Sareak

☉ Zeberio

Zeberioko EH Bilduk 2022ko aurrekontu parte-hartzaileen emaitzak aurkeztu ditu

Abenduaren 10ean Zeberioko Udaleko aurrekontu parte-hartzaileen prozesua amaitu zen: “Aurten inoiz baino parte-hartze handiagoa izan dogu aurrekontu parte-hartzaileetan”, azaldu du Karlos Idirin alkateak. “Parte-hartzeko moduak buzoien bidez eta interneten bidez izan da, eta partaidetza-datuak oso onak izan arren espero dugu urteek aurrera egin ahala kopuru horrek gora egitea”

Orain 4 urte

|

Auzotar bi, Gesalan // Geuria

Abenduaren 10ean Zeberioko Udaleko aurrekontu parte-hartzaileen prozesua amaitu zen: “Aurten inoiz baino parte-hartze handiagoa izan dogu aurrekontu parte-hartzaileetan”, azaldu du Karlos Idirin alkateak. “Parte-hartzeko moduak buzoien bidez eta interneten bidez izan da, eta partaidetza-datuak oso onak izan arren espero dugu urteek aurrera egin ahala kopuru horrek gora egitea”. Udalaren eta EH Bilduren prozesu parte-hartzailearen aurrean, “prozesu parte-hartzaile bik parte-hartzea zatitzen duela” gehitu du Natalia Martinez alkateordeak: “Hala ere, edozein prozesu parte-hartzaile ongi etorria da”.

Aurrekontu parte-hartzaileak demokrazia parte-hartzailearen tresna izanik, Zeberioko EH Bildu taldeak azaldu du “herritarrek ez dutela agente pasibo izan behar Zeberioko Udalari dagozkion erabakietan”. Horretarako, zeberioztarrek Udal aurrekontuaren zati bat nola erabiltzeko proposamenak helarazteko prozesua martxan jarri zuen urrian, prozesuaren etxez etxeko banaketa eginez. Joan den azaroaren 5ean, herritarrek egindako proposamenak jaso eta Zubialdeko plazan aurkeztu zituzten: “Azaroaren 5ean, batutako informazio guztiagaz ariketa praktikoa egiteko hainbat herritar bildu ginen”, azaldu du EH Bildu taldeak prentsa ohar baten bidez.

Udaletxe atzeko jolas parkea // Geuria

Hona hemen herritarrek bozkatutako emaitza aipagarrienak, sei arlo ezberdinetan sailkatuta:

  • Obrak, zerbitzuak eta landa-garapena

    • Zaborrontziak lotu: Arazo hau Uriondon ez ezik beste auzo askotan gertatzen da ere. Gaur egun sistema ugari daude. Zaborrontziak lotu eta bere kokagunetik mugitu ez daitezen. Txosten bat egin, tokiaren arabera sistema egokiena aukeratzeko eta aurrera eraman
    • Ubideak dakarren ura ondo bideratu Uriondo auzoan: Badago ubideen mantenurako diru partida bat, agian hau handitu beharra legoke mantenu-lanak sarriago egiteko eta, arazo barriak detektatu eta konpontzeko
    • Plazatik aparkalekurako pasabidea: Bere garaian obra hau aurrera eramateko oztopo nagusia URAk jarritako baldintzak ziren

  • Sustapen ekonomikoak

    • Km 0 produktuak eskolako jantokian eta ekoizleei aukerak eman eta tokiko produktuen kontsumoa bultzatzea; Eskola eta erresidentzietako jantokietan bertoko produktuen erabilpena bermatu;

  • Gizarte-garapenerako politikak

    • Berdintasun politikaz informatu: alor honetarako diru partida handia erabiltzen da: aurreko Planaren ebaluazioa, Plan berria prestatu… hori ez dago txarto baina informazioa herritarrei ez zaiela heltzen ikusten dugu
    • Desfibriladoreak: tabernatik atera, gehiago jarri eta herritarrei formazioa eman
    • Etxebizitzen falta: Ermitabarriko apartamentu turistikoak etxebizitza sozial bihurtu

  • Herrigintza, irisgarritasuna eta mugikortasuna

    • Bidegorriak eta auzo bideak: Zeberioko bidegorriaren lehen urratsa, plazatik Sautuolabarrira
    • Autobus zerbitzu eskasa Ugao eta Artearantz: Aplikazio bat sortu (BlaBla Car
      Zeberioztarra) Zeberion eta Zeberiotik inguruko herrietara mugikortasuna errazteko

Errepide nagusiko obrak, Udiarraga aldean // Geuria

  • Ingurumena eta trantsizio energetikoa

    • Basogintza: eredua aldatzea, basobideak eta auzobideak garbi mantentzea: Baso politika berriaren beharra nabarmentzea. Mono laborantzaren arriskuez ohartaraztea herrian. Diru partida informazio kanpaina bat irekitzeko: hitzaldiak, harremanak. Basobideak garbitzea eta ondo mantentzea. Auzobideak berreskuratzea. Jabeak arauak betetzera behartzea

  • Kultura eta euskara garatzea

    • Euskararen egoera aztertu eta erabilera sustatu: euskarari buruzko diagnosia egin eta horren arabera sustatzeko estrategiak sortu. Umeak euskarara ekarri eta belaunaldien arteko ekintzak antolatu

“Gure ustez prozesu parte-hartzaile bakarra egon da Zeberion”, azaldu du EH Bilduko Roberto Callejak. “Azken batean, Udalak postontzia jarri du herrian eta gu herritarrekin bildu gara behin baino gehiagotan. Guretzako, prozesu parte-hartzaile bat buzoia jartzeaz haratago doan ezer da”.

Abenduaren 9an EH Bildu eta Eajko alderdiko ordezkariak batu ziren. “Orain prozesu bien proposamenak baloratu behar ditugu”, azaldu du Natalia Martinezek. “Sakonean aztertu behar ditugu proposamenak eta prozesu bietan errepikatu diren puntuak edo kontraesankorrak diren horiek identifikatuko ditugu, besteak beste”.

Sailkatuta:

☉ Zeberio

Datorren urteko aurrekontua zehazteko bilera irekia egingo dute Zeberion, ostegunean

Hitzordua 18:30ean antolatu dute plazako ermita zaharrean

Orain 2 egun

|

2025/11/17

Zeberioko udaletxea // Geuria

Datorren azaroaren 20an, osteguna, 18:30ean, 2026ko aurrekontuaren inguruko bilera irekia egingo dute Zeberion.

Hitzordua Zubialdeko plazako ermita zaharrean antolatu dute. Udaletik herritarrak gonbidatu dituzte hitzorduan parte hartzera.

Osorik irakurri

☉ Zeberio

Zeberioko Austarri elkarteko mendizaleak Gantzorrotzera abiatuko dira hilaren 15ean

Ibilaldia amaitu ostean indabak bazkalduko dituzte mendizaleek Zornotzako jatetxe batean

Orain 7 egun

|

2025/11/12

Gantzorrotz // Javier Urrutia, Mendikat

Gantzorrotz Bizkaian kokatutako mendia da eta bertara abiatuko dira Austarri Mendi Taldeko mendizaleak azaroaren 15ean.

Irteera 08:00etan egingo dute udaletxeko plazatik. “Bere mutur zorrotzari zor dio ‘Gantzorrotz’ izena mendi honek, piramide baten itxurakoa baita gainaldea, baina gain erraza da, nonahitik igotzeko modukoa, arreta pixka bat jarriz gero, haitz eta elorri artean ez trabatzeko”, azaldu dute mendi taldetik.

Ikuspegi zabala eskaintzen du Legarmendiko karstaren gainean, izan ere karst eremuaren erdian gelditzen da eta ez dago goien bista galarazten duen zuhaitzik. Bertara joanez gero, antzeko beste tontor batzuk ere nahiko gertu gelditzen dira, Urtemondo esaterako Man, Betzuenburu eta beste asko, Ean.

Belatxikieta mendia Aramozko mendilerroaren tontorrik garrantzitsuenetakoa da. 661 metroko garaiera du. Belatxikietan mendiaren tontorrean mugarri handi bat dago. Garai batean, tontorrean zazpi artzain txabola zeuden eta, 1949an, eurek erabaki zuten gailurraren magalean ermita bat eraikitzea. Saninazioetan, erromeria egiten da bertan.

Ibilaldia amaitu ostean indabak bazkalduko dituzte mendizaleek Zornotzako jatetxe batean.

Osorik irakurri

☉ Zeberio

Mendi irteera, bertsopoteoa eta elkarretaratzea antolatu dituzte Zeberioko Azaro Feministan

Hilaren 30era bitartean hitzaldiak, sukaldaritza tailerra, mendi irteera, bertsopoteoa eta bakarrizketak bezalako jarduerak antolatu dituzte Zubialden

Orain aste 1

|

2025/11/10

Zubialde auzoa // Geuria

Hilaren 30era bitartean Azaro Feminista antolatu dute Zeberion, askotariko jarduerekin: hitzaldiak, sukaldaritza tailerrak, mendi irteera, bertsopoteoa, bakarrizketak…

Egitaraua | Zeberioko Azaro Feminista

Azaroak 10, astelehena
18:00 Sukaldaritza tailerra, eskola zaharra

Azaroak 14, barikua
19:00 Bertsopoteoa: Andoni Egaña + Oihana Bartra, plaza

Azaroak 15, zapatua
08:00 Mendi irteera: Artaungan-Gainzorrotz, plaza

Azaroak 19, eguaztena
16:00 ‘Zaintzailean zainduz’, eskola zaharra

Azaroak 21, barikua
18:30 Emanaldia: ‘Nor da Maurizia?’

Azaroak 25, barikua
13:00 Elkarretaratzea, udaletxe aurrean

Azaroak 26, eguaztena
17:00 Hitzaldia: ‘Saber decir que no’, Plazako ermita zaharra

Azaroak 28, barikua
18:30 Bakarrizketak: BostOK!, Plazako ermita zaharra

Azaroak 30, domeka
10:00 Azoka

Osorik irakurri

☉ Zeberio

Zeberioko Udala UEMAko kide izango da abendutik aurrera

Zeberioko euskara indizea % 80,2koa da, baina UEMAko datuen arabera ezagutzarekin lotutako indize horrek behera egiten du gero lehen hizkuntzaren (% 45,82) eta etxeko erabileraren (% 33,92) datuak behatuz gero

Orain 2 aste

|

2025/11/07

Zeberio // Geuria

Urdiaingo Udalarekin batera, Zeberiok UEMA Udalerri Euskaldunen Mankomunitateko kide izatearen erabakia hartu du joan den osoko bilkuran.

Zeberioko Udalak joan den azaroaren 6an egindako osoko bilkuran iragarri zuen UEMAko kide izatearen erabakia, EH Bilduko bost zinegotzien aldeko botoekin eta EAJko zinegotzi biren abstentzioarekin.

Zeberioko euskara indizea % 80,2koa da. Hala ere, UEMAko datuen arabera, Zeberion ere ezagutzarekin lotutako indize horrek behera egiten du gero lehen hizkuntzaren (% 45,82) eta etxeko erabileraren (% 33,92) datuak behatuz gero: “Zeberio ere euskararen ezagutza altuko udalerria da, beraz, baina euskararen nagusitasun argirik gabeko udalerria. Horregatik, kontzientziazioan eta herritarren hizkuntza ohituretan eragiteko beharra ikusi dute Zeberion ere”.

“Horren jakitun erabaki du Zeberioko Udalak UEMAko kide izatea, besteak beste herritarren ahalduntzean eta erabileran eragiteko UEMAren esperientzia bidelagun izango dutelakoan”, gehitu dute mankomunitatetik.

Zer da UEMA?

1991ko maiatzaren 5ean sortu zuten UEMA, 19 udalek, Aizarnazabalen egindako batzarrean. Harrezkero, Euskal Herri euskaldun baten alde lanean ari den erakunde publikoa da Udalerri Euskaldunen Mankomunitatea. Tamainaz zein izaeraz askotarikoak dira mankomunitatea osatzen duten udalak, baina guztiek badute elkartzen dituen zerbait: udalerri euskaldunak dira guztiak. Zehazki, UEMAko kide diren herri guztietan, biztanleen %70etik gora euskalduna da.

UEMAk gaur egun hainbat ildo eta zerbitzu ditu, euskaraz bizi nahi duten udalerrien beharrei erantzuteko. Udalen euskalduntzeaz gain, udalerri euskaldunen zaintza eta garapena, eta bertako herritarren sentsibilizazioa eta ahalduntzea dira nabarmenenak, horietan eragitea udalerri euskaldunei eta euskararen arnasguneei eusteko ezinbestekoa dela iritzita.

Abenduan, mankomunitatearen kide

Abenduaren 13an egingo du UEMAk urte amaierako Batzar Nagusia Etxarri Aranatzen. Ordutik aurrera izango dira Urdiain eta Zeberio mankomunitateko kide.

Zeberio eta Urdiain gehituta, 120 udal izango ditu UEMAk. Guztien artean 355.000 biztanleko lurgune euskalduna osatzen dute.

Osorik irakurri

☉ Zeberio

Mauriziaren omenaldiak eta domekako azokak emango diete hasiera Zeberioko Abendu Kulturalari

Udalak Escape Room bat, bakarrizketak, Maurizia Aldeiturriagari omenaldia, neguko azoka eta beste horrenbeste jarduera prestatu ditu neguari ongi etorria emateko helburuagaz

Orain 2 aste

|

2025/11/05

Zeberioko Abendu Kulturala atejoka dabil eta Udaleko Berdintasun Batzordeak azaroko jarduerak aurreratu dizkio GEURIAri, programa guztiz osatuta ez badago ere, jarduerak, urtero lez, 2026ko urtarrilera bitartean luzatzen direlako.

Abendu Kulturalaren ekitaldien programa hilabetearen erdialdean hasiko da: izan ere, azaroaren 14an bertsolarien saioa programatu dute. Azaroaren 21ean Maurizia Aldeiturriagaren bizitzaren inguruko emanaldi berezi bat prestatu dute. Gainera, Escape Room-a egingo dute eskolan. Azaroaren 25ean elkarretaratzea deitu Udaletik Emakumeen aurkako indarkeria ezabatzeko Nazioarteko Egunean.

Azaroaren 28an BostOK!-en bakarrizketak programatu dituzte: “Badira ikuslea pertsona hobe eta jantziago bat bilakatzen duten ikuskizunak. Nabarmen, Bostok! ez da horren adibide. Litekeena da emanaldiaren ondoren ikusleak lehen baino lotsagabeago irtetea. Izan ere horixe da bostOK! Bost umoregilek Ondutako Klima”.

Hilabetea behar bezala bukatzeko Domekako Azoka antolatu dute azaroaren 30ean, bertako produktuekin. Gorbeialdek Zeberioko Udalaren babesarekin prestatu du Zeberioko Zubialde auzoko plazako aterpean, 10:00etatik 15:00ak arte. Bertan, Ekain Goti Zeberioko alkateak azaldu lez, “eskualdeko eta inguruetako ekoizleen nekazaritza eta artisautzako produktuetaz gozatu ahalko dute herritarrek”. Gorbeialde saltokien zerrenda osatzen ari da hilabetean zehar.

Abendu Kulturaleko gainontzeko jarduerak zehazteke daude oraindik. Behin betiko zerrenda osatzean GEURIAn iragarriko dugu, urtero egiten den era berean.

Osorik irakurri