domekako agur bereziaren ostean ez zuen denborarik eskaini nahi izan komunikabideei. Elizgizona isiltasunez irten zen eleizatik, harreman estua duen lagunekin iraganeko momentu oroigarriak otorduan berriro gogoratzera.

Juan Manuel Etxeberriaren oparia bertso formatuko agur hitzak izan ziren, B. Etxepareren metrika erabiliz eta Jon Lopategi bertsolariaren musikagaz lagunduta:

 

Agustin zuk egin dozuz abade-lan ederrak

Zeberiok emon gura deutsuz pozik eskerrak.

Herriz Diman munduratu zintzan euskal giroan

haurtzaroa emon zendun Olazabal auzoan,

eleizgizon izatea zeunkalarik gogoan

bide hori ez da eten zeure bizi osoan.

Agustin zuk egin dozuz abade-lan ederrak

Zeberiok emon gura deutsuz pozik eskerrak.

Deriora abadegai sartu zintzan gazterik

abadetza lortuteko ilusioz beterik,

ordenatu zintzan gogoz eleizaren legetik

pastoraltzan ekiteko Jainkoaren bidetik.

Agustin zuk egin dozuz abade-lan ederrak

Zeberiok emon gura deutsuz pozik eskerrak.

Mungiatik Axpera-ta Ondarruan jarraitu

eta gero gure herri Zeberio onartu,

Zeberion mende lauren egin dozu osatu

eta zure lan ederra egin dogu gozatu.

Agustin zuk egin dozuz abade-lan ederrak

Zeberiok emon gura deutsuz pozik eskerrak.

Agustin gaur heldu jatzu jubilatze epea

hainbat urte lan eginez lortu dozu ospea,

osasunez bizi beti zure ibil bidea

gogoratuz Zeberion badozula etxea.

Agustin zuk egin dozuz abade-lan ederrak

Zeberiok emon gura deutsuz pozik eskerrak.

Juan Manuel Etxebarria Ayesta. ( Zeberio, 2021-09-26 )

Gora

Geuria Laguntzaileak Geuria Laguntzaileak